Luku 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ḿpʋ́ɣʋ́ kʋyɑkʋ nɑkʋlɩ Yesu sɛɣɛsɑɣɑ sɑmɑɑ kɛ Ɩsɔ tǝsɛɛlɛ tɑɑ nɑ ɩ́ heeliɣi Lɑɑpɑɑlɩ Kʋpɑŋ. Ɩlɛnɑ kɔtǝlɑɑ tɑɑ sɔsɑɑ sɔsɑɑ, nɑ Ɩsɔ Tɔm sɛɣɛsǝlɑɑ, nɑ sɔsɑɑ pɑ polo

²pɑ́ pɔɔsɩ-ɩ sɩ: Heeli-tʋɣʋ kɑŋkɑntɛ nte n mɑkɩ nyɑ́ tɑɑ nɑ ń lɑkɩ ɩsǝntɔ tɔ. Yɑɑ ɑwe tɩɩ hɑnɑ-ŋ pǝ mpɑɑʋ?

³Tǝnɑɣɑ Yesu cɔwɑ sɩ: Tɔʋ, mɑ mɑɣɑmɑɣɑ mɑɑ pɔɔsɩ-mɛɣɛ tɔm.

⁴Ɩsɔ yɑɑ yǝlɑɑ tilinɑ Yohɑɑnɩ sɩ ɩ́ sɔɔkɩ yǝlɑɑ kɛ Ɩsɔ lʋm? Ɩ́ cɔ-m mɑ nɩɩ.

⁵Ḿpʋ́ɣʋ́ Ɩsɔ Tɔm sɛɣɛsǝlɑɑ mɑɣɑsɑ-tǝɣɩ pɑ tɑɑ pɑ tike, ɩlɛnɑ pɑ́ tɔ sɩ: Ye tǝ tɔmɑ sɩ Ɩsɔ tilinɑ-ɩ ɩ kɑ́ pɔɔsɩ-tʋ sɩ: Nɑ pepe tɔɔ kɛ́ ɩ́ tɑ mʋ ɩ tɔm?

⁶Pǝyele tǝ́ tɔmɑ sɩ: Yʋlʋ tilinɑ-ɩ kɔlɔ, sɑmɑɑ tǝnɑ kɑ́ kʋ-tʋ nɑ pɛɛ. Pǝ tɑɣɑ pʋlʋ tɔɔ, pɛlɛ pɑ tɛmɑ pɑ tɑɑ tǝkpɑtɑɑ kɛ́ sɩ Yohɑɑnɩ kɛ́ Ɩsɔ kʋyɔɣɔtʋtʋ tɛlǝsʋlʋ.

⁷Ḿpʋ́ɣʋ́ Ɩsɔ Tɔm sɛɣɛsǝlɑɑ pǝsǝnɑɑ sɩ: Tǝ tɑ nyɩ wei ɩ tilɑ-ɩ Ɩsɔ lʋm sɔʋ tɔ se.

⁸Tǝnɑɣɑ Yesu nɑ́ cɔ-wɛ sɩ: Aŋhɑ, mɑ kɑɑ heeli-mɛɣɛ kɑŋkɑntɛ nte mɑ mɑkɩ nɑ mɑ́ lɑkɩ ɩsǝntɔ tɔ.

⁹Pǝ wɑɑlɩ kɛ́ Yesu sɛɛ sɑmɑɑ kɛ ɩsɔ sɩ: Yʋlʋ nɔɣɔlʋ kɑ sɔnɑ lɛsɛŋ tɩɩŋ kɛ tɑɑlɛ tǝcu. Ḿpʋ́ɣʋ́ ɩ cɑɑ yǝlɑɑ nɑ ɩ́ sɩɩ tǝ tɑɑ, ɩlɛnɑ ɩ́ kʋlɩ nɑ ɩ́ tɛɛ yɛlɑ nɑ pǝ́ tɑɑŋɩ.

