Luku 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Kʋyɑkʋ nɑkʋlɩ yǝlɑɑ nyǝkɑɣɑɑ Yesu kɛ́ Ɩsɔ Tɔm nɩɩʋ tɔɔ, nɑ ɩ́ sǝŋɑ Kenesɑlɛtɩ lʋm nɔɣɔ.

²Ḿpʋ́ɣʋ́ ɩ nɑwɑ kpɩɩlǝŋ nɑɑlɛ sǝŋɑ kʋteŋ tɔɔ, nɑ tiinɑ kpɑlɑɑ lɩɩ ɩ tɑɑ nɑ pɑ́ polo pɑ puluŋ cɔtʋɣʋ.

³Ɩlɛnɑ ɩ́ kpɑ ɩ tɑɑ lɛŋkʋ tɑɑ, nɑ kpɩɩlʋɣʋ ŋkʋ kɩɩ kɛ́ Simɔŋ nyǝŋkʋ. Ḿpʋ́ɣʋ́ ɩ sǝlǝmɑ-ɩ sɩ ɩ́ hɑtǝlǝnɑ-ɩ-kʋɣʋ kʋteŋ kɛ pǝcɔ. Ɩlɛnɑ ɩ́ cɑɣɑ kʋ tɑɑ nɑ ɩ́ sʋʋ ɩ sɛɣɛsʋɣʋ tɑɑ.

⁴Wɑɑtʋ wei ɩ tɛmɑ-wɛɣɛ sɛɣɛsʋɣʋ tɔ ɩ heelɑ Simɔŋ sɩ: Tuusi nɑ ń polo lumɑŋ tɑɑ nɑ ɩ́ tʋ mǝ puluŋ nɑ ɩ́ puu tiinɑ.

⁵Simɔŋ cɔ-ɩ sɩ: Tɑcɑɑ, tǝ tɛmɑ wɩɩʋ kɛ yem kɛ́ tɛʋ nɑ kʋ fem, tǝ tɑ puu pʋlʋ. Pɑɑ nɑ mpʋ n tɔmɑ sɩ mɑ́ tʋ tɔ, mɑɑ tʋ.

⁶Pɑ tʋ mpʋ ɩlɛnɑ pɑ́ puu tiinɑ kɛ sɔsɔm pǝ tɩɩ fɛɩ, hɑlɩ pɑ puluŋ cɑɑkɑɣɑ cǝlʋɣʋ.

⁷Ḿpʋ́ɣʋ́ pɑ hɑtɑ pɑ tɑɑpɑlɑɑ mpɑ pɑɑ wɛ kpɩɩlʋɣʋ lɛŋkʋ tɑɑ tɔɣɔ niŋ sɩ pɑ́ kɔɔ pɑ́ sǝnɑ-wɛ. Pɛlɛ pɑ kɔmɑ ɩlɛnɑ pɑ́ lǝsɩ tiinɑ nɑ pɑ́ suuli kpɩɩlǝŋ ɩnɩ ɩ nɑɑlɛ, hɑlǝnɑ pǝ ŋmilisiɣi-wɛ.

⁸Simɔŋ Piyɛɛ nɑwɑ mpʋ, ɩlɛnɑ ɩ luŋ Yesu kɛ ɑkulɑ kɛ kpɑkpɑɑ nɑ ɩ́ tɔ sɩ: Tɑcɑɑ, tɑɑ kpǝtǝnɑ-m, mɑ kɛ́ ɩsɑɣɑʋ mɑɣɑmɑɣɑ kɛ́.

⁹Pǝ tɑɣɑ pʋlʋ tɔɔ, tiinɑ nnɑ pɑ kpɑ mpʋ tɔ, ɑ tɔɔʋ kɑ lɑpɑ ɩ́ nɑ mpɑ pɑɑ wɛɛ tɔɣɔ sɔɣɔntʋ kɛ sɔsɔm.

¹⁰Hɑlǝnɑ pǝ lɑ mpʋ tɔtɔɣɔ ɩ tɑɑpɑlɑɑ Sepetee pǝyɑlɑɑ Sɑɑkɩ nɑ Yohɑɑnɩ. Tǝnɑɣɑ Yesu heelɑ Simɔŋ sɩ: Tɑɑ nyɑ́ pǝnɛntɛ yǝlɑɑ kɛ n kɑ́ puu.

