Luku 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Yesu lɩɩnɑ Yɑɑtɑnɩ nɑ Ɩsɔ Feesuɣu Nɑŋŋtʋ toŋ tɔɔ ɩ kiŋ kɛ sɔsɔm. Ḿpʋ́ɣʋ́ Feesuɣu Nɑŋŋtʋ tɛɛnɑ-ɩ wʋlɑɣɑ tɛtʋ tɑɑ.

²Ɩlɛnɑ Ɩlɔɣɔʋ mɑɣɑsɩ-ɩ wɛɛ nɩɩlɛ. Ɩ tɑ tɔɣɔ pʋlʋɣʋ kʋyɛɛŋ ɩnɩ ɩ tɑɑ. Pǝ yoosɑ wɛɛ nɩɩlɛ ɩlɛnɑ nyɔɣɔsɩ kpɑ-ɩ.

³Tǝnɑɣɑ Ɩlɔɣɔʋ tɔmɑ-ɩ sɩ: Ye n kɛ́ Ɩsɔ Pǝyɑɣɑ, yɔɣɔtɩ nɑ pǝlɛ tǝnɛ tǝ pǝsɩ tɔɣɔnɑɣɑ.

⁴Amɑ Yesu cɔ-ɩ sɩ: Pɑ ŋmɑɑwɑ Ɩsɔ Tɔm tɑɑ sɩ, pǝ tɑɣɑ tɔɣɔnɑɣɑ tike kɛ yʋlʋ kɑ hikinɑ weesuɣu.

⁵Ḿpʋ́ɣʋ́ Ɩlɔɣɔʋ ponɑ-ɩ timpi pǝ kʋlɑɑ tɔ, nɑ ɩ́ kpɛntɩ ɑntulinyɑ kɑwulɑsɩ tǝnɑɣɑ tɔm kʋlʋm nɑ ɩ́ hʋlɩ-ɩ.

⁶Ɩlɛnɑ ɩ́ tɔmɩ-ɩ sɩ: Mɑɑ hɑ-ŋ pǝ toŋ nɑ pǝ teeli tǝnɑ. Pǝ tɑɣɑ pʋlʋ, mɑ niŋ tɑɑ kɛ́ pɑ tʋ pǝ tǝnɑ, nɑ mɑ́ nɔkɑɑ mɑ hɑ wei mɑ sɔɔlɑɑ tɔ.

⁷Ɩlɛ ye n kɑ hǝntɑ-m ɑtɛ, n kɑ́ kpɑɣɑ pǝ tǝnɑ.

⁸Amɑ Yesu cɔ-ɩ sɩ: Pɑ ŋmɑɑwɑ Ɩsɔ Tɔm tɑɑ sɩ, ń kɑ́ sɛɛ nyɑ́ Cɑɑ Ɩsɔ, nɑ ɩ tike ɩ tǝmlɛ kɛ n kɑ́ lɑ.

⁹Ḿpʋ́ɣʋ́ Ɩlɔɣɔʋ ponɑ-ɩ Yosɑlɛm nɑ ɩ́ kpɑɑsɩ-ɩ Ɩsɔ tǝsɛɛlɛ comcom nɔɣɔ tɑɑ, nɑ ɩ́ tɔmɩ-ɩ sɩ: Ye n kɛ́ Ɩsɔ Pǝyɑɣɑ ŋmɑɑ ɑtɛ.

¹⁰Pǝ tɑɣɑ pʋlʋ, pɑ ŋmɑɑwɑ Ɩsɔ Tɔm tɑɑ sɩ, ɩ kɑ́ heeli ɩ ɩsɔtɑɑ tillɑɑ kɛ nyɑ́ tɔm sɩ pɑ́ pɑɑsǝnɑ-ŋ teu.

¹¹Pǝ́cɔ́ lɛntɩ wɛɛ tɔtɔ sɩ: Pɑɑ teeli-ŋ pɑ niŋ tɑɑ kɛ́ teu tǝkpɑ sɩ pǝ́ tɑɑ kɔɔ nɑ pǝlɛ nɑtǝlɩ tǝ́ co-ŋ.

¹²Amɑ Yesu cɔ-ɩ sɩ: Pɑ ŋmɑɑwɑ Ɩsɔ Tɔm tɑɑ sɩ, n kɑɑ mɑɣɑsɩ nyɑ́ Cɑɑ Ɩsɔ sɩ ń nɑ́ ɩ wɑɑlɩ.

¹³Wɑɑtʋ wei Ɩlɔɣɔʋ tɛmɑ-ɩ mɑɣɑsʋɣʋ kɛ pǝ tǝnɑɣɑ mpʋ, ɩlɛnɑ ɩ́ tɛɛ nɑ ɩ́ tɑŋɑ wʋlɛ kʋfɑtɛ.