¹⁰Pǝ kɔmɑ nɑ pǝ́ tɑlɑ tɩɩŋ ɩnɩ ɩ kooluɣu wɑɑtʋ, ɩlɛnɑ ɩ́ kʋsɩ ɩ tillu nɔɣɔlʋ, sɩ ɩ́ polo tǝmlɛ nyǝ́mɑ kiŋ nɑ pɑ́ cɛlɛ-ɩ ɩnɩ ɩ tete. Tǝnɑɣɑ tǝmlɛ nyǝ́mɑ mpɛ pɑ kpɑ tillu ɩnɩ nɑ pɑ́ mɑ́, ɩlɛnɑ pɑ́ tɔɣɔnɩ-ɩ niŋ nɑɑnʋwɑ tǝyǝlǝyǝlɩ.

¹¹Ḿpʋ́ɣʋ́ tɑɑlɛ tʋ ɩnɩ ɩ tɑsɑ ɩ tillu nɔɣɔlʋɣʋ kʋsʋɣʋ nɑ ɩ́ tili. Ɩlɛnɑ tǝmlɛ nyǝ́mɑ mpɛ pɑ́ mɑ́ ɩ́lɛ́, nɑ pɑ́ tʋʋ-ɩ, nɑ pɑ́ tɔɣɔnɩ-ɩ niŋ nɑɑnʋwɑ tǝyǝlǝyǝlɩ.

¹²Ɩ tɑsɑ tooso nyǝŋ kɛ tiluɣu, ɩlɛnɑ tǝmlɛ nyǝ́mɑ mɑ ɩ́lɛ́, nɑ pǝ́ kʋ ɩ tǝnɑ, ɩlɛnɑ pɑ́ pɛtɩ-ɩ hɑlǝm nɑ wɑɑlɩ.

¹³Tǝnɑɣɑ hɑlǝm tʋ tɔmɑ sɩ: Tɔʋ, ɩsǝnɑɣɑlɛ mɑɑ lɑ ɩlɛ? Mɑ mɑɣɑmɑɣɑ mɑ kʋlʋlʋ wei mɑ luɣu sʋʋ teu tɔɣɔ mɑɑ tili. Ntɑnyɩ pɑɑ nyɑ ɩ ɩsǝlɛ.

¹⁴Amɑ tǝmlɛ nyǝ́mɑ nɑ́ kɔmɑ nɑ pɑ́ loosi ɩ pǝyɑlʋ nɑ ɩ́ puki, ɩlɛnɑ pɑ́ heeli tǝmɑ sɩ: Ɩɩ loosiɣi kpɑncoou tʋ kɔŋnɑ ntɛ́. Ɩ́ kɔɔ tǝ kʋ-ɩ, nɑ tɑɑlɛ pǝsɩ tɑ nyǝntɛ.

¹⁵Ḿpʋ́ɣʋ́ pɑ kpɑ-ɩ, nɑ pɑ́ lǝsɩ-ɩ tɑɑlɛ nɑ wɑɑlɩ nɑ pɑ́ kʋ-ɩ. Tǝnɑɣɑ Yesu pɔɔsɑɑ sɩ: Tɑɑlɛ tʋ ɩnɩ, ɩsǝnɑɣɑ ɩ kɑ́ lɑ tǝmlɛ nyǝ́mɑ mpɛ?

¹⁶Ɩ́ kɔmɑ nɑ ɩ́ kɔɔ, ɩ kɑ́ kʋ tǝmlɛ nyǝ́mɑ mpɛɣɛ, ɩlɛnɑ ɩ́ cɑɑ yǝlɑɑ kʋfɑmɑ nɑ ɩ́ sɩɩ tɑɑlɛ tɑɑ. Sɑmɑɑ nɩɩ tɔm tǝnɛ ɩlɛnɑ pɑ́ tɔ sɩ: Ɩsɔ ɩ́ ponɑ tǝlɛɣɛ pooluŋ.

¹⁷Tǝnɑɣɑ Yesu cɑɑ pɑ ɩsɛntɑɑ, ɩlɛnɑ ɩ́ tɔ sɩ: Ɩsɔ Tɔm tɑɑ pɑ ŋmɑɑwɑ sɩ: Pǝlɛ nte tɛtʋ ŋmɑlɑɑ ŋmɑɑkɑɣɑ nɑ pɑ́ lɔ tɔ, ńtɛ́ tǝ tɔɔ kɔlɔ ŋmɑtʋ tǝnɑ mǝlɑɑ nɑ tǝ́ sǝŋ. Suweɣelɛ mpʋ?

