Lucangundru 19:8-32

⁸Zachäus karakararina wonti ja Kaparani jatana wonti: “Mai, Kaparajai, poto jura ngakani ngato wangiwangini jinkiai; ja ngani kana kulnundru palpa ngukingukipaterina warai, ngato nunkangu pota mandru mandru morla jinkina tikai.”

⁹Jesus nunkangu jatana wonti: “Karari nunkangupini pungani murla pantjina warai, ngangau nauja bakana Abrahamani ngatamura nganai.

¹⁰Ngangau Kanaia Ngatamura wokarana wonti wontila, ja kulkala, mina tintaterina warai.”

¹¹Tanali jenia ngarana, Nau jeribaka jaura kulno morla jatana wonti, ngangau Nau Jerusalemingu karakara nganana wonti, ja ngangau tanali ngundrana wonti Godaia milila nurujeli wondraterinanto.

¹²Nau jatana wonti: “Kana pirna mita woritaia palkana wonti nunkangu milila manila ja nakaldra tikala.

¹³Nulu mili nunkani marapratjana karkana wonti, ja nulu tanangu niardatandra pirna marapratjana jinkina wonti ja tanangu jatana wonti: “Jinkimalianimai ngani wokaranantulu.”

¹⁴Kana wolara nunkani nunkangu kalakalarina wonti, ja nunkangu ngadani mili palpa jinpana wonti ja jatana wonti; “Ngaiani wata ngantjai, naupini ngaianingu kapara nganananto.”

¹⁵Ja jendranguta nau matja tikana ja milila matja manina, nulu jirijiribana wonti tananapini mili nunkangu karkala, tanangu nulu mardatandra matja jinkina; ngangau nulu ngujamananto warle palpa jinkimalinala.

¹⁶Ngoperala terkana wonti ja jatana wonti: “Kaparajai, mardatandra pirnali jinkanali niardatandra pirna marapratjana morla ngokana warai.”

¹⁷Ja nau nunkangu jatana wonti: “Matja, jidni mili ngumu, ngangau jidni talku nganana warai wakawakani, ngu-rula ngamalkau ngura marapratjanani.”

¹⁸Mili mandrula wokarana wonti ja jatana wonti: “Kaparajai, mardatandra pirnali jinkanali niardatandra pirna mara wora morla ngokana warai.”

¹⁹Nau bakana nunkangu jatana wonti: “Bakana jidni kapara nganananto ngura mara worani.”

²⁰Ja kulno morla wokarana wonti ja jatana wonti: “Kaparajai, najiau mardatandra pirna jinkani, ninapini ngato katieli karana ngamalkana warai;

²¹Ngangau ngani jinkangundru japali nganana warai, ngangau jidni kana ngurunguru nganai; jundru maniai, mina jundru wata kuranala, ja kampai, mina jundru wata jaupanala.”

²²Nau nunkangu jatana wonti: “Jinkani man andru ngani jinkangu kalala jatai, jidni mili madlentji! Jidni milkila nganana warai ngani kana ngurunguru nganai, ngato maniai, mina ngato wata kuranala, ja kampai, mina ngato wata jaupanala.

²³Ja minandru jundru mardatandra ngakani wata mardatandrajinkimalinietjani jinkina warai? Ngangau ngato wokaranani nina kalalanto maninanto.”

²⁴Ja tanangu naka terkanani Nau jatana wonti: “Nunkangundru ninaia mardatandra pirna manianau, ja ninaia nunkangu jinkianau, nulia mardatandra pirna marapratjana ngamalkai!”

²⁵Ja tana nunkangu jatana wonti: “Kaparajai, nulia mardatandra pirna marapratjana ngamalkai!”

²⁶Ngangau ngani jurangu jatai: “Nunkangu, nulu ngamalkai, tanali jinkila nganai; nunkangundru, nulu wata ngamalkai, tanali bakana jenia manila nganai, mina nulu ngamalkai.

²⁷Tanapini talpala ngakani, tanali wata ngantjana warai, ngani tanangu kapara nganananto, ninkida wokaralkanimai, ja ngakangu milkini nandranimai!”

²⁸Ja Nau jenia matja jatana, Nau ngopera Jerusalemia taringana wonti.

²⁹Jendranguta Nau Bethphage ja Bathania ngurani wokarana, nunkangu mardawonpani, nina tanali dikai maninindri mardawonpa, nulu mili mandru nunkani jinpana wonti,

³⁰Ja jatana wonti: “Wapalumai nunkangu ngura wakankari, ja judla jerra wirina, judla donki kuparu workamantraterinani mankamankala nganai, nunkangu wata kana kulno dukaterinala; nina dukaralumai ja tikalkalumai!

³¹Ja kulnujeli judlana jakalkanani: “Minandru judla ninaia dukarai?” Jeruja judla nunkangu jatala nganai: “Kaparali ninaia ngamalkananto.”

³²Pudla mili wulu wapana wonti, ja jeruja mankamankana wonti, worderu Nau pudlangu jatana warai.