Luku 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Pǝlɛ pǝ wɑɑlɩ Tɑcɑɑ tɑsɑ ɑpɑlɑɑ nɩɩtoso nɑ nɑɑnʋwɑ nɑ nɑɑlɛɣɛ lǝsʋɣʋ, nɑ ɩ́ tili-wɛɣɛ nɑɑlɛ nɑɑlɛɣɛ ɑcɑlɛɛ nɑ timpiwɛ ɩ wɛɛ sɩ ɩ puki tɔ.

²Nɑ ɩ́ heeli-wɛ sɩ: Kʋmtʋ tɔɔwɑɣɑ, ɑmɑ kʋntɑɑ fɛɩnɑ. Ɩ́ sǝlǝmɩ hɑtʋcɛ nɑ ɩ́ sɔɔsɩ kʋntɑɑ kɔnɑʋ kɛ lɔŋ kɛ ɩ kʋmtʋ tɑɑ.

³Tɔʋ, ɩ́ polo, ɩsɩɩ mɑ tiluɣu-mɛ ɩsǝntɔ tɔ, ɩ́ pǝsɑɑ kɛ́ ɩsɩɩ heeŋ kɛ tɑɑlɛ hɑsɩ hɛkʋ.

⁴Ɩ́ tɑɑ kpɑɣɑ liɣitee yɑɑ huluɣu, ɩ́ tɑɑ kpɩ ntɑŋkpɑlɑ, pǝ́cɔ́ ɩ́ tɑɑ pɑɑsǝnɑ yǝlɑɑ sɛɛʋ kɛ mpɑɑʋ tɑɑ.

⁵Ye ɩ́ sʋʋ tǝyɑɣɑ ŋkɑ kɑ tɑɑ ɩ́ kooliɣi sɩ: Alɑɑfǝyɑ ɩ́ tɔɔ tǝyɑɣɑ kɑnɛ kɑ tɔɔ, nɑ pǝ́cɔ́.

⁶Ɩlɛ ye pǝ kɛ́ sɩ tǝyɑɣɑ tʋ sɔɔlɑ ɑlɑɑfǝyɑ, mǝ koolee ɑnɩ ɑ kɑ tǝŋɩ-ɩ. Tɔfɔ ye pǝ tɑɣɑ mpʋ, kʋlʋmɑɑ mɛ mǝ tɔɔ kɛ́ mǝ koolee ɑnɩ ɑ tɑɣɑnǝɣɩ mǝlʋɣʋ.

⁷Ɩ́ cɑɣɑ tǝyɑɣɑ ŋkɑ kɑ tɑɑ nɑ pɑ́ cɛlɑ-mɛɣɛ mpi, ɩ́ tɔɣɔ nɑ ɩ́ nyɔɔ. Pǝ tɑɣɑ pʋlʋ, tǝmlɛ tʋ mʋnɑ pɑ́ fɛlɩ-ɩ kɛ́. Ɩ́ tɑɑ lɑɣɑsǝɣɩ tɛɛsɩ kɛ yem yem.

⁸Pɑɑ ɩcɑtɛ nte tǝ tɑɑ kɛ́ ɩ sʋʋwɑ nɑ pɑ́ mʋ-mɛ nɑ pɑ́ cɛlɑ-mɛɣɛ pʋlʋ, ɩ́ tɔɣɔ.

⁹Ɩ́ wɑɑsɩ pɑ kʋtɔntʋnɑɑ, nɑ ɩ́ heeli-wɛ sɩ: Ɩsɔ Kɑwulɑɣɑ sʋʋ mǝ tɛɛ kɛ́.

