Luku 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Lɑmpuu mʋlɑɑ nɑ tɛtɛlɑtɑɑ lɛlɑɑ pɑ polɑ Yesu kiŋ kɛ pɑ tǝnɑ sɩ pɑ nɩɩ ɩ tɔm.

²Tǝnɑɣɑ pǝ tɑ mɑɣɑ Fɑlisɑnɑɑ nɑ Ɩsɔ Tɔm sɛɣɛsǝlɑɑ nɑ pɑ tɔ sɩ, Yʋlʋ ɩnɛ ɩnɩ nɑ tɛtɛlɑtɑɑ pɑ cɑkǝnɑ, nɑ ɩ nɑ-wɛ pɑ tɔkǝnɑ.

³Tǝnɑɣɑ Yesu pɔɔsɑ-wɛ sɩ:

⁴Ye ɩsɩɩ mǝ tɑɑ nɔɣɔlʋ wɛnɑ heeŋ ntɛ́ nɩɩnʋwɑ (100), ɩlɛnɑ ɩ tɑɑ kʋlʋm tǝ le, ɩ kɑɑ yele pɔɣɔlɑɣɑfɛɩ nɩɩnʋwɑ ɩnɛɣɛ nyɩɩtʋ tǝtɔɣɔlɛ nɑ ɩ́ tɛɛ nɑ ɩ́ sʋʋ kʋlepu ɩnǝɣɩ pɛɛkʋɣʋ hɑlǝnɑ ɩ nɑ-ɩ?

⁵Ɩ nɑɑ-ɩ mpʋ, ɩlɛnɑ ɩ lɑŋlɛ hʋlʋmɩ teu, nɑ ɩ́ kpɑɣɑ-ɩ nɑ ɩ́ hɔɣɔlɩ.

⁶Ɩ tɑkɩ tǝyɑɣɑ, ɩlɛnɑ ɩ́ yɑɑ ɩ cewɑɑ nɑ ɩ cɔlɔ ɩ cɔlɔ nyǝ́mɑ sɩ: Ɩ́ kɔɔ nɑ mɑ́ nɑ-mɛ tǝ yɔɔlɩ. Pǝ tɑɣɑ pʋlʋ, mɑ nɑ́ mɑ heu wei ɩ kɑ lepɑ tɔ.

⁷Mɑ heeliɣi-mɛ sɩ ḿpʋ́ɣʋ́ pǝ wɛɛ, ye ɩsɑɣɑʋ kʋlʋm yelinɑ ɩ ɩsɑɣɑtʋ, lɑŋhʋlʋmlɛ tɔɔkɩ Ɩsɔ tǝyɑɣɑ tɑɑ kɛ́ ɩ tɔɔ kɛ́, nɑ pǝ́ kǝlɩ kʋpɑmɑ pɔɣɔlɑɣɑfɛɩ nɩɩnʋwɑ mpɑ pɑ fɛɩnɑ tɑɑlɩ nɔɣɔlʋ tɔ.

⁸Nɑ ɩ́ tɑsɑ lɛntɩ tɔtɔ sɩ: Ye ɩsɩɩ ɑlʋ nɔɣɔlʋ ɩ kɑ wɛnɑ liɣitee nyǝɣǝtʋ nɑɑnʋwɑ, ɩlɛnɑ kʋlʋmʋɣʋ le, ɩ mʋsǝɣɩ fǝtǝlɑ kɛ́, nɑ ɩ́ hɑsɑ ɩ tǝyɑɣɑ tǝnɑ nɑ ɩ́ tɑɑsɩ tǝtetete, hɑlǝnɑ ɩ́ kɔɔ nɑ ɩ́ nɑ-kʋ.

⁹Ɩ nɑɑ-kʋɣʋ mpʋ, ɩlɛnɑ ɩ́ yɑɑ ɩ cewɑɑ nɑ ɩ cɔlɔ ɩ cɔlɔ nyǝ́mɑ nɑ ɩ́ tɔ sɩ: Ɩ́ kɔɔ nɑ mɑ́ nɑ mɛ tǝ́ yɔɔlɩ. Pǝ tɑɣɑ pʋlʋ, mɑ nɑ́ mɑ liɣitee nyǝɣǝlʋɣʋ ŋku kɩɩ lepɑ tɔ.

¹⁰Mɑ heeliɣi-mɛ sɩ ḿpʋ́ɣʋ́ pǝ wɛɛ, ye ɩsɑɣɑʋ kʋlʋm yelinɑ ɩ ɩsɑɣɑtʋ, Ɩsɔ ɩsɔtɑɑ tillɑɑ lɑŋɑ hʋlʋmɑ teu kɛ́.

¹¹Ḿpʋ́ɣʋ́ Yesu tɑsɑ-wɛɣɛ ɩsɔ sɛɛʋ sɩ: Apɑlʋ nɔɣɔlʋ ɩ kɑ wɛnnɑ pǝyɑlɑɑ nɑɑlɛ.

