Lukas 19:8-32

⁸A ta pagbida nig Hesus ikid ni Sakyo ta bali na en a nagtayuk i Sakyo, a nebosag na hapa ya pagbabawi na. “Afu, igadwak sangaw ta ayanin ya pobre kiden ta ngamin kwak. A am itta ya dinarogas ku ta pagpaga da ta bwis da a itolik hala sangaw tekid ya mamengappat ta kaddu na napasurok ku ta bwis da,” kunna te Hesus.

⁹A ya tabbag hapa ni Hesus tentu a “Iko mantu ya takday kagitta ni mina Abraham, te mangurug kan, a ayanin mantu ya pakesipat muy ikid na anak muy kiden ta pangikerutan na Namaratu.

¹⁰Te yen hapa ya imeyan ku ta isin petta apagan ku ya metawag, petta ikerutan ku,” kunna hapa ni Hesus tentu.

¹¹A gafu ta bida ni Hesus te Sakyo a pahig na kadwan kiden nakadangag ta tanagay na ya pagpatayuk ni Hesus ta gubyernu na Namaratu ta ili na Herusalem, te abikan na ya ili en, a amu da ta yen pagdulotan ni Hesusen. A yen ta nagbida i Hesus ta takwan na keangarigan tekid, petta pake amu da mina ya dumatang.

¹²“Itta ta idi ya naba-nang na tolay,” kunna, “a umange ta adayu na lugar, te yen ya enna pangalapan ta pagsaad na ta agyan na en, kapye na sangaw dumatang.

¹³A gafu ta medyo mabayag sangaw a inayagan na ya mafulu ta tagabu na kiden, a nepataron na tekid ya kadwan kiden pirak na. ‘Pagatut muy yan petta maganak, te alapan ku sangaw am dumatangak,’ kunna kan tekid, kapye na nagtugut.

¹⁴“Ammi ya kalugaran na kiden a nekatupag da, a pinadagdag da hapa ya kadwan kiden kahulun da ta enna en pangalapan ta saad na petta awena mina mesaad, te aweda ikayat ta intu ya magibbal tekid.

¹⁵Ammi maski kunna ten a nesaad hala, a nagtoli ta lugar na en. A sangaw pinaayagan na ya pinagtaron na kiden ta pirak na kiden, petta madangag na am piga ya naapagan da.

¹⁶A ta datang na napolu en a ‘Mappya, Afu, te ya nepatarom teyak a imaddu ta mamengfulu,’ kunna kan.

¹⁷‘A mappya ka mantu na tagabu te awenak nelogot. A gafu ta mekatalak ka nga magtaron ta assang a paturinan ta ka hapa petta magibbal ka hapa ta mafulu na ili,’ kunna kan na ari en tentu.

¹⁸“A sangaw umange hapa ya mekaduwa en tagabu na a ‘Mappya, Afu, te ya nepatarom teyak a imaddu ta mamenglima,’ kunna.

¹⁹‘A iko mantu sangaw ya magibbal ta lima na ili,’ kunna hapa na ari en tentu.

²⁰“A sangaw umange hapa ya takday, a ‘Yeh, Afu, ya nepatarom teyak. Pake neappiyak ta umag na panyaw kin,

²¹te amuk ta maporay ka na tolay, te pangalapam haman ya awem pagmulan, yaga magba-nang ka ta banbannag na kadwan, a nagtalawak ta pagporayan nak sangaw,’ kunna.

²²‘Kuga dupal ya tagabu in yan,’ kunna hapa na ari en tentu. ‘Ya uhohug mu hapa la ya pangpa-gang ku teko. Am pahig mu ta maporayak na tolay nga magba-nang ta banbannag na kadwan

²³a anu awem mantu nepagatut ya pirak ku ta gumatut kiden petta itta mina ya nadatangan ku ta naapagan na kwak?’ kunna hapa na dafu na en tentu.

²⁴“A ya nebar na para ta gitayukan kiden a ‘Azin muy mantu ya nepataron ku tentu a iatad muy ta nagpakaddu en ta mamengfulu,’ kunna.

²⁵‘Ammi pake addun sangaw ya kwa na, Afu, te ittan haman tentu ya imaddu ta mamengfulu,’ kunda.

²⁶‘A maski ay,’ kunna hapa, ‘te kakurugan ya uhohugan ku tekamuy ta madaggan sangaw ya kwa na makākwa en petta imad-addu ya kwa na, ammi ta awanen nagpakaddu ta kwa na a maazi hapa sangaw ya dana neatad tentu.

²⁷‘A ya mangikatupag kiden nga awan makidafu teyak, a alapan muy kid sin, te papasin muy kid ta atubang ku,’ kunna.”

²⁸A ta nekabalin ni Hesus nangibida ta keangarigan na en a nagdulot kid kontodu ituldu na kiden ta ili na Herusalem, ammi napa-polu i Hesus ta dalan.

²⁹A tekiden nakadatang ta Bagetay na Olibo ta bikat na babali kiden ta Beffage ikid na Batanya a pinaunnan ni Hesus ya duwa na ituldu na.

³⁰“Magdulot kanan ta babali kidewan, a am nakadatang kanan ta bikat da a maita muy sangaw ya urbun na kabayu nga megalut nga awan para la natakayan. Ubadan muy, te idatang muy hapa sin.

³¹A am itta sangaw ya mangpohut ta pangubad muy a ‘Pa masapul na bit la i Afu,’ kummuy,” a umange kid.

³²Naita da hala ya kabayu en ta kuman na nebar ni Hesus tekid,