¹⁸Ye pǝ cǝpɑ wei nɑ ɩ́ hoti pǝlɛ ńtɛ́ tǝ tɔɔ, pǝ pʋtʋtǝɣɩ-ɩ kɛ́, ɩ kɑɑ wɛɛ hiiu. Ye pǝ cǝpɑ yʋlʋ nɔɣɔlʋ nɑ pǝlɛ ńtɛ́ tǝ hoti ɩ tɔɔ, tǝ tɑɑlǝɣɩ-ɩ nɑ tɛtʋ kɛ́.

¹⁹Tǝnɛ ɩnǝɣɩ kpɑkpɑɑ tɔ Ɩsɔ Tɔm sɛɣɛsǝlɑɑ nɑ kɔtǝlɑɑ tɑɑ sɔsɑɑ sɔsɑɑ cɑɑkɑɣɑ Yesu kɛ́ kpɑʋ ntɛ́. Pǝ tɑɣɑ pʋlʋ tɔɔ, pɑ nyǝmɑ́ teu sɩ mpɛɣɛ ɩ kpǝpǝnɑɑ nɑ ɩ́ sɛɛnɑ ɩsɔ ɩnɩ. Amɑ pɑ nyɑ́mnɑ sɑmɑɑ.

²⁰Ḿpʋ́ɣʋ́ pɑ sʋʋ Yesu kɛ cɔŋʋɣʋ, hɑlǝnɑ pɑ́ cɑŋ pɑ́ tili feŋlɑɑ sɩ pɑ́ feŋiɣi-ɩ. Ɩlɛnɑ feŋlɑɑ mpɛ pɛlɛ pɑ́ cɛsɩ ɩsɩɩ pɑ kɛ́ kʋpɑmɑ nɑpǝlɩ pǝyele yem. Pɑ mɑkɑɣɑ Yesu nɔɣɔ tɔɔ nɑ pɑ tɔm kʋpɔɔsʋtʋ sɩ pɑ́ nɑ́. Pɑ cɑɑkɑɣɑ kɛ́ sɩ pɑ́ hiki mpi pǝ tɔɔ pɑɑ kpɑ-ɩ tɔ, nɑ pɑ́ tʋ-ɩ kʋfǝnɛɛ niŋ tɑɑ.

²¹Tǝnɑɣɑ pɑ tɔmɑ-ɩ sɩ: Tɑcɑɑ, tǝ nyǝmɑ́ teu sɩ nyɑ́ kʋyɔɣɔtʋtʋ nɑ nyɑ́ kʋsɛɣɛsǝtʋ pǝ tǝnɑ kʋpɑntʋ kɛ́. Nn pɑɑsǝɣǝnɑ tɔɔ, nn fɑɣɑsǝɣɩ yǝlɑɑ. Amɑ ɩsǝnɑ mpi mɑɣɑmɑɣɑ Ɩsɔ cɑɑ sɩ yǝlɑɑ ɩ́ lɑ tɔ, pǝ tɑmpɑnɑ kɛ n heeliɣi.

²²Pǝ wɛ mpʋ tɔ, tɑ mpɑɑʋ tɑɑ pǝ mʋnɑ tǝ́ fɛlɩ lɑmpuu kɛ Lom wulɑʋ sɔsɔ nɑ?

²³Yesu tɛmɑ Ɩsɔ Tɔm sɛɣɛsǝlɑɑ ɑcilɑɣɑtʋ tǝnɑɣɑ nyǝm, ɩlɛnɑ ɩ́ tɔ-wɛ sɩ:

²⁴Ɩ́ hʋlɩ-m liɣitee nyǝɣǝlʋɣʋ nɑ mɑ́ nɑ́. Awe nyʋɣʋ fotoo nɑ ɩ hǝtɛ kɛ pɑ ŋmɑɑ pǝ tɔɔ?

²⁵Ḿpʋ́ɣʋ́ Ɩsɔ Tɔm sɛɣɛsǝlɑɑ cɔwɑ sɩ: Lom wulɑʋ sɔsɔ. Tǝnɑɣɑ Yesu cɔ-wɛ sɩ: Aŋhɑ, ɩ́ cɛlɑ Lom wulɑʋ sɔsɔ kɛ mpi ɩ tɩ tɔ, nɑ ɩ́ cɛlɑ Ɩsɔ ɩlɛɣɛ mpi ɩ tɩ tɔ.