¹⁰Ye ɩ́ sʋʋ ɩcɑtɛ nte tǝ tɑɑ nɑ tǝ yǝlɑɑ ɩ́ tɑ mʋ-mɛ, ɩ́ lɩɩ nɑ ɩ́ tɔ sɩ:

¹¹Tǝ kpiisiɣi mǝ tɔɔ kɛ́ mǝ mɑɣɑmɑɣɑ mǝ ɩcɑtɛ mʋsʋɣʋ ŋku kʋ tɑɑnɑ tɑ nɔɔhɛɛ tɔ. Ɩlɛ pɑɑ nɑ mpʋ, ɩ́ nyɩ teu kɛ́ sɩ Ɩsɔ Kɑwulɑɣɑ sʋʋ mǝ tɛɛ mǝ tɛɛ nɑ kɑ́ lɩɩ.

¹²Mɑ heeliɣi-mɛ sɩ Sɔtɔm kɑ́ lɑ sɑnɑ nɑ ɩcɑtɛ ntɛɣɛ tǝnɑɣɑ hʋʋlɛ wule kɛ suulu hʋlʋɣʋ tɔm tɑɑ.

¹³Hɑɩ, Colɑsɛŋ nyǝ́mɑ mɛ, mǝ tɔm wɛ wɑɩyo. Hɑɩ, Pɛtɛsɑitɑ nyǝ́mɑ mɛ, mǝ tɔm wɛ wɑɩyo kɛ́. Piti tǝmɑ nnɑ pɑ lɑpɑ-yɛɣɛ mǝ hɛkʋ tɑɑ tɔ, ye ɩsɩɩ ɩsǝntɔ Tiii nɑ Sitɔŋ kɛ pɑɑ lɑpɑ-yɛ, pɑɑ tɛmɑ pɑ ɩsɑɣɑtʋ lɔʋ kɛ lɔŋ, hɑlɩ pɑ́ suu fɔlǝtɔnɑɑ nɑ pɑ́ cɑɣɑ hulɑ tɑɑ.

¹⁴Pǝ tɔɔ kɛ́ pɑɑ hʋlɩ suulu kɛ Tiii nɑ Sitɔŋ pǝ nyǝ́mɑ kɛ hʋʋlɛ kʋyɑkʋ wule nɑ pǝ kǝlɩ-mɛ.

¹⁵Pǝ kɑɑsʋɣʋ Kɑpǝnɑhum nyɑ́ tɔ, n hʋʋ sɩ n kɑ́ pɩɩ nɑ ń kɑlǝsǝnɑ hɑtoo ɩsɔtɔnʋɣʋ nɑ? Amɑ pɑɑ tisi-ŋ kɛ́ tǝfɛ kɛ tuu tǝnɑɑsǝlɛ sɔsɔɔlɛ tɑɑ.

¹⁶Ḿpʋ́ɣʋ́ ɩ tɑsɑ ɩ ɩfɑlɑɑ kɛ heeluɣu sɩ: Yʋlʋ ɩ́ nɩɩkǝnɑ-mɛ, mɑɣɑ pʋntʋ nɩɩkǝnɑ. Wei ɩ́ kisɑ-mɛ, mɑ ɩnɩ tɔtɔɣɔ pʋntʋ kisɑɑ. Nɑ wei ɩ́ kisɑ-m, ɩ́ kisɑ wei ɩ tilɑ-m tɔɣɔ.

¹⁷Ḿpʋ́ɣʋ́ pɑ nɩɩtoso nɑ nɑɑnʋwɑ nɑ nɑɑlɛ mǝlɑ ɩ kiŋ nɑ lɑŋhʋlʋmlɛ sɔsɔɔlɛ, nɑ pɑ́ tɔŋ sɩ: Tɑcɑɑ nyɑ́ tɔɔ ɑlɔɣɑɑ mɑɣɑmɑɣɑ nɩɩnɑ-tʋ.

¹⁸Tǝnɑɣɑ Yesu tɔmɑ-wɛ sɩ: Mɑ nɑwɑ Sɑtɑnɩ nɑ ɩ́ hotiɣinɑ ɩsɔtɑɑ ɩsɩɩ tɛʋ nyǝɣǝsʋɣʋ tɔ.

