Luka 19:8-32

⁸Zakayo akasimama akamwambia Bwana, Tazama Bwana nusu ya mali yangu nawapa maskini, na ikiwa nimemnyang'anya mtu yeyote kitu, nitamrudishia mara nne.'

⁹Yesu akamwambia, 'Leo wokovu umefika katika nyumba hii, kwa sababu yeye pia ni mwana wa Ibrahimu.

¹⁰Kwa maana Mwana wa Mtu amekuja kutafuta na kuokoa watu waliopotea.'

¹¹Waliposikia hayo, aliendelea kuongea na alitoa mfano, kwa sababu alikuwa karibu na Yerusalemu, na wao walidhani ya kuwa ufalme wa Mungu ulikuwa karibu kuonekana mara moja.

¹²Hivyo akawaambia, 'Ofisa mmoja alikwenda nchi ya mbali ili apokee ufalme na kisha aurudi.

¹³Aliwaita watumishi wake kumi, akawapa mafungu kumi, akawaambia, 'fanyeni biashara mpaka nitakaporudi.'

¹⁴Lakini wananchi wake walimchukia na hivyo wakatuma wajumbe waende kumfuata na kusema, 'Hatutaki mtu huyu atutawale.'

¹⁵Ikawa aliporudi nyumbani baada ya kufanywa mfalme, akaamuru wale watumishi aliokuwa amewaachia fedha waitwe kwake, apate kujua faida gani waliyoipata kwa kufanya biashara.

¹⁶Wa kwanza akaja, akasema, `Bwana, fungu lako limefanya mafungu kumi zaidi.'

¹⁷Huyo Ofisa akamwambia, Vema, mtumishi mwema. Kwa sababu ulikuwa mwaminifu katika jambo dogo, utakuwa na madaraka juu ya miji kumi.'

¹⁸Wa pili akaja, akasema, 'Bwana, fungu lako limefanya mafungu matano.'

¹⁹Huyo Afisa akamwambia, 'Chukua mamlaka juu ya miji mitano.'

²⁰Na mwingine akaja, akasema, `Bwana hii hapa fedha yako, ambayo niliihifadhi salama katika kitambaa,

²¹kwa maana niliogopa kwa sababu wewe ni mtu mkali. Unaondoa kile usichokiweka na kuvuna usichopanda.'

²²Huyo Ofisa akamwambia, 'Kwa maneno yako mwenyewe, nitakuhukumu, ewe mtumishi mbaya. Ulijua kwamba mimi ni mtu mkali, nachukua nisichokiweka na kuvuna ambacho sikupanda.

²³Basi, mbona hukuweka fedha yangu katika benki, ili nikirudi niichukue pamoja na faida?

²⁴Ofisa akawaambia watu waliokuwa wamesimama hapo, 'Mnyang'anyeni hilo fungu na kumpa yule mwenye mafungu kumi.'

²⁵Wakamwambia, `Bwana, yeye ana mafungu kumi.'

²⁶'Nawaambia, kila mtu ambaye anacho atapewa zaidi, lakini ambaye hana, hata kile alicho nacho kitachukuliwa.

²⁷Lakini hawa maadui zangu, ambao hawakutaka niwe Mfalme wao, waleteni hapa na kuwaua mbele yangu.”

²⁸Baada ya kusema hayo, aliendelea mbele akipanda kwenda Yerusalemu.

²⁹Ikawa alipokaribia Bethfage na Bethania, karibu na mlima wa Mizeituni, aliwatuma wanafunzi wake wawili,

³⁰akisema: `Nendeni katika kijiji cha jirani. Mkiingia, mtakuta mwana-punda hajapandwa bado. Mfungueni, mkamlete kwangu.

³¹Kama mtu akiwauliza, `Mbona mnamfungua?' Semeni, “Bwana anamhitaji.”

³²Wale waliotumwa wakaenda wakamwona mwana-punda kama Yesu alivyokuwa amewaambia.