¹⁴Pǝlɛ pǝ wɑɑlɩ ɩlɛ Yesu mǝlɑ Kɑlilee nɑ Feesuɣu Nɑŋŋtʋ toŋ hɑɣɑ-ɩ, nɑ ɩ tɔm yɛkǝɣɩ hɔɣɔlʋɣʋ ŋkʋ kʋ tǝnɑ kʋ tɑɑ.

¹⁵Ɩ sɛɣɛsɑɣɑ Yutɑ nyǝ́mɑ tǝkotilenɑɑ tɑɑ nɑ yǝlɑɑ tǝnɑ pʋɣʋlɑɣɑ-ɩ.

¹⁶Ḿpʋ́ɣʋ́ Yesu polɑ Nɑsɑlɛtɩ timpi ɩ pɩɩwɑ tɔ, nɑ ɩ́ sʋʋ Yutɑ nyǝ́mɑ tǝkotile tɑɑ kɛ́ kʋyɑkʋ kʋhɛɛsʋɣʋ wule, ɩsɩɩ ɩ tɩɩ lɑkɩ tɑm tɔ. Ḿpʋ́ɣʋ́ ɩ kʋlɑɑ sɩ ɩ kɑlǝɣɩ Ɩsɔ Tɔm.

¹⁷Ɩlɛnɑ pɑ́ cɛlɛ-ɩ Ɩsɔ kʋyɔɣɔtʋtʋ tɛlǝsʋlʋ Ɩsɑyii tɑkǝlɑɣɑ. Ḿpʋ́ɣʋ́ ɩ hɛtɑ timpi pɑ ŋmɑɑwɑ sɩ:

¹⁸Tɑcɑɑ Feesuɣu wɛ mɑ kiŋ, nɑ ɩ lǝsɑ-m sɩ mɑ́ heeli Lɑɑpɑɑlɩ Kʋpɑŋ kɛ kʋnyɔntʋnɑɑ. Nɑ ɩ tilɑ-m sɩ mɑ́ heeli sɑlǝkɑtʋnɑɑ kɛ pɑ hɛtʋɣʋ tɔm. Nɑ yʋlʋmɑɑ kɛ pɑ ɩsɛ kuluɣu tɔm. Sɩ mɑ́ wɑɑsɩ mpɑ pɑ muɣuliɣi tɔ.

¹⁹Sɩ mɑ́ heeli-wɛɣɛ pǝnɑɣɑ ŋkɑ Tɑcɑɑ kɑ́ wɑɑsɩ ɩ yǝlɑɑ tɔ kɑ kɔntɛ tɔm.

²⁰Yesu tɛmɑ ɩlɛnɑ ɩ́ kpili-kɛ nɑ ɩ́ cɛlɑ pɑɑsǝnlʋ nɑ ɩ́ cɑɣɑ. Ḿpʋ́ɣʋ́ Yutɑ nyǝ́mɑ tǝkotile tɑɑ nyǝ́mɑ tǝnɑ pɑmɑ ɩsɛ kɛ ɩ tɔɔ.

²¹Tǝnɑɣɑ ɩ sʋʋ-wɛɣɛ yɔɣɔtʋɣʋ sɩ: Tɔm nti pɑɑ ŋmɑɑwɑ nɑ ɩ́ tɩɩ nɩɩ-tǝɣɩ nɔɔnɔɔ tɔ, sɑŋɑ ntɛ́ tǝ lɑpɑ.

²²Ḿpʋ́ɣʋ́ pɑ tǝnɑ pɑ tisɑ teu nɑ pɑ́ sɑmɩ-ɩ. Nɑ ɩ kʋyɔɣɔtʋtʋ tǝnɑ lɑpɑ-wɛɣɛ leleŋ, hɑlɩ pǝ́ lɑ-wɛɣɛ piti nɑ pɑ́ tɔ sɩ: Ɩsɩɩ Yosɛɛfʋ pǝyɑlʋ?

²³Tǝnɑɣɑ Yesu tɔmɑ-wɛ sɩ: Tɑmpɑnɑ tɔɔ, ɩ́ kɑ́ tɛ nɑ ɩ́ tuku-m ɩtuule sɩ: Fɛtʋ, fɛ nyɑ́ tɩ. Hɑlɩ ɩ́ kɑ́ yɔɣɔtɩ-m sɩ mɑ́ lɑ mɑ ɩcɑtɛ tɑɑ cǝnɛɣɛ mpi pǝ lɑpɑ Kɑpǝnɑhum nɑ ɩ́ nɩɩ tɔ.

