1Jei, Eferaimte hae biaŋ, go ŋic waiŋ opâ gapecmâc nâeŋgopieŋ jaŋere hae; go ŋic waiŋ opâzi maŋ bâsifuc ejareha qizec‐jeŋicko eriduzi joŋtawezo ekac iŋucne.
2Manaŋgopieŋ, Wofuŋ e ŋic qac momori â tâpirihec moc jucnekac, eki hâcne fisirâ hoe sanaŋ aisihec â mâŋâŋ ɋicwânʒâŋnehec â hoe micsâko rumi bâbâfuane iŋucne ehuc ŋic qârândiŋ‐jopame mâreŋko waha foniŋmu!
3Eferaim maŋsifuc opâ nâ areŋ eene jaŋere eridu hone aŋacne, hae‐jeŋic hâcne, i kikezi âtenʒaŋneniŋmu.
4Ehame mâreŋ guecnehec irec heririŋnao tiki faio eridu hone aŋacne joŋtawezo ekac, i fâri fufua dameŋ maickezo eha nemuja hândâŋnao eeŋgopieŋ sâc ijaha ecneniŋmu, ine kecʒiŋuc, ŋiczi hone aŋac ehuc izia batararâ nâeŋgopieŋ.
5Dameŋ ira Anutu Tâpiri Ɋuŋɋasaŋ Wofuŋ e jahac ŋicfâc‐ticne nâfocne eri hendiŋ â fiŋe biri biaŋ ejareocmu.
6Ehuc mumutara ŋic e mâro‐ticne râcneocmu â râsi hae motâckonec jâpec‐jopaniŋmu jaŋe tâpiri sâko qikiŋne‐jareocmu.
7Eme jaŋe iŋuc jaha waiŋ opâ nâku maŋjeŋic sifuckeekac, â opâ sanaŋ nâku biric boroc eeŋgopieŋ. Taha bapa â porofete jaŋe opâ sanaŋ nâku maŋjeŋic sifuckeekac; waiŋ opâzi jopaekac hâcne. Jaŋe opâ sanaŋ nâku maŋjeŋic bibiriwame findaŋdâŋ musifuckeeŋgopieŋ â dâŋ mumutarao biric boroc eeŋgopieŋ.
8Tebo fainao wiac mamaŋune fofâreekac â sohoŋ goteŋzi wiac sasawao bohotaekac.
9“Hâc, porofete e mamana i mo ŋic mo qazucneocte mukac â findaŋdâŋ i mo ŋic mo âzâcne mutâc eocte mukac? Motec geune â moŋ miŋecne mac qikiŋnekicne jaŋe me?
10Dâŋ ʒiŋuc fuaekac: Moc ʒi ec, moc keci ec, moc ʒi bac, moc keci bac, ʒira piticne moc, kecira piticne moc.”
11Oc, Wofuŋ e dâŋ mi manaeŋgopieŋko â marac furuo ŋicguru ʒi dâŋ jazaocmu.
12Ʒiŋuc jazawec eki hâcne iŋuc eocmu: “Jujumana hae ʒine hâcne, tâpiri‐jeŋic betaŋkekicne jaŋe ejarepie jumananiŋ; jujumana toma ʒine hâcne.” Jaŋe ine dâŋ i manazore mi ejarewec.
13Irec Wofuŋte dâŋ jaŋerao kecʒiŋuc fuaocmu: “Moc ʒi ec, moc keci ec, moc ʒi bac, moc keci bac, ʒira piticne moc, kecira piticne moc.” Eme jaŋe hatao rahuc rârâpe waha jopame me kike‐jeŋic hericke ʒaŋ ezejec, me uficko jowapie rocjopanʒepieŋ.
14Irec âke sisic ŋicbomboŋ ŋoŋe Wofuŋte dâŋ mananiŋ, Jerusalem ŋic ŋokac keci jaŋere micnefâc ŋoŋe!
