Luka 19:8-32

⁸Motong la Sakias tani in imadit le lo ikodo, inbe iwete pang Tool Mai Yesu nen, “Tool Mai, kupalongo! Nookoot katai nga ole apoto so kiau le paru, lo ngan be akap kapala pang di tooltool yo ballingadi tiap nga. Inbe kumata le akaua lungunu ye tool atu be akap sokorai so ki nga, ngan ole araua so ki tina, inbe ikap so pai mulu panga ye so ki tina ngan kootoonoo.”

⁹Motong la Yesu iwete panga nen, “Nookoot katai nga ole Maro ipamulong kuye di tooltool le imot yo kuye di kayepe ye rumu i nga, ngan ye so dook tiap tani yo be igarungang i, yesoo ong i kutara lom medana panga, le ong i ben sasa ke Apram moolmool nga.

¹⁰Ngan awete nen, yesoo Tool Moolmool ke Maro isi tana i nga, ngan be si isere di tooltool yo tilledi nga, a nen ngan ikap di a ipamulu di ye so dook tiap yo be igarung di i.”

¹¹Di tooltool malala mai tina yo tigaua nga, ngan titar talngadi a tilongo betanga ke Yesu yo iwetewete nga. Ngan tina Yesu ipa a ilo potai pang ye malala mai Yerusalem nga, ngan le di tooltool tina tiyeisa lal yo Maro itaru be matan kala di tooltool ki ye i, in la o iman potai koot i.

¹²Ngan nen le Yesu ikatte betanga atu pang di nen, “Tool mai atu, in nga be idu pang ye tana mai atu yo iken ni mooloo i, ngan idu be du titaru a iyei tool kuto mai yo be matan kala di tooltool ki, lo ngan be imulu a ilong pang ye malala ki kooti.

¹³Le nga ye kene yo be imadit a ipa ye in nga, ngan ikiu di kapraingi ki yo sangaul atu nga, ngan man tigaua. Motong la ikap pat yo ene gol  ngan sangaul a imalimi di atu atu ye, inbe iwete pang di nen, ‘Pat yo akap pang koot nga, ngan be la kayei urata ke kaungu pat ye le le amulu a along.’

¹⁴“Bong ngan tool mai tani in di tooltool ke malala lono ki, lodi dook mata panga tiap. Le nga ipa a imuku, motong la tiwanga di tooltool kidi pattu a titoo be du tiwete pang di tooltool maimai ke tana mai tani yo be idu ye in nen. Tiyei ne, ‘Am nga lomam be katara tool in a iyei kuto mai pam, inbe matan kalam tiap.’

¹⁵“Bong ngan di tooltool maimai ke tana mai tani in lodi be tilongo betanga kidi tooltool tina tiap. Le nga titara tool tani a be iyei tool kuto mai pang di, motong la imulu a ilong pang malala ki nga. Ilong, motong la iwanga pang di kapraingi ki tina yo muku ngan ikap pat pang di nga, ngan be timan. Ya in lono be itor tomonai di ye pat ki tina yo ikap pang di nga, ngan tiyei urata ke kaungu pat ye, a nen ngan tikap sa mulu la ye lapau, too tiap?

¹⁶“Le nga kapraingi ki yo iman muku i, in iman le man iyei ne, ‘Tool mai, au i ayei urata ye pat kiong tani yo kouu pau i, ngan le akap pat sangaul atu mulu la ilo pono nga.’

¹⁷“Motong la tool kuto mai tani in iyei ne, ‘Ona, ong i kapraingi dook mata! Ong in kuyei urata dook mata ye so mitiap tani yo akauu pong i, ngan le matam kala dook mata san. Ngan nanga, ole atarong be kuyei tool mai atu a be nen ngan matam kala malala maimai sangaul atu.’

¹⁸“Motong la kapraingi san yo itoo i, in iman le man iyei ne, ‘Tool mai, au i ayei urata ye pat kiong tani yo kouu pau i, ngan le akap pat limi mulu la ilo pono nga.’

¹⁹“Le nga tool kuto mai tani in iwete panga nen, ‘Dook mata, ole atarong be kuyei tool mai atu a be nen ngan matam kala malala maimai limi.’

²⁰“Motong la kapraingi tina ngan san mulu iman le man iyei ne, ‘Tool mai, pat kiong tani yo kouu pau i, in bi. Kumata nga, aduku ye wam, motong la atarkoo dook mata a iken nga,

²¹yesoo ong i tool gadagadam le au i atattadai ong. Kanakana ngan ong i kop sokorai pat kidi diem yo titar nga, inbe kugamagama kaningi ke kumu yo di diem tikapki, ngan lapau.’

²²“Motong la tool kuto mai tani in iwete panga nen, ‘Ona, ong i kapraingi dook tiap sa! Betanga kiong yo nookoot ong taum kuwete nga, ngan ipaposong ye urata dook tiap kiong oo. Le ole ayemenai ong ye. Yesoo, ong i lom galanga yau be au i tool gadagadak, inbe kanakana ngan au i akap sokorai pat kidi diek yo titar nga, inbe agamagama kaningi ke kumu yo di diek tikapki, ngan lapau.

²³Le be nen nga, ngan yelei a kutara pat kiau i ilo ye rumu ke tarungu pat, tiap nga? Kumata be kuyei nen nga, ngan la be pat kiau tani idik mulu pang ete, a be nen ngan amulu a along nga, ngan akaua pat kiau tani le ipa ye pat yo be titar ilo pono mulu nga.’

²⁴“Motong la tool kuto mai tani in iwete pang di tooltool yo tikodo potai pang ye ngan nen, ‘Kakaua pat in ye tool in, inbe kakauu pang tool yo pat ki sangaul atu i.’

²⁵“Ngan di tooltool tina ngan tiyei ne, ‘Tool mai, ngan dook mata, bong tool ni pat yo ikap koot ngo sangaul atu oo!’

²⁶“Motong la tool kuto mai tani in iyei ne, ‘Awete pang nen, di tooltool yo so kidi nga, ngan ole akap so sa mulu pang di. Bong tool yo taukan so i, in so kasin yo be ikap nga, ngan ole akap ye.

²⁷Bong di koi kiau yo lodi be ayei tool kuto mai a matak kala di tiap nga, ngan kakap di le timan matak i, inbe man karaumatamata di le imot a timmata.’ ”

²⁸Yesu ikatte betanga nen pang di a imot, motong la imadit ye panga mulu a itoo dada be ilo pang Yerusalem nga.

²⁹Yesu iye di galiunu titoo dada a be tilo pang malala mai Yerusalem nga, ngan tipa le tilo potai ye malala Betpage inbe Betani yo iken ye kawal yo ene Olip in madini nga. Motong la Yesu iwanga di galiunu tina ngan ru,

³⁰inbe iwete pang di nen, “Angru kamuku a kalo ye malala yo iken pang dama i. Ngan kumata be kapa le lo pombe nga, ngan ole kakamata asara ke solanga di tooltool yo ene donki i, in kase paunu atu yo tiwatu i. Ngan donki tani in tool sa iwur pono a idada ye pitiao. Lo ngan be angru karu ooroo ki, inbe kadede a kasi.

³¹Le kumata be tool sa ikamatang le itorang nen, ‘Ai, nga yelei a karu ooroo ke donki in nga?’ ngan kawete panga nen, ‘Tool Mai be iyei urata ki ye ngan.’ ”

³²Motong la di galiunu ru tina yo iwanga di nga, ngan timuku a tilo ngan le lo yaru tikamata so dawa ben tina yo Yesu iwete pang di ye nga.