¹⁹Ɩlɛ mɑ hɑ-mɛɣɛ tomɑ sɩ ɩ́ tɔ tʋmɑɑ tɔɔ, nɑ pǝcɛsɩ tɔɔ, nɑ kolontu tomɑ tǝnɑ tɔɔ, pʋlʋ kɑɑ lɑ-mɛ.

²⁰Ɩlɛ pɑɑ nɑ mpʋ mǝ lɑŋɑ ɩ́ tɑɑ hʋlǝmɩ sɩ ɑlɔɣɑɑ se-mɛ. Amɑ ɑ hʋlǝmɩ kɛ́ sɩ pɑ ŋmɑɑ mǝ hǝlɑ kɛ ɩsɔtɑɑ tɔ pǝ tɔɔ.

²¹Tǝnɑɣɑ Feesuɣu Nɑŋŋtʋ lɑpɑ nɑ Yesu lɑŋlɛ hʋlǝmɩ sɔsɔm. Ɩlɛnɑ ɩ́ tɔ sɩ: Mɑ Cɑɑ, ɩsɔtɑɑ nɑ ɑtɛ pǝ tʋ, mɑ sɛɛ-ŋ. N ŋmɛsɑ tɔm tǝnɛɣɛ lǝmɑɣɑsɛɛ nyǝ́mɑ nɑ nyǝntɑɑ, ɩlɛnɑ ń kuli-tǝɣɩ piyɑ. Mɑ Cɑɑ, pɔpɔtʋ fɛɩ, mɑ sɛɛ-ŋ, nyɑ́ ɩnɩ nyɑ́ luɣu tɩɩ lɑpǝnɑ mpʋ.

²²Amɑ mɑ Cɑɑ cɛlɑ-m pǝ tǝnɑɣɑ. Ye pǝ tɑɣɑ mɑ Cɑɑ tike, nɔɣɔlʋ tɑ nyɩ sɩ ɑweɣelɛ Pǝyɑlʋ. Nɑ ye pǝ tɑɣɑ Pǝyɑlʋ tike, nɔɣɔlʋ tɑ nyɩ sɩ ɑweɣelɛ Cɛcɛ. Aŋhɑ, ye Pǝyɑlʋ nɔkǝnɑɑ sɩ ɩ hʋlǝɣɩ wei pǝ pɑɑsi.

²³Ḿpʋ́ɣʋ́ ɩ pǝsǝnɑ ɩ ɩfɑlɑɑ tike tɔɔ nɑ ɩ́ tɔ-wɛ sɩ: Mpi mpi mǝ ɩsǝpee nɑɑkɩ ɩsǝntɔ tɔ, leleŋ kɛ ɩ́ nɩɩwɑ.

²⁴Mɑ heeliɣi-mɛ sɩ, Ɩsɔ kʋyɔɣɔtʋtʋ tɛlǝsǝlɑɑ pɑɣɑlɛ nɑ ɑwulɑɑ sɔsɑɑ pɑɣɑlɛ nyɩɩlɑɑ sɩ pɑ́ nɑ́ mpi mǝ nɑɑkɩ ɩsǝntɔ tɔ, nɑ pɑ́ lɑŋ. Pǝyele pɑ nyɩɩlɑɑ tɔtɔ sɩ pɑ́ nɩɩ nti mǝ nɩɩkɩ tɔ, nɑ pɑ́ kpisi.

²⁵Ḿpʋ́ɣʋ́ Ɩsɔ Tɔm sɛɣɛsǝlʋ nɔɣɔlʋ ɩ kʋlɑɑ sɩ ɩ mɑɣɑsǝɣɩ Yesu. Ɩlɛnɑ ɩ́ tɔ sɩ: Tɑcɑɑ, ntiɣi mɑ́ lɑ nɑ mɑ́ hiki weesuɣu ŋku kɩɩ tɛŋ tɔ?