15Ʒiŋuc muŋgopieŋ hâcne: “Hâmochec biac muc manac embeŋ, â hâmoc haehec ʒâʒâfic‐nâŋec fokac; irec sisipiricte rumi sâko fisi fotâcneocmu izi nâŋe mi rocnâpoocmu; bureczi sac hafembeŋ izi sâoc‐nâpokac, â eeatuczi boze bambeŋ ira soŋkeŋgopeneŋ.”
16Irec Wofuŋ Anutuzi kecʒiŋuc mukac: “Mananiŋ, no Zioŋko ŋesiŋ sanaŋ fuaocte qânâ hekopac, qânâ i qânâ saric, esâicke honekicne, tuturuŋte qânâ furi sâko, keteŋke‐hâmokicne: ‘Manasiŋkeocmuzi docke pârâc mi eocmu!’
17Eme mupe mumutiŋ dâŋzi sâcmeda ezejec, â tiŋne jujuzi sigeli ezejec, ehame hoe sanaŋzi burecte sac henʒaŋneocmu, â opâ rumizi eeatucte boze qâuruckeocmu.”
18Dameŋ ira hâmochec mucmanac‐ŋeŋic fârimâc eocmu, â hâmoc haehec ʒâʒâfic‐ŋeŋic tâcne ʒaŋ eocmu; eme sisipiricte rumizi fotâcnehuctecne qanʒaŋ‐ŋopame mâreŋko waha qarâ foniŋmu.
19Dameŋne dameŋne fotâcneocmu sâc rocŋopaocmu, hae fureocmu sâc fisirâ fotâcneocmu, ʒoaŋko mecne, ŋafeo mecne. Eme findaŋdâŋ manaeŋgopieŋ jaŋe bipic‐jeŋic taraocmu.
20Fofo i bembeŋnere fainao fâretiŋ fofore sâc mi ekac â bilaŋke i piticnere rufazore eipieŋgopieŋ.
21Wofuŋ e gie‐ticne fuŋmoc i bataraocte â eebapa bipic tataranehec i eocte Perazim tikio ewec iŋuc jaha ehuc fahareocmu â Gibeoŋ wâneŋko ewec irec sâc jaha ehuc aaric sâko manaocmu.
22Niŋgiŋ‐ŋeŋic sanaŋke‐ŋarezacte mu âke sisic‐ŋeŋic ʒiŋuczia behenʒepieŋ; manaŋgopieŋ, no Anutu Tâpiri Ɋuŋɋasaŋ Wofuŋ eraonec dâŋ ʒiŋuc manapo: Mâreŋne mâreŋne sisipiric sâko fuaocte mupaŋkekicne.
23Ŋoŋe hazec râerâ micfânâŋ‐nane mananiŋ; niniŋkerâ dâŋnane mananiŋ!
24Hesarac ŋic jaŋe sara mama eniŋte gie ʒuʒuhuc jaha he rikec eeŋgopieŋ me? Me mâreŋ‐jeŋic ʒuʒuhuc jaha hefâuckehuc hec hetikic eeŋgopieŋ me?
25Aricne, jaŋe mâreŋ bâburockerâ monʒaŋ wiac irec hândâŋne tieeŋgopieŋ â padi jacgoŋ mâreŋ bâwosâekicnao birio râerâ qaŋeŋnao sâo wiac saraeŋgopieŋ. Me iŋuc mi eeŋgopieŋ me?
26Iŋuc hâcne epie sâckeocte Anutu‐jeŋiczi jaza mutâc eekac.
27Jaŋe padi hândâŋne i paraŋzi me keretacte ʒafeŋgâŋzi mi hemârâŋkeeŋgopieŋ, aricne, ɋaruczi qapie ŋemârâŋkeekac.
28Padi hândâŋne qanʒaŋnezo me? Aricne, jaŋe ʒuʒuhuc jaha qâmârâŋkehuc iŋuc mi eeŋgopieŋ â becâsicfâc‐jeŋic keretachec ejarepie padi faio rac warec ehuc kosa mi âtenʒaŋneeŋgopieŋ wâc.
29I Anutu Tâpiri Ɋuŋɋasaŋ Wofuŋ ere micte jaha iŋuc eeŋgopieŋ; ere mamana biri i qame hukicne, erâ wiac eme bame biaŋkeekac.
