Luka 19:8-32

⁸A pai neh Zakkhaeus loh Boeipa taengah, “Boeipa, Ka khuehtawn he rhakthuem he khodaeng rhoek ka paek. Hlang khat khat kah hno khat khat ni ka rhawt pah bal atah rhaepli la ka thuung coeng he,” a ti nah.

⁹Te dongah anih te Jesuh loh, “Anih tah Abraham capa la a om van dongah tihnin ah tah khangnah loh he imkhui la pai coeng.

¹⁰Hlang Capa ha pawk he aka poci te toem ham neh khang ham rhoe pai ni,” a ti.

¹¹Jerusalem a pha tom vaengah a yaak neh Pathen kah ram a tueng hamla cai tomlael coeng tila a poek dongah nuettahnah pakhat te a thap tih a thui.

¹²Te dongah, “tongpa hlangtang pakhat tah, a ram loh ham kho hla la cet tih ha voei hamla cai.

¹³Te dongah a sal hlangrha te a khue tih mina lungrha te amih taengah a paek. Te phoeiah amih te, 'Amah ka pawk hil thimpom uh,' a ti nah.

¹⁴Tedae a pilnam rhoek loh anih te a hmuhuet uh. Te dongah amah hnukah laipai tloep a tueih uh tih, 'Kaimih soah a manghai ham he ka ngaih uh moenih,' a ti na uh.

¹⁵Ram te a loh tih amah ha mael vaengah tah tangka a paek a sal rhoek te amah taengla a khue metla a thimpom uh khaw ming hamla a dawt.

¹⁶Te vaengah aka pawk lamhma loh, 'Boeipa, nang kah mina pakhat te mina parha kum thil,' a ti nah.

¹⁷Te vaengah anih te, 'Then, sal then a yit dongah uepom la na om tih, kho parha soah saithainah aka khueh la om laeh,' a ti nah.

¹⁸Aka pawk pabae long khaw, 'Nang kah, mina loh mina panga a sak boeipa,' a ti nah.

¹⁹Anih khaw, 'Nang loh kho panga om thil van,' a ti nah.

²⁰Te phoeiah pakhat loh ha pawk tih, 'Boeipa, nang kah mina tah himbaica khuiah ka khueh tih ka tung he.

²¹Dikkhih dikkhaeh hlang la na om dongah namah khaw kang rhih. Na khueh pawt te na phueih tih na tuh pawt te na ah,' a ti nah.

²²Anih te tah, 'Na ka lamkah vanbangla nang taengah ol ka tloek ni, sal thae aw, kai he dikkhih dikkhaeh hlang la ka om te na ming coeng. Ka khueh pawt te ka poh tih ka tuh pawt te ka ah het a?

²³Te vaengah balae tih ka tangka te caboei dongla na tloeng pawh. Kai ka pawk vaengah a casai neh ka dang kolo mako,” a ti nah.

²⁴Te phoeiah aka pai rhoek te, 'Anih taengkah mina te lo uh lamtah mina lungrha aka khueh te pae uh,' a ti nah.

²⁵Te vaengah anih te, 'Boeipa, mina parha a khueh ta,' a ti na uh.

²⁶Nangmih taengah ka thui, Aka khueh boeih te a paek thil vetih, aka khueh pawt tah a khueh te khaw a loh pahni.

²⁷Tedae amih soah kai manghai sak ham ngaih pawh ka rhal rhoek te pahoi hang khuen uh lamtah ka hmaiah ngawn uh,' a ti nah,” te a thui pah.

²⁸Te te a thui phoeiah a hmai la cet tih Jerusalem la luei.

²⁹Olives tlang a ti uh taengkah Bethphage neh Bethany te vat a pha vaengah hnukbang panit te a tueih tih,

³⁰“Rhaldan kah kho la cet rhoi, a khuila na kun rhoi vaengah laakca a pael te na hmuh rhoi ni. Te soah hlang ngol noek pawt dae hlam lamtah hang khuen rhoi.

³¹khat loh nangmih rhoi te, 'Ba ham lae na hlam?' tila n'dawt atah, 'Boeipa loh a ngoe,' ti nah,” a ti nah.

³²Te dongah a tueih rhoi loh a caeh rhoi vaengah a ti nah bangla a hmuh rhoi.