²⁶Yesu cɔ-ɩ sɩ: Susuweɣe pɑ ŋmɑɑ Ɩsɔ Tɔm tɑɑ? Nɑ n kɑlǝɣɩ tɔ, hʋwɛɛ nnɑɣɑ n nɩɩkɩ pǝ tɑɑ?

²⁷Ɩlɛnɑ ɩ́ cɔ-ɩ sɩ: Mɑ nɩɩkɩ sɩ n kɑ́ sɔɔlɩ Tɑcɑɑ nyɑ́ Ɩsɔ nɑ luɣu kʋlʋmʋɣʋ nɑ nyɑ́ lǝsɑɣɑ sʋʋ-ɩ tǝmɑmɑm kɛ pɑɑ mpi pǝ tɑɑ, nɑ n sɔɔlɩ nyɑ́ tɔɣɔntǝlɛ ɩsɩɩ nyɑ́ tɩ.

²⁸Ḿpʋ́ɣʋ́ Yesu tɔmɑ-ɩ sɩ: Amɑ n cɔ teu. Aŋhɑ, lɑkɩ mpʋ, n kɑ hiki weesuɣu.

²⁹Ɩnɩ ɩ cɑɑkɑɣɑ sɩ pɑɑ nɑ mpʋ ɩ tɔm ɩ te, ḿpʋ́ɣʋ́lɛ ɩ tɑsɑ Yesu kɛ́ pɔɔsʋɣʋ sɩ: Nɑ ɑweɣelɛ ɩsɩɩ mɑ tɔɣɔntǝlɛ ɩnɩ ɩlɛ?

³⁰Ḿpʋ́ɣʋ́ Yesu cɔ-ɩ sɩ: Tɔʋ, yʋlʋ nɔɣɔlʋ ɩ lɩɩnnɑ Yosɑlɛm nɑ ɩ́ pukinɑ Yeliko, nɑ ɩ́ lɩɩ ŋmɩɩlɑɑ tɔɔ nɑ pɑ́ kpɑ-ɩ nɑ pɑ́ wɔɣɔsɩ ɩ wontu nɑ pɑ́ mɑpɩ-ɩ ɩsɩɩ ɩsǝnɑ mpi pǝ wɛɛ tɔ. Ɩlɛnɑ pɑ́ tɛɛ pɑ yele-ɩ nɑ ɩ́ kɑɑsɑ weesuɣu kʋlʋmʋɣʋ.

³¹Pǝ pɑmnɑ kɔtʋlʋ nɔɣɔlʋ nɑ́ tǝŋɑɣɑ mpɑɑʋ ŋkʋ. Ɩ́lɛ́ ɩ nɑ-ɩ, ɩlɛnɑ ɩ cɔlɔ nɑ ɩ́ tɛɛ.

³²Ḿpʋ́ɣʋ́ Lefii tʋ nɔɣɔlʋ nɑ́ tɑlɑɑ nɑ ɩ́ mɑɣɑnɑ-ɩ mpʋ. Ɩlɛnɑ ɩ́lɛ́ ɩ cɔlɔ tɔtɔ nɑ ɩ́ tɛɛ.

³³Amɑ Sɑmɑlii tʋ tɔntʋ nɔɣɔlʋ nɑ́ tɑlɑ tǝnɑ nɑ ɩ́ nɑ ɑpɑlʋ ɩnɩ, ɩlɛnɑ ɩ tɔm lɑpɩ-ɩ pǝtɔɔtǝlɛ kɛ sɔsɔm.

³⁴Ḿpʋ́ɣʋ́ ɩ hɛlɑ ɩ kiŋ, nɑ ɩ́ tɑɑ nim nɑ kɔɔlɛ kɛ ɩ hiŋ tɑɑ. Ɩlɛnɑ ɩ́ kpɛɛlɩ-ɩ sɑɑlɑsɩ, nɑ ɩ́ cɑɣɑsɩ-ɩ ɩ kpɑŋɑɣɑ tɔɔ, nɑ ɩ́ ponɑ-ɩ mʋʋlɑɑ tǝsʋʋlɛ nɑ ɩ́ pɑɑsǝnɑ-ɩ teu.