²⁶Tǝ tǝnɑ nti Yesu yɔɣɔtɑ sɑmɑɑ tɑɑ tɔ, feŋlɑɑ tɑ nɑ ɩsɑɣɑtʋ nɑtǝlǝɣɩ tǝ tɑɑ. Amɑ Yesu kʋcɔcɔtʋ mǝlǝnɑ-wɛɣɛ tǝmsʋɣʋ nɑ pɑ́ su tǝkulum.

²⁷Ḿpʋ́ɣʋ́ Sɑtusee nyǝ́mɑ nɑpǝlɩ pɑ kɔmɑ Yesu kiŋ. Sɑtusee nyǝ́mɑ mpɛ pɑ tɔŋɑɣɑnɑ sɩ, sǝtɑɑ kɑɑ tɛ nɑ pɑ́ fe. Ḿpʋ́ɣʋ́ pɑ pɔɔsɑ Yesu sɩ:

²⁸Tɑcɑɑ, Moisi sɩɩnɑ-tʋɣʋ kʋsǝsɩɩtʋ kɛ tɑkǝlɑsɩ tɑɑ sɩ, yʋlʋ ɩ́ wɛnɑ neu, nɑ yʋlʋ ɩnɩ ɩ́ sɩ nɑ ɩ́ yele ɩ ɑlʋ, nɑ ɑlʋ ɩnɩ ɩ fɛɩnɑ-ɩ nɑ pǝyɑɣɑ, neu kɑ́ hɔ leelu ɩnɩ nɑ ɩ́ hikinɑ ɩ tɑɑlʋ sɔlʋ kɛ piyɑ.

²⁹Tɔʋ, Yʋlʋ nɔɣɔlʋ nɑ ɩ newɑɑ, pɑɑ kɛnɑ yʋlʋ nyɔɔŋ nɑɑtosompɔɣɔlɑɣɑ. Ḿpʋ́ɣʋ́ tɑɑlʋ kpɑɣɑ ɑlʋ, ɩlɛnɑ ɩ́ sɩ, ɩ fɛɩ pǝyɑɣɑ.

³⁰Tǝnɑɣɑ nɑɑlɛ nyǝŋ hɔmɑ leelu, hɑlǝnɑ tooso nyǝŋ nɑ́ɑ́ hɔ tɔtɔ.

³¹Pɑ nɑɑtosompɔɣɔlɑɣɑ ŋkɛ kɑ tǝnɑ kɑ sǝpɑɣɑ, ɑlʋ ɩnɩ ɩ tɑ hiki pɑ tɑɑ nɔɣɔlʋ nɑ pǝyɑɣɑ.

³²Pǝ wɑɑlɩ kɛ́ ɑlʋ ɩnɩ ɩ tɛɛsɑ sǝpʋ.

³³Tɔʋ, pɑ tǝnɑ pɑ kpɑɣɑʋ-ɩ mpʋ tɔ, sǝtɑɑ fem wule pɑ tɑɑ ɑweɣelɛ ɑlʋ tʋ?

³⁴Ḿpʋ́ɣʋ́ Yesu cɔ-wɛ sɩ: Antulinyɑ ɩnɛ ɩ tɑɑ cǝnɛɣɛ ɑpɑlɑɑ kpɑkǝɣɩ ɑlɑɑ, nɑ ɑlɑɑ nɑ́ɑ́ sɑɑkɩ ɑpɑlɑɑ.

³⁵Amɑ ɑpɑlɑɑ nɑ ɑlɑɑ mpɑ pɑ kɛ́ sɩ pɑɑ tɛ nɑ pɑ́ fe nɑ pɑ́ cɑɣɑ cele ɑntulinyɑ wei ɩ kɔŋ tɔ ɩ tɑɑ tɔ, ɑkpɑɣɑlɛ kɑɑ wɛɛ tǝnɑ.

³⁶Mpɛ ɩnɩ pɑɑ tɑsǝɣɩ sǝpʋ tɔtɔ, pɑɑ wɛɛ kɛ́ ɩsɩɩ ɩsɔtɑɑ tillɑɑ wɛʋ tɔ. Pɑ fem mpʋ tɔ pɑ pǝsɑ Ɩsɔ piyɑ kɛ́.