²⁴Ḿpʋ́ɣʋ́ Yesu tɑsɑ-wɛ sɩ: Tɑmpɑnɑ kɛ mɑ heeliɣi-mɛ yoo, pɑɑ nyǝnǝɣɩ Ɩsɔ kʋyɔɣɔtʋtʋ tɛlǝsʋlʋ nɔɣɔlʋɣʋ pʋlʋɣʋ ɩ mɑɣɑmɑɣɑ ɩ ɩcɑtɛ tɑɑ.

²⁵Ntɔŋ ɩ nyǝmɑ́ sɩ ɑlɑɑ leelɑɑ kɑ wɛ pɑɣɑlɛ kɛ Ɩsɛɣɛlɩ tɑɑ kɛ́ wɑɑtʋ wei wʋlɑɣɑ lɑpɑ pɩɩsɩ tooso nɑ ɩsɔtʋnɑɑ nɑɑtoso kɛ Ilii wɑɑtʋ tɑɑ tɔ. Hɑlɩ nyɔɣɔsɩ sɔsɔɔŋsɩ lɩɩ tɛtʋ tǝnɑ.

²⁶Pɑɑ nɑ mpʋ Ɩsɔ tɑ́ tili Ilii kɛ pɑ tɑɑ nɔɣɔlʋ kiŋ. Amɑ ɑlʋ leelu nɔɣɔlʋ wei ɩ kɑ wɛ Sitɔŋ tɛtʋ tɑɑ kɛ́ Sɑlɛpǝtɑ tɔ, ɩ kiŋ kɛ ɩ tilɑ-ɩ.

²⁷Nɑ Ɩsɔ kʋyɔɣɔtʋtʋ tɛlǝsʋlʋ Ilisee wɑɑtʋ tɑɑ tɔnʋɣʋ tɔɔ ɑsilimɑ kʋtɔŋ nyǝ́mɑ kɑ wɛ sɔsɔm tɔtɔɣɔ Ɩsɛɣɛlɩ. Pɑɑ nɑ mpʋ pɑ tɑ wɑɑsɩ pɑ tɑɑ nɔɣɔlʋɣʋ ɩ kʋtɔŋ. Amɑ Silii tʋ Nɑɑmɑŋ tike kɛ pɑ wɑɑsɑɑ.

²⁸Wɑɑtʋ wei Yutɑ tǝkotile tɑɑ nyǝ́mɑ nɩɩ ɩ tɔm ntɩ tɔ, pǝ hɑŋɑ-wɛɣɛ sɔsɔm.

²⁹Ḿpʋ́ɣʋ́ pɑ kʋlɑɑ nɑ pɑ́ hɔmɩ-ɩ nɑ pɑ́ lɩɩnɑ ɩcɑtɛ wɑɑlɩ, nɑ pɑ kpɑɑnɑ-ɩ hɑtoo pʋɣʋ ŋku kʋ tɔɔ pɑ ɩcɑtɛ wɛɛ tɔ kʋ nyʋɣʋ tɑɑ, timpi pǝ lɑpɑ tokuɣu tɔ, sɩ pɑ tusiɣi-ɩ.

³⁰Ɩlɛnɑ Yesu fɑɣɑnɑ pɑ hɛkʋ tɑɑ nɑ ɩ́ tɛɛ ɩ nyǝŋkʋ.

³¹Ḿpʋ́ɣʋ́ Yesu polɑ Kɑpǝnɑhum, Kɑlilee tɛtʋ tɑɑ ɩcɑtɛ nɑtǝlɩ, nɑ ɩ́ sɛɣɛsɩ-wɛɣɛ kʋyɑkʋ kʋhɛɛsʋɣʋ wule.

³²Ḿpʋ́ɣʋ́ ɩ sɛɣɛsʋɣʋ cɛpɑ pɑ lɑŋɑ kɛ teu. Pǝ tɑɣɑ pʋlʋ, ɩ sɛɣɛsɑ-wɛɣɛ nɑ toŋ, ɩ tɑ nyɑ́.

³³Pǝ pɑmnɑ ɑpɑlʋ nɔɣɔlʋ kɑ wɛ Yutɑ nyǝ́mɑ tǝkotile tɑɑ nɑ ɩ́ hii ɩlɔɣɔʋ ɩsɑɣɑʋ nɔɣɔlʋ. Ḿpʋ́ɣʋ́ ɑpɑlʋ ɩnɩ ɩ koo sɔsɔm sɩ:

³⁴Ee Nɑsɑlɛtɩ Yesu, n cɑɑ-weɣe tɑ́ kiŋ? Tɑ wɑkǝlʋɣʋ kɛ n kɔmɑ? Mɑ nyǝmɑ-ŋ teu, n kɛ́ Ɩsɔ yʋlʋ nɑŋŋtʋ wei ɩ tilɑɑ tɔ.

