1Dameŋ ira Juda mâreŋko gae kecʒiŋuc heniŋmu: “Nâŋe hae sanaŋ‐nâŋec ŋekac, Wofuŋzi ŋezickeocte qânâsac sanaŋ maŋne sahacne bacnewec.
2Sacmotâc ropie aŋkeoc, eme ŋic tiŋnezi siocmâc jueŋgopieŋ jaŋe haeo fenʒepieŋ.
3Moc e maŋticne gorao fosanaŋkeocmu e hâcne wama bâfuacnecmu, e gorao roweckekac irec.
4Dameŋ sâc Wofuŋtao roweckehuc junʒepieŋ, Wofuŋ Anutu e hâcne haroŋaŋ ŋeŋe sanaŋ.
5Eki hâcne hae ʒâŋe biŋe‐ticnehec ira ŋec juc embiŋ jaŋe bawahac‐jopawec, ehuc hae sanaŋ i hetâtiewec, hetâtie‐jâmbâŋkeme mâreŋko waha qawec, erâ rufemaŋko tuŋkeme hurâ fowec.
6Ehame qarâ suriŋne â waha qaqane jaŋe kikezi âtenʒaŋnenʒepieŋ.”
7Ŋic tiŋne jaŋere hata i fâretiŋ fokac, goki hâcne tiŋne jaŋere hata hewâneŋkeekomec.
8O Wofuŋ, mumutiŋ dâŋgere mamanac jueŋgopeneŋ, ehuc maŋ qâqâtâc‐nâŋeczi ʒâŋegere â mumuteŋgere ecneekac.
9Maŋ qâqâtâc‐nanezi ŋafeo gore ecneekac, â mârozi maŋnaneo juekac, e wira basac egareekac. Eme mumutiŋ dâŋgezi mâreŋko fuame mâreŋ sâko mâreŋ ŋecjucfâc‐ticne jaŋe tiŋnere fuŋne mananiŋmu hâcne.
10Ŋic hehesicnezi ine aki anonocte fârine fuacneme sifu tiŋne jujure fuŋne mi manaocmu. Aricne, e Wofuŋte maqâreŋ hone‐bipiehuc mâreŋko eebapa tiŋne fokacko sifu sindaŋ eocmu jaha.
11O Wofuŋ, mege bâfeŋnetec domaha sifu mi honeŋgopieŋ; ŋicfâcge jaŋere erâ ʒoɋac bâfuaekic i honerâ mimienʒepieŋ, râsifâcge jaŋere erâ kimbeŋgere ʒoc bâruŋkekac izi ʒâseŋ‐jopazejec.
12O Wofuŋ, nâŋe ine wama bâfua‐nârezemec, nâŋe wiac ebac embeŋ sâc i goki hâcne bafic‐nâpotec bafârembeŋ.
13O Wofuŋ, Anutu‐nâŋec, goki sawa mâcne, wofuŋ gâcne jaŋe bomboŋ enârembiŋ wâc, mâc gore mocjaha manasuhuc ʒâŋege muteŋkehuc juŋgopeneŋ.
14Hâmombiŋ jaŋe ɋârerâ mocwâc mi juniŋmu; hâmokicne jaŋe mi fahareniŋmu; goki irec hâcne iqic‐jopahuc bâsirowec‐jopameŋ, iŋuc etec jaŋere nikec‐nâpo sanaŋkewec.
15Ŋifec ine Israe ŋic basawec‐nâpomeŋ, o Wofuŋ, basawec‐nâpomeŋ hâcne, ehuc huriri qâreŋge bataniŋkerâ mâreŋ‐nâŋecte ma sasawa bâsoka‐fâremeŋ.
16O Wofuŋ, nâŋe ʒârâ hâriŋko juhuc, wira basac egarembeŋ, goki ba bâtiŋ enârehaŋte saŋucko numu‐garembeŋ.
17Ŋokac kiwecheczi motec roocte dameŋ maickeha gozi kime risimbiŋne qahuc owackeekac irec sâc jaha gore maio fua‐nârewec, o Wofuŋ!
18Nâŋe kiwechec juhuc gozi kicnâpowec, eme motec ropene mâŋâŋ ewec; mâreŋte bâbâpiaŋ bâfuanaŋte eipiembeŋ â mâreŋ sâko mâreŋ ŋecjucfâc‐ticne mi fuambiŋ.
19Hâmokicnefâcge jaŋe ine ɋârerâ juniŋmu, â qâŋɋâŋfâc‐jeŋic jaŋe fahareniŋmu, rufemaŋko foraŋko foraŋgopieŋ ŋoŋe mana ɋâɋârerâ ʒeri eniŋ; titikucge i tatamacte titikuc hâcne, irec mâreŋzi ŋic hâmocne bârisiec‐jopaocmu.
20Ajoc, ŋicfâc‐nane ŋoŋe ficmaŋ‐ŋeŋicko raʒirâ motâc basanaŋkeniŋ, erâ dameŋ bembeŋne mac soŋkerâ juhapie kimbeŋzi mâteŋkezejec.
21Manaŋgopieŋ, Wofuŋ e mâreŋŋic hehesic‐jeŋicte okacne bazu‐jareocte biac hae‐ticne beherâ warezo ekac; eme mâreŋ e jahac fai‐ticnao soc hoŋkekicne i bataniŋkeocmu, ehuc qâhâmoc‐jopakicnefâc‐ticne mocwâc mi ŋemac‐jopaocmu.
