8O Sakias i tur ra i watungi tan a Labino lena, “Tama i, Labino, ara kukur utna tagun anung a ululeng an tabor a kum sibo na taro nami. Ra a sa toro pas lako utna tan taio, an balu meleti toromi a wat na dino.”
9Ra o Iesu i watungi tan o Sakias lena, “Uniri, di sa ulaun pas det ra det kis una rumu ri, uni o Sakias kai tagun a kum tumtubun o Abaram.
10Uni a Nutun a Musano i wanpat sur in sisio sur det ra det raro ma in ulaun pas det.”
11A taro det longoro a kum wasiso ri, ra det nuki lena a matanitu anun o God in nanpat lakit, uni o Iesu i sa milau o Jerusalem. Ra i watungi kai ara wasiso elelar
12lena, “Ara mugumugu i wan sur ara tamon bakbak, sur din mulaot tari sur in king, ra numur in milet melet.
13Numugu tan anun a inawan, i kabo pas anun a noino tultul toromi, ra i pitar tar ara noino mani tandet, ra i watungi lena, ‘Mot in ulabo i, tuk ra an milet melet.’
14Ikut a taro tagun anun a tamon det ngeti, ra det tulu ru ara taro sur det in muri, ma det watungi lena, ‘Ka met nem a musano ri sur in king anumet.’
15“Ra di sa ukis tari sur in king, i milet melet. I itula sur anun a kum tultul ra i pitar tar a mani tandet, sur in mananos un asau ra i sa wanpat una anundet a pinapam.
16Ma a mugano i wan toromi ra i watungi lena, ‘Labino, a sa ulabo melet pas a noino tagun anum a mani.’
17I balu i lena, ‘Wakak sakit, ui a wakak na tultul! An ubek tar ui sur un tamtamabat a noino lamlabino tamon, uni u lingmulus una nat na utna.’
18Ara bulung i wan toromi ra i watungi lena, ‘Labino, a sa ulabo melet pas a limo tagun anum a mani.’
19Ra i balu i lena, ‘Ui kai un tamtamabat a limo na lamlabino tamon.’
20Ma ara tultul bulung i wan toromi ra i watungi tano lena, ‘Labino, anum a mani i melet mo ri, a pulus tari namin namalu ra a ubek eno wakak tari.
21A ngaran ui, uni ui a tene ngalngalia. U los a utna ra awu sur u ubek tari, ma u ser pasong pas a utna ra ko marut tari.’
22A labino i watungi tano lena, ‘Ui a laulau na tultul, an warkurai ui elar nama num a wasiso ut. U sa tasman tari lena iau a tene ngalngalia. A ser los a utna ra awu sur a ubek tari, ma a pasong a utna ra ka marut tari.
23Ilai ra ko ubek tar anung a mani una beng sur an los pas anung a mani ma tu sibano kai una bung ra an nanpat uni?’
24“Ra i watungi tandet ra det tur milau taru tiro iai lena, ‘Mot in los ru a mani gusuni, ma mot in pitar tari torom o naro ra anun ara noino.’
25Ma det watungi tano lena, ‘Labino, i anun ara noino kura mo tano.’
26I balu det lena, ‘A watungi tamot, osi ra a susut kura tano, din tabor meleti nama susut. Ikut osi ra kalako, din rakon ru i utkai asau lik ra kura tano.
27“‘Ra mot in ben pas anung a kum ebar ra ka det nemi sur an king anundet, mot in um doko det nin ut umatang.’”
28Ra o Iesu i sa watung tar a wasiso elelar ri, i mugu melet usapat o Jerusalem.
29Ra i wan milau o Betpage ma o Betani una tangai di watungi nama Tangai na Oliw, i tulu aru tagun anun a kum nat na ususer, nama wasiso lenri,
30“Mur in nan sur a tamon kusa numugu tamur. Ra mur in nanpat, mur in tama ara barman na dongki kura di sa ker ukai tari, ma katutaio utmakai i kas taru uni. Mur in palos pasi ma mur in beni urin.
31Ra taio in ting mur lena, ‘Mur palosi sur asau?’ mur in watungi tano lena, ‘A Labino i nemi.’”
32Der wan ra der pastorom a kum utna rop ra o Iesu i sa watung tari tander.
Luk 19
Luk 19:8-32