¹¹Pɑ lǝsɑ kpɩɩlǝŋ kɛ lʋm tɑɑ, ɩlɛnɑ pɑ́ yele pǝ tǝnɑ tǝpɑɩ nɑ pɑ́ hu ɩ wɑɑlɩ.

¹²Yesu kɑ wɛ ɩcɑtɛ nɑtǝlɩ tǝ tɑɑ, nɑ yʋlʋ wei tɔnʋɣʋ tɔɔ ɑsilimɑ kʋtɔŋ wɑɑsɑ ɩ tǝnɑ tɔ ɩ kɑ wɛ tǝnɑ. Ɩ nɑ Yesu ɩlɛnɑ ɩ́ polo nɑ ɩ́ hǝntɩ-ɩ ɑtɛ nɑ ɩ́ wiinɑ-ɩ tǝkpɛɛ sɩ: Tɑcɑɑ, ye n kɑ tisɑɣɑ n tɑɑ wɑɑsɩ-m?

¹³Ḿpʋ́ɣʋ́ Yesu kʋsɑ ɩ niŋ nɑ ɩ́ tokǝnɑ-ɩ nɑ ɩ́ tɔmɩ-ɩ sɩ: Teu mɑ tisɑɑ, ɑlɑɑfǝyɑ ɩ́ lɑ. Ḿpʋ́ɣʋ́ ɩ kʋtɔŋ tɛmɑ kpɑkpɑɑ.

¹⁴Ɩlɛnɑ Yesu kpɑɑlɩ-ɩ sɩ: Tɑɑ heeli nɔɣɔlʋ. Amɑ tɛɛ kpɑkpɑɑ nɑ kɔtʋlʋ nɑ-ŋ, ɩlɛnɑ ń yiɣisi ɩsɩɩ Moisi kɑ kɛɛsʋɣʋ tɔ, nɑ pǝ́ lɑ yǝlɑɑ kɛ ɑseetɑ.

¹⁵Pɑɑ nɑ mpʋ tɔ, ɩ hǝtɛ tɔŋnɑ yɑɑʋ nɑ pǝ puki, nɑ sɑmɑɑ kotiɣi ɩ kiŋ kɛ sɔsɔm sɔsɔm sɩ pɑ nɩɩkɩ ɩ sɛɣɛsʋɣʋ, nɑ ɩ́ wɑɑsǝɣɩ-wɛɣɛ pɑ kʋtɔmǝŋ.

¹⁶Amɑ ɩnɩ ɩ pukɑɣɑ wɑɑtʋ wɑɑtʋ kɛ timpi timpi yǝlɑɑ fɛɩ tɔ, nɑ ɩ sǝlǝmǝɣɩ Ɩsɔ.

¹⁷Kʋyɑkʋ nɑkʋlɩ Yesu sɛɣɛsɑɣɑ. Pǝ pɑmnɑ Fɑlisɑnɑɑ nɑ Ɩsɔ Tɔm sɛɣɛsǝlɑɑ mpɑ pɑ lɩɩnɑ Kɑlilee nɑ Yutɑ pɑ ɑcɑlɛɛ tǝnɑ tɑɑ nɑ Yosɑlɛm tɔ pɑɑ wɛ tǝnɑ nɑ pɑ cɑɣɑɑ. Nɑ Tɑcɑɑ tomɑ kɑ wɛ Yesu kiŋ nɑ ɩ lɑkɩ nɑ kʋtɔntʋnɑɑ hikiɣi ɑlɑɑfǝyɑ.

¹⁸Ḿpʋ́ɣʋ́ yǝlɑɑ sǝɣǝlɑ kʋtɔŋ kʋtʋʋlʋɣʋ tʋ nɔɣɔlʋ nɑ kpɑtǝlɛ, nɑ pɑ́ pɛɛkǝɣɩ sɩ pɑ́ tɑnɑ-ɩ Yesu kiŋ kɛ kutuluɣu tɑɑ nɑ pɑ́ sɩɩ-ɩ ɩ ɩsɛntɑɑ.