¹²Ḿpʋ́ɣʋ́ sǝkpelu nyǝŋ tɔmɑ ɩ cɑɑ sɩ ɩ́ cɛlɛ-ɩ pɑ wontu hɔɣɔlʋɣʋ ŋku ɩnɩ ɩ kɑɣɑ ɩ hiki pɑ cɑɑ ɩnɩ ɩ sǝm wɑɑlɩ tɔɣɔ kpɑkpɑɑ. Ḿpʋ́ɣʋ́ pɑ cɑɑ tɑlɑ-wɛɣɛ ɩ wɛnɑʋ.

¹³Pǝ lɑpɑ wɛɛ nɑɑlɛ, ɩlɛnɑ sǝkpelu nyǝŋ pɛɛtɩ ɩ nyǝm tǝnɑ, nɑ ɩ́ koti liɣitee nɑ ɩ́ sʋʋ nyɩɩtʋ tǝyutulu. Ɩ tɑlɑ tǝnɑ ɩlɛnɑ ɩ́ sʋʋ tǝkpɑɑlǝtʋ lɑpʋ, nɑ ɩ́ tɔɣɔ ɩ liɣitee tǝnɑ tǝpɑɩpɑɩ.

¹⁴Ɩ tɛmɑ ɑ tǝnɑɣɑ tɔɣɔʋ kɛ mpʋ, ɩlɛnɑ nyɔɣɔsɩ ɑnɑɑm nɔɣɔlʋ ɩ́ lɩɩ ɩcɑtɛ ntɛ́ tǝ tɑɑ. Ḿpʋ́ɣʋ́ ɩ sʋʋ wɑhɑlɑ tɑɑ.

¹⁵Tǝnɑɣɑ ɩ polɑ ɩcɑtɛ tʋ nɔɣɔlʋ ɩ kiŋ nɑ ɩ́ sǝlǝmɩ tǝmlɛ. Ɩlɛnɑ ɩ́lɛ́ ɩ ponɑ-ɩ tɑɑlɛ sɩ ɩ́ nyǝnǝɣɩ ɑfɑnɑɑ.

¹⁶Ɩ nyɩɩlɑ teu ɩsɩɩ pɑɑ ɑfɑnɑɑ tɔɣɔnɑɣɑ mɑɣɑmɑɣɑ ɩ́ tɔɣɔ, ɑmɑ ɩ tɑ hiki.

¹⁷Tǝnɑɣɑ ɩ cɑɣɑɑ nɑ ɩ́ kpɑɣɑ hʋwɛɛ nɑ ɩ́ mɑɣɑsɩ ɩ tɩ tɔm, nɑ ɩ́ tɔ sɩ: Hɑlɩ pɑ́ tɔ sɩ mɑ cɑɑ tǝyɑɣɑ tɑɑ kɛlɛ tǝmlɛ nyǝ́mɑ tɔɔ sɔsɔm, nɑ pɑ́ tɔkɩ nɑ pɑ́ kpisiɣi, nɑ nyɔɣɔsɩ nɑ́ɑ́ kʋɣɩ mɑɣɑ cǝnɛ.

¹⁸Mɑɑ kʋlɩ kɛ́ nɑ mɑ́ mǝlɩ mɑ cɑɑ tɛ. Mɑ tɑlɑɑ mɑ heeli-ɩ sɩ: Pɑɑpɑ, mɑ pǝntǝnɑ Ɩsɔ, nɑ mɑ pǝntǝnɑ nyɑ́ tɔtɔ.

¹⁹Pǝnɛntɛ mɑ tɑ nǝɣǝsǝnɑ sɩ ń yɑɑ-m nyɑ́ pǝyɑlʋ. Amɑ nyǝnǝɣɩ-m teitei ɩsɩɩ n nyǝnʋɣʋ nyɑ́ tǝmlɛ nyǝ́mɑ tɔ.

²⁰Tǝnɑɣɑ ɩ kʋlɑɑ nɑ ɩ́ kpɑɣɑ mpɑɑʋ sɩ ɩ kpeŋ ɩ cɑɑ tɛ. Ɩ kɔmɑ ɩ́ wʋsǝnɑ tǝyɑɣɑ, ɩlɛ ɩ cɑɑ loosɑ-ɩ kɛlɛ, nɑ ɩ tɔm lɑpɩ-ɩ pǝtɔɔtǝlɛ kɛ sɔsɔm. Tǝnɑɣɑ ɩ́lɛ́ ɩ se lɔŋ nɑ ɩ́ sǝŋɩ-ɩ, nɑ ɩ́ kpipi-ɩ nɑ ɩ́ wɑɣɑlɩ-ɩ.

²¹Ḿpʋ́ɣʋ́ ɩ pǝyɑlʋ ɩnɩ ɩ tɔmɑ-ɩ sɩ: Pɑɑpɑ, mɑ pǝntǝnɑ Ɩsɔ, nɑ mɑ pǝntǝnɑ nyɑ́ tɔtɔ. Mɑ tɑ nǝɣǝsǝnɑ ń yɑɑ-m nyɑ́ pǝyɑɣɑ tɔtɔ.

