Ruka 19:8-32

⁸Mame towõse xikihme Zakeu tytapyĩ tao. Ynara tykase ynororo Jezu a, —Etako pahne, yyrypyry rumekary se ase. Ymõkomory apiakãko ase, ekarotohme tymõkomokãkara a. Pake imehnõ tinerũ ematonanopyasene. Yrome seromaroro ynematonanopyhpyry motye ekarõko ropa ase eya xine, asasakoropane ekarõko ropa ase eya xine, tykase Zakeu Jezu a.

⁹Morara kary etaryke tyya ynara tykase Jezu eya, —Seroae Ritonõpo opynanohno. Imũkurume mexino. Aparão paryme nymyry mase.

¹⁰Morara exiryke Kapu ae Ayhtohpyry tooehse tarona, iirypyrymãkõ menekase, toto pynanohtohme, tykase Jezu Zakeu a.

¹¹Mame Jezu omiry etãko imoihmãkõ kynexine, Zakeu a autururu etãko. Mame, “Axĩ tuisa konõtome Ritonõpo osenepõko mana,” tykase toh repe, moe pyra Jerusarẽ toehse exiryke.

¹²Mokaro osenetuputyry waro toehse Jezu. Naeroro ynara tykase ynororo eya xine toto osenetupuhtohme, —Pata esẽ kynexine. Pata tamuru pona toytory se kynexine, moẽ pona, tuisamehxo toehtohme. Mame tuisamehxo toehse tahtao tooehtohme ropa, tosaka ropa.

¹³Mame ytosasaka tahtao typoetory tõ tykohmase tyya 10mãkomo. Tytinerũ tokarose toitoine eya xine uuru risemy. Toiro ahtao toiro tokarose eya xine ipoko erohtohme. Ynara tykase ynororo eya xine, “Sero tineru ke ikuhko, itamurumehxo apoitohme ytinerũme, joepyry ropa ponãmero,” tykase eya xine. Mame toytose rahkene.

¹⁴—Morarame imehnõ ipataõkõ tosẽkõme ise pyra toh kynexine. Zehno toh kynexine. Ahno tonyohse eya xine ĩkapo, ynara katohme, “Mose se pyra ynanase yna esẽme,” katohme repe.

¹⁵—Morarame pata tamuru esẽme imehxo toehse ynororo. Moromeĩpo toytose ropa ynororo tosaka ropa. Mame typoetory tõ tykohmase tyya, tytinerũ apoihpõkomo 10mãkomo. “Otãto ytinerũ tomãse nae, ypoetory tõ emahpo,” tykase tyya rokene.

¹⁶Mame osemazupu tooehse. Ynara tykase ynororo tosemy a, “Seny, onekarohpyry tomãse jemahpo. Toiro kynexine uuru risemy. 10me apoiase ropa,” tykase ynororo eya.

¹⁷—“Emese kure mase,” tykase esemy eya. “Kure mase ypoetoryme. Tymoise oya jexiryke pitiko rokẽ ynekarohpyry poko itamurumehxo ekarõko ase oya. 10me pata esẽme orĩko ase,” tykase eya esemy.

¹⁸—Morarame ĩkapo roropa tooehse imepyny. Ynara tykase ynororo tosemy a, “Onekarohpyry ke uuru risẽ toiro, tuhkehxo apoiase omame etone uuru risemy,” tykase ynororo eya.

¹⁹—Ynara tykase esemy eya, “Kure omame etone pata esẽme orĩko ase,” tykase.

²⁰—Mame imepỹ tooehse. Ynara tykase ynororo tosemy a, “Seny, onekarohpyry ro uuru risemy. Tukurãkase ya kamisa muahtaka.

²¹Ouno jexiryke onemyase, tykaripãse oexiryke, jamihme õmiry exiryke. Onyrihpyry kara apoĩko mase, anarykahpyry kara epery apoĩko roropa mase,” tykase ynororo eya.

²²—Ynara tykase esẽ eya, “Popyra mase. Õmihpyryae ro orĩko ase pohnõ esaka. Juaro mase. Jamihme jomiry exiry waro. Ynyrihpyry kara apoiry ya waro roropa mase. Ynarykahpyry kara epery apoiry ya waro roropa mase.

²³Morara exiryke oty katoh ytinerũ onekaropyra mexihne tineru poko erohketõ esemy a. Morara ahtao ytinerũ tomãse exiry repe,” tykase eya esemy.

²⁴—Mame ynara tykase tymyhtõkomo a, “Uuru apoitoko mose wino ekarotohme mokyro a, 10me uuru esemy a,” tykase.

²⁵—Ynara tykase toto eya, “Yrome nae ynororo 10me,” tykase toto.

²⁶—“Etatoko pahne,” tykase esẽkomo. “Itamurume nae exikety ahtao itamurumehxo eya ekarõko imehnõ mana. Yrome arypyra exiketyme ahtao ikyryry akoĩpyry puxihkãko ropa imehnõ mana ewinoino.

²⁷Mame seromaroro moxiã yzehnotokomo, tosẽkõme jexiry satokõkara, enehko toto xiaro ya. Etapatoko toto yneneryme,” tykase esẽkomo, tykase Jezu eya xine.

²⁸Morarame Jezu tõturukehse. Mame tymarõkõ esemazupurume toytose Jerusarẽ pona.

²⁹Mame Pehpaje pata moe pyra ahtao Petania pata moe pyra roropa kynexine. Moroto typorohse Jezu ypy Oriwera myhtokoxi. Mame typoetory asakoro tonyohse eya osemazuhme toto ytotohme.

³⁰Ynara tykase ynororo eya xine, —Ytotoko mõ pata pona. Mame pata pona oytorykohtao, jumẽtu mũkuru enẽko matose tymyhse, ahno anaropitopyny. Mokyro imyhpokatoko enehtohme xiaro.

³¹Mame ynara karyhtao imehnomo a, “Oty katohme imyhpokãko matou?” karyhtao oya xine, ynara kahtoko eya xine, “Tuisa ise kynako,” kahtoko.

³²Mame inenyohtyã toytose. Emero tonese eya xine, Jezu nekarotopõpyryae ro.