1Wofuŋzi ʒiŋuc mukac: “Mumutiŋ dâŋ soŋaŋkenʒepieŋ â eebapa tiŋne bâfuanʒepieŋ, bâbâpiaŋ‐nane fuaocte â tiŋne juju‐nane fua taniŋkeocte dameŋne bembeŋkekac hâcne.
2Ŋic moc e iŋuc eocmu ere manape ʒerine eocmu, â ŋic moc e hata i basanaŋkehuc sabata hombaŋ mi sipirickeocmu â meticne gie sâqocne bazacte soŋaŋkeocmu ere wâc manape ʒerine jaha eocmu.”
3Ŋic jabane Wofuŋtao roweckeekaczi ʒiŋuc mi muzejec: “Wofuŋ e ŋicfâc‐ticne jaŋeraonec behecnu‐jâmbâŋkekac”; erâ aputac bakicnezi ʒiŋuc wâc mi muzejec: “Manakic, no jâc hâmocne iŋucne.”
4Wofuŋ e ʒiŋuc mukac hâcne: “Ŋic aputac bacjopakicnezi sabata hombaŋ‐nane ŋefârehuc wiac aŋacnuekac i bâwosâerâ ʒâʒâfic‐nane sanaŋne bajuniŋmu,
5jaŋe ficnaneo â haemaŋ‐naneo ma â ʒâŋe jarepemu, izi naru motechec juju sirickeocmu; no ʒâŋe fofo sanaŋ, mi hehetâmirene moc jarepemu hâcne.
6“Eme ŋic furunezi Wofuŋ kiŋaŋ qacneniŋte â Wofuŋ ʒâŋe‐ticnere aŋac‐jopaha kiŋaŋ qaqafâc‐ticne erâ juniŋte erao qohotaeŋgopieŋ, â ŋic sasawa sabata hombaŋ mi sipirickeeŋgopieŋ erâ ʒâʒâfic‐nane soŋaŋkerâ bajueŋgopieŋ,
7jaŋe hâcne tiri tiki‐naneo jowac‐jopa fepemu, erâ nunumu ficnaneo bubiaŋ qajarepemu; qowi hâcbuc ririkene â taha bâzi‐jeŋic i alata‐naneo rikepie mana aŋac epemu; ficnanere ʒâŋe ʒiŋuc muzo hâcne: Ŋic gurune gurune jaŋere nunumu fic.
8Israe ŋic bâtâtiec‐jopakicne bâtumaŋ‐jopaekac, Wofuŋ Anutu hâcne e ʒiŋuc mukac: No hetumaŋ‐jopakicnefâc‐jeŋic jaŋerao ŋic gâcne wâc ʒuhuc‐jopahuc jupemu.”
9Sopâc qowi sasawa â kâte qowi sasawa ŋoŋe ware nânâ nâniŋ!
10Israere ruc bapa ŋicfâc jaŋe ʒâŋe tiŋtuŋ, jaŋe mamana tâmiric sasawa, jaŋe qâto dâŋemâcne sasawa, qâŋkeniŋte eipieŋgopieŋ, jaŋe mâc fohuc guŋ manaeŋgopieŋ, otec fofore boc aŋac‐jopaekac hâcne.
11Jaŋe qâto iŋucne nânâ âmbâŋ nâpie moc mi gapec‐jopaekac. Lama soŋaŋ jaŋe mamana tâmiric jaha, jaŋe ʒeŋgoma jaŋacne hatao raeŋgopieŋ, jaŋe ru sâc moneŋ mafa huhure‐jeŋicte sawa manasueŋgopieŋ.
12Ehuc mueŋgopieŋ: “Warepie waiŋ opâ rorâ nanaŋ, opâ sanaŋ âmbâŋ nânʒepeneŋ; eme miŋecgac fuakac sâc ijaha tomâcko fuazejec, erâ mocwâc aŋac ʒizinehec ezejec.”