³⁷Moisi hʋlɑɑ tǝkelekele kɛ́ sɩ sǝtɑɑ kɑ́ tɛ nɑ pɑ́ fe. Pǝ tɔɔ kɛ́ ɩ yɑɑ Tɑcɑɑ sɩ: Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ, kɛ́ timpi pǝ yɔɣɔtɑ hotiyɑ tɔm tɔ.

³⁸Ɩsɔ kɛ́ weesuɣu nyǝ́mɑ nyǝŋ kɛ́, ɩ tɑ kɛ sǝtɑɑ Ɩsɔ. Ɩsɔ ɩnɩ ɩ tɔɔ kɛ́ pɑ tǝnɑ pɑ wɛnɑ weesiŋ sɩ pɑ́ lɑkɩ ɩ tǝmlɛ.

³⁹Tǝnɑɣɑ Ɩsɔ Tɔm sɛɣɛsǝlɑɑ tɑɑ nɑpǝlɩ pɑ tɔmɑ sɩ: Tɑcɑɑ, n tɩɩ yɔɣɔtɑ teu kɛ́.

⁴⁰Pǝ tɑɣɑ pʋlʋ, pɑ tɑɑ nyɩ nti pɑ́ pɔɔsɩ-ɩ tɔ.

⁴¹Ḿpʋ́ɣʋ́ Yesu pɔɔsɑ Ɩsɔ Tɔm sɛɣɛsǝlɑɑ sɩ: Ɩsǝnɑɣɑ pɑ tɔŋ mpʋ sɩ Mesii kɛ Tɑfiiti pǝyɑɣɑ ye?

⁴²Pǝyele Tɑfiiti mɑɣɑmɑɣɑ nɑ́ ŋmɑɑ ɩ yontu tɑkǝlɑɣɑ tɑɑ kɛ́ sɩ: Tɑcɑɑ Ɩsɔ heelɑ mɑ Sɔsɔ sɩ, cɑɣɑ mɑ kɔŋkɔŋ tɑɑ.

⁴³Hɑlǝnɑ mɑ́ kɔnɑ nyɑ́ kolontunɑɑ nɑ ń loosi nyɑ́ nɔɔhɛɛ kɛ pɑ tɔɔ.

⁴⁴Tɔʋ, Tɑfiiti nɑ́ yɑɑwɑ sɩ Tɑcɑɑ kɛlɛ, ɩsǝnɑɣɑ Mesii nɑ́ɑ́ mǝlɩ nɑ ɩ́ kɛ́ Tɑfiiti pǝyɑɣɑ?

⁴⁵Sɑmɑɑ tǝnɑ tɔŋnɑ Yesu tɔm nɩɩʋ, ɩlɛnɑ Yesu tɔ ɩ ɩfɑlɑɑ sɩ:

⁴⁶Ɩ́ lɑnɑ Ɩsɔ Tɔm sɛɣɛsǝlɑɑ mpɛ nɑ lɑɑkɑlɩ. Pɑ sɔɔlɑ tokonɑɑ sɔsɑɑ suuu kɛ́ nɑ pɑ́ cɔɔkɩ. Pɑ cɑɑkɩ sɩ pɑ́ sɛɛkɩ-wɛɣɛ kʋyɛɛŋ tɑɑ kɛ́. Yutɑ nyǝ́mɑ tǝkotilenɑɑ tɑɑ, teeli teeli tǝcɑɣɑlɛ kɛ pɑ pɛɛkǝɣɩ. Acimɑ tɑɑ, sɔsɑɑ tǝcɑɣɑlɛ kɛ pɑ pɛɛkǝɣɩ nɑ pɑ́ cɑkɩ.

⁴⁷Mpɛ pɑ lɛɛkǝɣǝnɑ leelɑɑ kɛ pǝ tǝnɑ mpi pɛlɛ pɑ wɛnɑ tɔ. Ɩlɛnɑ pɑ́ sʋʋ Ɩsɔ sǝlǝmʋɣʋ nɑ pǝ tɑɣɑlɩ, sɩ pǝ hʋ́lɩ́ sɩ mpɛɣɛ kʋpɑmɑ. Pǝ tɔɔ kɛ́ pɑɑ tɛ nɑ pɑ́ nɑ́ kɑtɑtǝlɑɣɑ.