Luk 19:8-32

⁸Tama Sakius doligulama, agai te Genuai Bidi Jisasbolo te po wai, “Genuai Bidi, suao. Eno masigi dabe, doado bage tigidali si bugwaibao. Si bugulama, nai meni yai we bidi dobawaibao. Tama bidi mebolo eno ili po olama, agai nai wi sali da, tama megi te nai eno me si me si elama, wei ponaibao,” wali.

⁹Te Jisasgo te bidi Sakiusgo wali po odama, tama Jisasgo te po wali, “Megi tama Godigo e bede bidibo we bidi tau mayu, ma sali. Magi baso meni. E bidi da te polobadu bidali nogi yai bidi Abrahamgo ogwa mu dao. Polobadu Abrahamgo Godigo wali po odama, agai mu koneani, tia sali. Megi me, eno wali po odama, nago mu konealualio, tia sali.

¹⁰Ena Godigo Bidi Mu da, tama Godigo ena tagala palobaso, ena asali. Te olo hagawai we bidi eno gegi asai, te eno augwali tau mayu, ma somainu ebao,” Jisasgo te po wai.

¹¹Te we bidi augwaligo Jisasgo wabo po odobadi, agai gasa po me augwalibolo pusali, te po digi po. Tama Jisas te be nani nogi Jerusalem pąba sabalobaso, tama augwaligo geda muyu, te homu yali, Jisas te Jerusalem be naniba sabalobo si, Godigo we bidi tonalubo sę tamadi tama gagalaibao, augwaligo te homu yali.

¹²Tama tibaso, Jisasgo augwalibolo e po digi po pusali, agai te po wai, “Te nogi yai bidi me deli digibulu gasa buluba osogo pai hagede. Tama tede bidibadi, te gavman genuai polalubo bidigo aga te aga bulu genuai gavman bidi nigilaibao. Tama nigilama, aga page buluba ma bidagasaibao.

¹³Tama te bidi aga pisąbadi, agai sę ebo bage nogo si i olama, augwali deli delibolo mone ni yabe nogo si mawai. Agai augwalibolo te po wai, ‘Te ena gasa digibulu bulude bidibadi, dagego te mone sabo sę yao, eno mawai masigigo tama tiao, tama nosali eno masigi hauwa ma saibao,’ te po wai.

¹⁴Tama te po olama, tama te digibulu gasa buluba pabo gagalali. Tiali goli, te genuai bidi dologode bidaibao wabo bagego bidi me badu tagala palu, te po wai, ‘Dagego te gavman genuai polalubo bidibolo te po wao, “E bidi dago buludu asai bidi, da tonalubo bidi nigibo hagelabo” wao,’ te po wali.”

¹⁵“Tiali goli, te bidi digibulu buluba sabolama, te genuai polalubo bidigo aga genuai gavman bidi nigali. Tama agai gavman sę ebo bomo selama, aga buluba ma pali. Teba sabolama, agai polobadu masigi menama sę yali bidi dabe i wali, augwaligo gasa masigi nisu naga sali te suai hagede.

¹⁶Te hasia asai bidi aga pageba asama, te po wai, ‘Genuai bidi, nago enabolo mani ni yabego te eno sę ma elama, te 200 kina ma ugwadu daganabo profet mone salio,’ te po wali.

¹⁷Tama te genuai bidigo agabolo te po wei ponani, ‘Nage dwagi yai sę ebo bidi dao. Nago te sę bugagia yalio. Eno nago nogode te dwasianu mone menama, tama nago te dwasianu naigo bugagia tonalubo sę ebo bidi mu dao, te eno koneanio. Tama tibaso, megi te be nani nogo si tonalubo bomo eno nagebolo mobao,’ te po wai.

¹⁸Tama i badu sę ebo bidi aselama, te po wai, ‘Genuai bidi, nago enabolo mani monego te sę ma elama, te eno mone te 100 kina sai dao,’ wali.

¹⁹Tama te genuai bidigo agabolo te po wai, ‘Nago me te be nani a naga te nago tonaluao.’”

²⁰“Te nosali bidi asiyu, te po wai, ‘Genuai bidi, nago enabolo mani mone e dao. E masigi eno ugwade tomogolama, bugagia muani. Magi baso meni.

²¹Eno nagede wi yalio. Nage da, homu sesena pabo bidi dao. Te gasa bidi dabego munalubo nai, te nago sabo dao. Naga gide nai bulisąma, te gasa bidigo gide bulali nai sabo bidi dao,’ wali.

²²Te genuai bidigo agabolo po wei ponoyu, te po wai, ‘Nage dwai sę ebo bidi, nago megi wali pogo eno nage aiyaba elaluaibao. Ena da homu sesena pabo bidi dao, nago koneani. Gide nai bulisąma, eno te tubo nai naga sabo bidi dao, te me nago koneani. Gide nai bulisąma, ena tubo nai sabo bidi dao, te me nago koneani.

²³Nago koneani, ena te tiwai bidi yaibaso, te nago eno masigi te benkde magi baso mubewe? Nage eno masigi te benkde mugi sogo da, teda ena ma asali sogode ena gasa masigi me badu ma sigi da,’ wali.”

²⁴“Tama te genuai bidigo tede dolalubo bagebolo te po wai, ‘Te ni yabe nogo si masigi selama, te u bidi mao, te masigi bidi sese a naga 200 kina sali bidibolo mao,’ wali

²⁵Tama tede dolalubo bagego te po wai, ‘Genuai bidi, te bidi agai bidi sese nogo a naga 200 kina polo sai dao,’ wai.

²⁶Te genuai bidigo te po wali, ‘Eno dagebolo obao, te nai elalubo bidi agai nai me saibao. Tiali goli, te dwasianu nai elalubo bidigo nai gasa bidigo saibao.

²⁷Tama eno boi bidi odasa asao. Augwali ena dologode bidibo hagelabo wali. Tama te bage odasa asao, eno gabidide hwągo ela muao,’ te genuai bidigo te po wali,” Jisasgo te po wai dao.

²⁸Te Jisas agai po ola mena silama, tama agai te Jeriko be nani tagalali. Te aga te we bidi polasa peyu, Jerusalem moni taunba pabo ma gagalali, ogwaba.

²⁹Tama pelama, tama te dwasianu be nani si pąba sabolali. Be nani me nogi Betfage, te be nani me nogi Betani, te si pąba sabolali. Tama sabolama, augwali te bulu du nogi Oliv te bulu duba sabolali. Teba sabolama, tama Jisasgo bidi si i wali, augwali si tagala palama pomainu yali.

³⁰Augwali sibolo te po wali, “U be naniba pao. Tama te be nani tomoba pelama, tede dage sigo kibu donki wai sueibao, page bidigo haliga gebelalio. Te gesi donki wai te bidi munu me duasiąwai donki dao. Te donki wai gebelali haliga pisigina sąyao, ena pageba sesao.

³¹Bidi mego dage sibolo dage te donki wai magi baso bono pisigawaniwe te po obaso, agabolo te po wei ponao, ‘Te Genuai Bidigo te donki waide sę elalubo,’ te po wao,” Jisasgo te po wai.

³²Tama tibaso, te tagala palai bidi si u be naniba pelama, Jisasgo wali po mu salio, augwali sigo te donki wai suali.