¹⁹Amɑ yǝlɑɑ sɑmɑɑ tɔɔ pɑ tɑ nɑ timpi tɔɔ pɑɑ sʋsǝnɑ-ɩ tɔ. Ɩlɛnɑ pɑ́ kpɑɑnɑ-ɩ lɔpʋtʋ tɔɔ nɑ pɑ́ wɛsɩ-tɩ, nɑ pɑ́ tisi ɩ́ nɑ ɩ kpɑtǝlɛ kɛ sɑmɑɑ hɛkʋ kɛ Yesu ɩsɛntɑɑ.

²⁰Wɑɑtʋ wei Yesu nɑ́ pɑ nɑɑni tɔ ɩ tɔmɑ sɩ: Mɑ tɑɑpɑlʋ, nyɑ́ ɩsɑɣɑtʋ hɩɩsɑɑ.

²¹Tǝnɑɣɑ Ɩsɔ Tɔm sɛɣɛsǝlɑɑ nɑ Fɑlisɑnɑɑ pɑ sʋʋ miituɣu sɩ: Aweɣelɛ ɩnɛ ɩnɩ nɑ ɩ́ kpɑkǝɣɩ ɩ tɩ nɑ ɩ́ kɛɛsǝɣǝnɑ Ɩsɔ? Awe pǝsǝɣɩ nɑ ɩ́ hɩɩsɩ ɩsɑɣɑtʋ, ye pǝ tɑɣɑ Ɩsɔ pɑɑsi?

²²Amɑ Yesu nɑ́ cɛkǝnɑ pɑ hʋwɛɛ, ɩlɛnɑ ɩ́ pɔɔsɩ-wɛ sɩ: Pepe tɔɔ kɛ́ ɩ́ hʋʋkɩ ḿpʋ́ɣʋ́ mǝ tɑɑ?

²³Nti tǝ yɔɣɔtʋɣʋ kǝlǝnɑ tǝlɛʋ? Nyɑ́ ɩsɑɣɑtʋ hɩɩsɑɑ, yɑɑ kʋlɩ nɑ ń tɔ?

²⁴Tɔʋ, mɑɑ hʋlɩ-mɛ sɩ Yʋlʋ Pǝyɑɣɑ mɑ́, mɑ pǝsǝɣɩ nɑ mɑ́ hɩɩsɩ ɩsɑɣɑtʋ kɛ ɑtɛ cǝnɛ. Tǝnɑɣɑ ɩ tɔmɑ kʋtɔntʋ sɩ: Kʋlɩ nɑ ń kpɑɣɑ nyɑ́ kpɑtǝlɛ nɑ ń kpe.

²⁵Tǝnɑɣɑ ɩ kʋlɑ kpɑkpɑɑ kɛ pɑ tǝnɑ pɑ ɩsɛntɑɑ, nɑ ɩ́ kpɑɣɑ kpɑtǝlɛ nte tǝ tɔɔ pɑɑ hɩɩsɑ-ɩ tɔ nɑ ɩ́ sɑŋ Ɩsɔ nɑ ɩ́ kpeŋ.

²⁶Ḿpʋ́ɣʋ́ pǝ lɑpɑ pɑ tǝnɑɣɑ piti kɛ́ sɔsɔm nɑ pɑ́ sɑŋ Ɩsɔ. Hɑlɩ pǝ́ lɑ-wɛɣɛ sɔɣɔntʋ nɑ pɑ́ cɑŋ pɑ́ yɔɣɔtɩ sɩ: Amɑ pʋwɛ, sɑŋɑ kɛ tɑ́ nɑ kɔkɔlɔ tɔm.

²⁷Ḿpʋ́ɣʋ́ Yesu lɩɩwɑ nɑ ɩ́ mɑɣɑnɑ lɑmpuu mʋlʋ nɔɣɔlʋ wei pɑ yɑɑ sɩ Lefii tɔ, nɑ ɩ́ cɑɣɑ ɩ lɑmpuu tǝmʋlɛ. Ɩlɛnɑ ɩ́ tɔmɩ-ɩ sɩ: Kʋlɩ nɑ ń tǝŋɩ-m.

²⁸Ḿpʋ́ɣʋ́ Lefii kʋlɑɑ nɑ ɩ́ yele pǝ tǝnɑ nɑ ɩ́ hu ɩ wɑɑlɩ.