³⁵Kʋ femɑ ɩlɛnɑ ɩ́ lǝsɩ liɣitee nyǝɣǝtʋ nɑɑlɛ nɑ ɩ́ cɛlɑ mʋʋlɑɑ tǝsʋʋlɛ tʋ, nɑ ɩ́ heeli-ɩ sɩ: Pɑɑsǝnɑ-ɩ teu, nɑ ń tɩɩ tɔɣɑ ɩ nyʋɣʋ tɔɔ nɑ pǝ tɛɛ mpʋ, mɑ kɔmɑ, mɑɑ fɛlɩ-ŋ yoo.

³⁶Tɔʋ, pɑ tooso ɩnɩ pɑ tɑɑ, ɑweɣe n hʋʋ sɩ ŋmɩɩlɑɑ mɑpɑ wei ɩnɩ tɔ ɩ tɔɣɔntǝlɛ ɩlɛ?

³⁷Ɩlɛnɑ Ɩsɔ Tɔm sɛɣɛsʋlʋ ɩnɩ ɩ cɔ-ɩ sɩ: Wei ɩnɩ ɩ lɑpɑ-ɩ kʋpɑntʋ tɔ. Mpʋɣʋlɛ Yesu sɩ: Tɔʋ, polo nɑ nyɑ́ mɑɣɑmɑɣɑ ń lɑkɩ mpʋ.

³⁸Yesu nɑ ɩ ɩfɑlɑɑ pɑ tɔŋnɑ pote, ɩlɛnɑ pɑ́ tɑlɑ ɩcɑtɛ nɑtǝlɩ nɑ ɑlʋ nɔɣɔlʋ ɩ́ lɑpɩ-ɩ mʋʋllɛ. Pɑ yɑɑ ɑlʋ ɩnɩ sɩ Mɑlǝtɑ.

³⁹Ɩ wɛnɑ neu, pɑ yɑɑ-ɩ sɩ Mɑlɩ. Ɩ́lɛ́ ɩ kɑ cɑɣɑ Tɑcɑɑ nɔɔhɛɛ tɛɛ kɛ́ nɑ ɩ́ nɩɩkɩ ɩ sɛɣɛsʋɣʋ.

⁴⁰Tɑɣɑ tɔɔ tǝmɑ kpǝpɑ Mɑlǝtɑ, ɩlɛnɑ pǝ pɛkǝlɩ-ɩ ɩ tɑɑ. Ḿpʋ́ɣʋ́ ɩ kɔmɑ Tɑcɑɑ kiŋ nɑ ɩ́ tɔ sɩ: Ɩsɩɩ mɑ neu yeluɣu-m mɑ tike nɑ mɑ́ cɔɔkǝnɑ tɑɣɑ kɛ ɩsǝntɔ ɩnɩ tɔ pǝ wɛ-ŋ teu ntɛ́ mɑ cɛ? Pǝlɛ pǝ tɔɔ tɔ, heeli-ɩ sɩ ɩ́ sǝnɑ-m.

⁴¹Mpʋɣʋlɛ Tɑcɑɑ nɑ́ cɔ-ɩ sɩ: Hɑɩ, Mɑlǝtɑ, n kʋɣɩ nyɑ́ tǝɣɩ yem kɛ́ nɑ ń kpetiliɣinɑ tǝmɑ pɑɣɑlɛ.

⁴²Pǝyele mpi pǝ wɑɑsǝɣɩ tɔ pǝ kɛ́ kʋlʋmǝm tike kɛ́. Mɑlɩ lǝsǝnɑ tǝpɑntɛ, ɩ́ nɑ nɔɣɔlʋ pɑ kɑɑ hɔ.