LUCAS 19:8-32

⁸Lex wzuli Zaqueo, re men lo Ne: ―Gukwii gante Dechey, ydee noo gwrool ne rap noo lo menprob, no belne nuu pe wkade noo mén chen wak wbaan noo men, ycheree noo tap lal ne wbaan noo lo men.

⁹Lex re Ne lo men: ―Nedxeree wláá men ne nuu lenyuuree lo dol, porke laake no men rlaleedx Dëdyuzh zegne wlaleedx Abraham Dëdyuzh.

¹⁰Le Men ne wdxiid wak Mén zëdye mén ne che wak perdid chen yselaa men men lo dol.

¹¹Wzëët Jesus zegnak te kwent lo mén ne kayon ne re Ne, porke che guex ydxiin Ne Jerusalén no porke nuu lextoo yra mén guin pazer orgueguin gak ne rkyeen Dëdyuzh.

¹²Re Ne lo men: ―Wuu te mgyeey ne nak zhiin mennon, wruu men za men nat chen ylaa mén men rrey, lex yberee ke men.

¹³Per antes ne yruu men, wbëz men chii xmos men, wdee men ndal med lo men te te men, lex re men lo men: “Gulano medree dxiin axtegue ne yberee noo.”

¹⁴Per rwinyaan yrandxee menlaz men men, lex wxaal menlaz men tebëd mén zanal men chen gue men: “Rlaandet noo ne gak ménree xerrey noo.”

¹⁵Per wlaa mén men rrey, lex wberee ke men laz men. Chene le men wberee, wbëz men yra xmos men ne wdee men med lo, chen gaknan men gan palal wun men gan te te men.

¹⁶Wbig men primer, re men: “Dechey, le xmed de nee; wuno gan schii lal ne nako.”

¹⁷Wke rrey, re rrey lo men: “Weno, te moswen nak de; ya ke ne wen wlaa de kon ne zhi, orrenaa yzu noo de ynebééy de chii gyëz.”

¹⁸Wbig men ste men, re men: “Dechey, le xmed de nee; wuno gan sgaay lal ne nako.”

¹⁹Wke rrey, re rrey lo mos guin: “Laa de ynebééy gaay gyëz.”

²⁰Lex wbig men ste men, re men: “Dechey, le xmed de nee; wkaa noo we te lo bayles, wgutsoow noo we.

²¹Wdxe noo de porke wdee beey nak de, rnëëz de ne nakdet xen de, no rlaap de ne wak ledne wguudet de bni.”

²²Lex re rrey lo men: “Mosmal, por xgyelgyedruu de nak ne sakzi de. Belne nan de ne wdee beey nak noo, ne rnëëz noo ne nakdet xen noo, no ne rlaap noo ne wak ledne wguudet noo bni,

²³¿penak waludet de xmed noo bank cheguin? Lex chene nberee noo, nkakwent noo we ydebzhiino.”

²⁴Lex re rrey guin lo men ne ndxin nga: “Gugyitxee med gwa lo men, gudee we lo men ne nzen chii lal wa.”

²⁵Wke men re men: “Dechey, per che nzen men chii lal wa.”

²⁶Wke rrey, re rrey lo men: “Yna noo lo de yra de ne mén ne nzeno, mazre ndaldoo sen men; per le mén ne nzendeto, axtegue ne nzenendxee men ybetxee lo men.

²⁷Le yra mén ne rwinyaan noo ne wlaandet ne gak noo rrey, gutano men nee, lex guket men nes lo noo.”

²⁸Chene wluzhse re Jesus zenga, wyuli ke Ne nëz, za Ne Jerusalén.

²⁹Chene wdxiin Ne guex Betfagé no le guex Betania guex gyeey ne la Olivos, wxaal Ne txup xpén Ne,

³⁰re Ne lo men: ―Gutsa gyëzwin ne nak ngali nee. Ne ydxiin de, tsël te bur bëën bëënleg ne kaduu nga lo de no ne rutlel gardet kwib. Ychil de ma, chidno de maa.

³¹Belne nuu mén ynabdiiz lo de, yna men: “¿Penak rchil de bur gwa?”, yke de, gue de: “Laa Jesus ne rnebééy ykyiinen maa.”

³²Lex za xpén Ne, no yrandxee zegne re Ne, zenga wako.