²⁹Ḿpʋ́ɣʋ́ Lefii lɑpɑ-ɩ mʋʋllɛ kɛ teu kɛ ɩ tǝyɑɣɑ tɑɑ, nɑ pɑ́ nɑ lɑmpuu mʋlɑɑ pɑɣɑlɛ nɑ yǝlɑɑ lɛlɑɑ pɑ́ cɑɣɑ tɔɣɔʋ.

³⁰Ḿpʋ́ɣʋ́ Fɑlisɑnɑɑ nɑ pɛlɛ pɑ Ɩsɔ Tɔm sɛɣɛsǝlɑɑ pɑ kɔmɑ nɑ pɑ́ pɔɔsɩ ɩ ɩfɑlɑɑ kɛ ɩmiitɑʋ sɩ: Pepe tɔɔ kɛ́ mǝ nɑ lɑmpuu mʋlɑɑ nɑ ɑsɑɣɑɑ ɩ́ kpɛntɑ tǝtɔɣɔlɛ nɑ tǝnyɔɔlɛ?

³¹Amɑ Yesu cɔ-wɛ sɩ: Pǝ tɑɣɑ ɑlɑɑfǝyɑ nyǝ́mɑ nyɩɩlǝɣǝnɑ fɛtɑɑ, ɑmɑ kʋtɔntʋnɑɑ kɛ́.

³²Mɑ kɔmɑɣɑ sɩ mɑ heeliɣi ɑsɑɣɑɑ sɩ pɑ́ lɑɣɑsɩ, pǝ tɑɣɑ kʋpɑmɑ.

³³Ḿpʋ́ɣʋ́ yǝlɑɑ nɑpǝlɩ pɑ tɔmɑ Yesu sɩ: Yohɑɑnɩ ɩfɑlɑɑ nɑ Fɑlisɑnɑɑ nyǝ́mɑ pɑ hɔkǝɣɩ nɔɔsɩ kɛ tɑm nɑ pɑ sǝlǝmǝɣɩ pǝ wɑɑtʋnɑɑ, nɑ nyɑ́ nyǝ́mɑ nɑ́ɑ́ tɔkɩ nɑ pɑ́ nyɔɔkɩ yem.

³⁴Ɩlɛnɑ ɩ́ cɔ-wɛ sɩ: Ɩ́ kɑ́ pǝsɩ nɑ ɩ́ lɑ nɑ ɑkpɑɣɑlʋ tɑɑpɑlɑɑ hɔkɔ nɔɣɔ nɑ ɩ́ nɑ-wɛ pɑ́ wɛɛ? Aɑɩ.

³⁵Amɑ pɩɩ kɔɔ pǝ kɛɛsɩ kʋyɑkʋ nɑkʋlɩ, ɩlɛnɑ pɑ́ lǝsɩ-ɩ pɑ hɛkʋ, ɩlɛ wɑɑtʋ ɩnǝɣɩ pɑɑ hɔkɔ nɔɣɔ.

³⁶Ḿpʋ́ɣʋ́ ɩ tɑsɑ-wɛɣɛ ɩtuule kɛ tukuɣu tɔtɔ sɩ: Pɑɑ cǝlǝɣɩ pʋʋɣʋ kʋfɑlʋɣʋ tɔɔ nɑ pɑ́ tɔ kʋpǝnʋɣʋ. Pɑ́ lɑpɑ mpʋ, pɑ wɑkǝlɑ kʋfɑlʋɣʋ. Pǝyele sɑɑliyɑ kɑɑ mʋnɑ kʋpǝnʋɣʋ.

³⁷Nɔɣɔlʋ kɑɑ suu sʋlʋm kʋfɑm kɛ sʋlʋm huluŋ kʋpǝŋ tɑɑ, tɔfɔ sʋlʋm kʋfɑm yɑsǝɣɩ huluŋ kʋpǝŋ ɩnǝɣɩ nɑ pǝ ti nɑ huluŋ wɑkǝlɩ yem.

³⁸Amɑ huluŋ kʋfɑŋ tɑɑ kɛ́ pɑ suuki sʋlʋm kʋfɑm.

³⁹Yʋlʋ wei ɩ tɛmɑ sʋlʋm kʋpǝpɩɩm kɛ nyɔɔʋ tɔ, ɩ luɣu ɩɩ lɑkɩ ɑpilɑ. Pǝ tɑɣɑ pʋlʋ, kʋpǝpɩɩm kɛ yǝlɑɑ sɑŋ.