²²Tǝnɑɣɑ ɩ cɑɑ tɔmɑ ɩ pǝyɑlɑɑ sɩ: Ɩ́ kɔnɑ toko kʋpɑmpɑŋ kɛ lɔŋ nɑ ɩ́ suu-ɩ. Ɩ́ lɛɛ-ɩ kukuule kɛ ɩ mpǝle tɔɔ, nɑ ntɑŋkpɑlɑ kɛ ɩ nɔɔhɛɛ tɑɑ.

²³Ɩ́ kɔnɑ tɑ nɑʋ wei ɩnɩ ɩ wɛnɑ nim kɛ teu tɔ nɑ ɩ́ kʋ, nɑ tǝ lɑ tɔɣɔnɑɣɑ kʋpɑŋkɑ.

²⁴Mɑ pǝyɑlʋ ɩnɛ pǝ wɛ ɩsɩɩ ɩ sǝpɑɣɑ nɑ ɩ́ fe. Ɩ kɑ lepɑɣɑ nɑ mɑ́ hii-ɩ. Tǝnɑɣɑ pɑ nikɑ ɑcimɑ tɔɣɔʋ kɛ kpɑkpɑɑ.

²⁵Pǝ lɑkɑɣɑ mpʋ tɔ, pǝ pɑmnɑ pǝyɑlʋ sɔsɔ nɑ́ɑ́ wɛnɑ tɑɑlɛ. Ɩ́lɛ́ ɩ kɔmɑ ɩ́ lɩɩnɑ tɑɑlɛ nɑ ɩ́ wʋsǝnɑ tǝyɑɣɑ, ɩlɛnɑ ɩ́ nɩɩ soo nɑ pɑɑlɛ pǝ hɑŋɑ kɑɩɩɩ.

²⁶Tǝnɑɣɑ ɩ yɑɑ ɩ tǝmlɛ nyǝ́mɑ tɑɑ nɔɣɔlʋ, nɑ ɩ́ pɔɔsɩ-ɩ sɩ: Pepe lɑpɑ nɑ pǝ hɑŋɑ mpʋ?

²⁷Ɩlɛnɑ ɩ́lɛ́ ɩ cɔ-ɩ sɩ: Nyɑ́ neu ɩ́lɛ́ ɩ mǝlǝnɑ, nɑ mǝ cɑɑ kʋ tɑ nɑʋ wei ɩnɩ ɩ wɛ nim kɛ teu tɔ. Mpi tɔ ɩ tɑsɑ-ɩ nɑʋ nɑ ɩ ɑlɑɑfǝyɑ tɔ pǝ tɔɔ.

²⁸Ḿpʋ́ɣʋ́ ɩ pǝyɑlʋ sɔsɔ ɩnɩ ɩ mʋ pɑ́ɑ́nɑ́ nɑ ɩ́ kisi tǝyɑɣɑ sʋʋʋ. Ɩlɛnɑ ɩ cɑɑ lɩɩ nɑ ɩ́ pɔɔlɩ-ɩ sɩ ɩ́ sʋʋ.

²⁹Tǝnɑɣɑ ɩ tɔmɑ ɩ cɑɑ sɩ: Nyǝnɩ, pɩɩsɩ pɑɣɑlɛ ntɔ mɑ hɑlǝɣɩ nyɑ́ tɑɑlɛ, nɑ n yɔɣɔtɑ nti mɑɑ kpɛɛsǝɣɩ. Nɑ pɑɑ kʋyɑkʋ kʋlʋmʋɣʋ n tɑ tɔntɑ sɩ, ooo mɑ pǝyɑlʋ, kpɑɣɑ pinɑɣɑ kɑnɛ, nɑ nyɑ́ nɑ nyɑ́ tɑɑpɑlɑɑ ɩ́ leɣelinɑ.

³⁰Nyɑ́ pǝyɑlʋ kɔmɑ tɔ, n kɑ yele tɑ nɑʋ wei ɩnɩ ɩ wɛ nim kɛ teu tɔɣɔ kʋɣʋ nɑ? Pǝyele ɩnɩ ɩ kpɑɣɑnɑ nyɑ́ wɛnɑʋ tǝnɑ tǝpɑɩ, nɑ ɩ́ polo nɑ ɩ́ wɑkǝlǝnɑ ɑcɑcɑɑlɛ.

³¹Tǝnɑɣɑ cɛcɛ cɔ-ɩ sɩ: Mɑ pu, nyɑ́ wɛ mɑ kiŋ kɛ́ tɑm kɛ́, nɑ pǝ tǝnɑ mpi mɑ tɩ tɔ nyɑ́ tǝnnɑ tɔtɔ.

³²Pǝ mʋnɑ tǝ lɑ ɑcimɑ kɛ́ nɑ tǝ yɔɔlɩ. Nyɑ́ neu ɩnɛ, pǝ wɛ ɩsɩɩ ɩ sǝpɑɣɑ nɑ ɩ́ fe. Ɩ́ kɑ́ lepɑɣɑ nɑ mɑ hɩɩ-ɩ.