³⁵Tǝnɑɣɑ Yesu kɑlǝnɑ-ɩ sɩ: Hei nyɑ́, su nɑ ń se ɑpɑlʋ ɩnɩ ɩ wɑɑlɩ. Ḿpʋ́ɣʋ́ ɩlɔɣɔʋ pɛtɑ-ɩ sɑmɑɑ hɛkʋ tɑɑ nɑ ɩ́ yele-ɩ nɑ ɩ́ se. Amɑ ɩ tɑ lɑpɩ-ɩ pʋlʋ.

³⁶Ḿpʋ́ɣʋ́ pǝ lɑpɑ yǝlɑɑ kɛ sɔɣɔntʋ nɑ pɑ́ tɔŋ tǝmɑ sɩ: Hm, tɔm tǝnɛ. Ɩ yɔɣɔtǝɣǝnɑ ɑlɔɣɑɑ nɑ ɑpɑlʋtʋ nɑ tomɑ, nɑ ɩ́ tɔɣɔnǝɣɩ-wɛ.

³⁷Ḿpʋ́ɣʋ́ ɩ hǝtɛ yɑɑ tɛtʋ tǝnɑ tɑɑ.

³⁸Yesu lɩɩnɑ Yutɑ nyǝ́mɑ tǝkotile tɑɑ ɩlɛnɑ ɩ́ polo Simɔŋ tǝyɑɣɑ. Wɑtʋ sʋʋkɑɣɑ Simɔŋ yɔsɔ kɛ sɔsɔm, ɩlɛnɑ pɑ́ wiinɑ Yesu sɩ ɩ́ wɑɑsɩ-ɩ.

³⁹Ḿpʋ́ɣʋ́ Yesu luŋɑ ɩ tɔɔ nɑ ɩ́ kɑlǝnɑ wɑtʋ, nɑ tǝ yɑ ɩ tɔɔ. Tǝnɑɣɑ ɑlʋ kʋlɑ kpɑkpɑɑ nɑ ɩ́ cɑlǝsɩ-wɛ.

⁴⁰Ilim tʋ kpɑkpɑɑ, ɩlɛnɑ pɑ tǝnɑ mpɑ pɑɑ wɛnɑ kʋtɔntʋnɑɑ kɛ wɑɑnɩ wɑɑnɩ tɔ pɑ́ kɔnɑ-wɛ. Ḿpʋ́ɣʋ́ ɩ tǝnɑ ɩ niŋ kɛ pɑɑ wei ɩ tɔɔ nɑ pɑ́ hiki ɑlɑɑfǝyɑ.

⁴¹Alɔɣɑɑ mɑɣɑmɑɣɑ nɑ́ se yǝlɑɑ pɑɣɑlɛ wɑɑlɩ nɑ pɑ́ kooki sɩ: N kɛ́ Ɩsɔ Pǝyɑlʋ kɛ́. Amɑ ɩ kɑlǝnɑ-wɛ, ɩ tɑ tisi sɩ pɑ́ yɔɣɔtɩ: Pǝ tɑɣɑ pʋlʋ, pɑ nyǝmɑ́ sɩ ɩ kɛ́ Mesii.

⁴²Wɑɑtʋ wei tɛʋ femɑ tɔ, Yesu lɩɩwɑ nɑ ɩ́ polo timpi yǝlɑɑ fɛɩ tɔ. Ḿpʋ́ɣʋ́ yǝlɑɑ sɑmɑɑ pɛɛkɑ-ɩ, hɑlǝnɑ pɑ́ tɑlɑ ɩ cɔlɔ. Pɑ luɣu lɑpɑ sɩ pɑ́ tɔkɩ-ɩ, pɑ́ tɑɑ yele nɑ ɩ́ tɛɛ.

⁴³Amɑ Yesu cɔ-wɛ sɩ: Aɑi, pǝ wɛɛ kɛ́ sɩ mɑ́ heeli ɑcɑlɛɛ lɛnnɑ kɛ Ɩsɔ Kɑwulɑɣɑ Lɑɑpɑɑlɩ Kʋpɑŋ. Pǝ tɑɣɑ pʋlʋ, pǝ mɑɣɑmɑɣɑ pǝ tɔɔ kɛ́ Ɩsɔ tilɑ-m.

⁴⁴Tǝnɑɣɑ Yesu tɛɛwɑ nɑ ɩ́ lɑkɩ wɑɑsʋ kɛ Yutɑ tɛtʋ tɑɑ pɑ tǝkotilenɑɑ tɑɑ.