1Manaŋgopieŋ, Wofuŋ e mâreŋ ima bame tuhu fuarâ foocmu, ehame mâreŋ hetikiehuc ŋecjucfâc‐ticne bâtâtiec‐jopaocmu.
2Eme ŋic omane mecne, taha bapa mecne, kiŋaŋŋic mecne, bomboŋ‐ticne mecne, kiŋaŋ ŋokac mecne, ŋokac bomboŋ‐ticne mecne, âbârâ ŋic mecne, furi bapa ŋic mecne, wiac jaba babaju mecne, rune mecne, moneŋ jaba babaju mecne, moneŋ rune mecne jaŋe sasawa sâc mocjaha fua‐jare‐fâreocmu.
3Mâreŋ i ima bajâmbâŋkeme tuhu jâmbâŋ fuarâ foocmu; Wofuŋzi irec dâŋ muwec hâcne.
4Mâreŋ e kereŋkehuc fâucke ʒaŋ ekac, â mâreŋ sâko mâreŋ e weaŋkehuc bâŋeŋkekac, erâ mâreŋŋic fekicne jaŋe docke betaŋ eŋgopieŋ.
5Mâreŋ ŋecjucfâc‐ticne jaŋe sâcmutâc â dâŋsanaŋ qatarahuc ʒâʒâfic fofo sanaŋ hetâcnembiŋ iŋuc ehuc mâreŋ gâc hecnembiŋ hâcne.
6Irec Wofuŋzi mâreŋ sâweckehame fainao jueŋgopieŋ jaŋe kiŋjeŋicte okacne fisi‐jareocmu; ehame mâreŋ ŋecjucfâc‐ticne gâcne sâko sipirickepie ŋic afecne sawa juniŋmu.
7Waiŋ opâzi sâqorekac, waiŋ qizecne hâmo ʒaŋ ekac â bubiaŋ faio jumbiŋ jaŋe ki busâqoc eŋgopieŋ.
8Woŋgâŋ fânâŋ aŋacne i niniŋkekac, bubiaŋ manaeŋgopieŋ jaŋere ʒeri gae i omaekac â mimi ŋokac dâŋte bubiaŋ mamana i tarakac.
9Jaŋe ʒeri gae hehuc waiŋ opâ nânâ i mocwâc mi eniŋmu â opâ sanaŋ nâeŋgopieŋzi manapie aŋac tâmiric eocmu.
10Hae sâko i ima bakicne sesuctac fokac, ficticne sasawa ki bafârekicnere moczi moc sâcne mi feocmu.
11Hae hatao waiŋ opâre ki busâqoc eŋgopieŋ, bubiaŋ sasawa i tara‐fârewec, hae sâc aŋac ʒeri fowec i omaewec.
12Hae ima bakicne fokac â motâc sâko‐ticne henʒaŋ qanʒaŋnekicne.
13Mâreŋte faio ŋic gurune gurune jaŋere ŋondeŋko oliwa jâc itiriŋkepie hândâŋne wahaekac irec sâc fuaocmu hâcne, me waiŋ fâri fufua dameŋ tarame hândâŋ tiwâne ro nusec eeŋgopieŋ irec sâc.
14Ŋic jaŋe marac fânâŋ‐jeŋic bafehuc ʒeri eŋgopieŋ, Wofuŋ ɋuŋɋasaŋ‐ticnere semuja hepie fânâŋne ʒoaŋ huhunaonec ware fisikac.
15Irec ʒoaŋ wewefunao mâreŋ forakac sâc Wofuŋ muteŋ bâteŋ ecneniŋ â hâwec heririŋko ira Wofuŋ, Israere Anutu ʒâŋe‐ticne muteŋkeniŋ!
16Mâreŋ qaŋeŋnaonec mumuteŋ gae irec fânâŋ ʒiŋuc wareme manambeŋ: “Tiŋne rune e mumbiaŋkezo!” Noni ine mukopac: “No sâqorerâ betaŋkehuc jukopac, jei, no wenac epe? Fiuc rorozi fiuc roeŋgopieŋ, fiuc roro jaŋe momori ehuc fiuc rojâmbâŋkeeŋgopieŋ.”
17Mâreŋ ŋecjucfâc‐ticne ŋoŋere faio wiac hâhâwicne feha nombâŋ roŋareniŋmu â bitiŋ râe‐ŋareniŋmu.
18Eme ʒiŋuc fuaocmu: Moc e wiac hâhâwicnere fânâŋte wiseocmu e nombâŋko huocmu, â moc e nombâŋkonec wefuocmu e bitiŋzi kiocmu. Hoe micsâko heocte faic motâc aaŋ fokac â mâreŋte hobeteŋ i qiriŋ qakac hâcne.
19Mâreŋ e fâuckeme hârâc fuakac, mâreŋ e hahaŋkerâ ʒaŋkekac, mâreŋ e mâretec qiriŋ qahuc fokac.
20Mâreŋ e ŋic moc maŋne bibiriwame biric boroc eekac iŋuc eocmu, me boze burec burec mac bakicne iŋucne qiriŋ qaocmu, sindaŋ‐ticnezi bâmâckeme waha qarâ mocwâc fahareocte eipieocmu.
21Eme dameŋ ira Wofuŋzi sambâŋ momori jaŋe sambâŋko ba bâtiŋ ejareocmu â mâreŋ ŋicwofuŋ jaŋe mâreŋko ejareocmu.
22Ehuc kâpâcwâru ŋic iŋucne hetumaŋ‐joparâ nombâŋko behec‐jopame huniŋmu â kâpâcwâru ficko râec‐joparâ motâc basanaŋkeocmu eme ʒoaŋ bocjaha tarame dâŋjeŋic mutara‐jareocmu.
23Iŋuc fuame mosazi bâruŋkeocmu â ʒoaŋ tatamaczi weaŋkeocmu; Anutu Tâpiri Ɋuŋɋasaŋ Wofuŋ e ŋicwofuŋ guriŋ bapa gie‐ticne Zioŋ tikio â Jerusalem haeo fuŋkeocmu hâcne; ehuc eri qaraweŋ‐ticne i micnefâcne jaŋere maio bataniŋkeocmu.
