1Jei, Ariele, Ariele hae sanaŋ go! Dawidizi mârâc jaha rucgurâ basanaŋguwec! Ŋoŋe jara moc tarame sâc moc ʒuhuckerâ jufenʒepieŋ, ehuc hombaŋ fuame sâc ŋehuc junʒepieŋ.
2No Ariele bâʒâickepe busâqoc â kio owa fuazejec, eme Ariele fârine ŋenarezejec.
3No rârec rârec toma âterâ momori râec‐jopape jaŋe somâcguhuc sac bagareniŋmu.
4Eme mâreŋko fohuc dâŋ mutec wefuocmu â micfânâŋge rufemaŋko fuaocmu; ehame micfânâŋge i bawe micfânâŋ tinac mâreŋmaŋkonec wefuocmu, â dâŋmaracgezi rufemaŋkonec saŋuc tinac wefuocmu.
5Râsifâcge guru sâko jaŋe ine rufe uuc iŋucne tâtienʒepieŋ, â bâbâʒâicfâcge guru sâko jaŋe mâŋâŋzi jawa ficne sueme wiseekac iŋucne enʒepieŋ. Ehame ututuŋ jâmbâŋ ʒiŋuc fuaocmu:
6Anutu Tâpiri Ɋuŋɋasaŋ Wofuŋ e ɋuŋ parandaŋ â homeŋ â fânâŋ sâko â hoe mâŋâŋ ɋicwânʒâŋnehec â ʒocbâruŋ ʒa ʒâtâc eene irec maŋnao juhuc iqicguocmu.
7Eme ŋicne ŋicne Ariele râsi ecneeŋgopieŋ sasawa jaŋe mecne erâ e jahacne â sacsanaŋ‐ticne ʒika bâfuacnehuc imackeeŋgopieŋ jaŋe mâmâc ŋafeo guŋko wiac hone manac epene fâri tâmiric eekac irec sâc efârenʒepieŋ.
8Ʒiŋuc fuaocmu: Ŋic moc nânâre hâmorâ “nânâ nâkopac” guŋko iŋuc manasuhuc mana ɋâɋârerâ nânâ fârine basaocmu, me moc e opâre hâmorâ “opâ nâkopac” guŋko iŋuc manahuc mana ɋâɋârerâ opâre hâmohuc jaha betaŋkeocmu, irec sâc jaha ŋicne ŋicne sasawa Zioŋ tiki râsi ecneniŋmu jaŋe fua‐jarezejec.
9Maŋŋeŋic omaeha bipic tatara eŋarezejec, ŋaŋac ʒâŋe‐ŋeŋic bâsoŋkerâ tiŋtuŋ qanʒepieŋ! Erâ waiŋ opâ mi nâhuc maŋsifuc eŋarezejec, erâ opâ sanaŋ wâc mi nâhuc biric boroc enʒepieŋ.
10Wofuŋzi mutara‐ŋareme guŋ qâmâc‐ŋopawec, â ʒâŋe hândâŋfâc‐ŋeŋic, porofete hâcne, jaŋe bâhâpoc‐jopawec erâ qizecfâc‐ŋeŋic, findaŋdâŋ mumuŋic hâcne, jaŋe qârufac‐jopawec.
11Eme wiac kecirec bararuŋ dâŋ mukicne sasawa i ŋoŋe manapie papia qizec sâfâzi basanaŋkekicnao dâŋ fokac irec sâc ekac. I ŋic jaŋe âgo‐jeŋic moc wowosere fuŋne mamana ʒiŋuc muhuc râcneniŋmu: “Ʒi moc wosec,” eme muocmu: “Sâfâzi basanaŋkekicnere sâcne mi wosepemu.”
12Me ŋic moc wowosere fuŋne mi mamana e râcnehuc muniŋmu: “Ʒi moc wosec,” eme muocmu, “No wowosere fuŋne mi manakopac.”
13Eme Wofuŋzi muwec: “Ŋicguru ʒi jaŋe mâc sahaczi sawa mai enarerâ micbipic‐jeŋiczi sâsecnuhuc maŋjeŋiczi ine qikiŋnueŋgopieŋ; erâ araŋ banareeŋgopieŋ i ŋicdâŋ mu qaqazuc ehuc sawa eeŋgopieŋ.
14Manaŋgopieŋ, no irec hâcne ŋicguru ʒi jaŋerao wiac qeŋ bipinehec mocwâc bâfuapemu, wiac bipinehec â ʒâŋe furu hâcne, ehame mamana ŋicfâc‐jeŋic jaŋere maŋɋârâŋzi omaezejec â mamana tarazi aputac ezejec.”
15Jei, dâŋ manasu biric erâ Wofuŋte maio sanaŋne hesoŋkeeŋgopieŋ, â dapâcko wiac ebac ehuc mueŋgopieŋ: “Mozi honec‐nâpoocmu â mozi manac‐nâpoocmu?”
16Oi ŋoŋe, wiac sasawa qac qâtikic efâreeŋgopieŋ. Kuʒi bapa e afehec sâc mocjaha ekopirec me, irec wiac bâfuakicnezi bâbâfua‐ticne ʒiŋuc sâcne âzâcneocmu: “Goki mi bâfuacnumeŋ?” Me kuʒi wiaczi wemocko kuʒi bapare ʒiŋuc muocmu: “E giere fuŋne mi manakac?”
17Manaŋgopieŋ, dameŋ bembeŋne mac fokac i tarame Lebanoŋ jâckâtezi hawarine hetikierâ jufu gie eocmu, â jufu gie fokac izi ine jâckâte eocmu.
18Dameŋ ira qepoŋ jaŋe papiao dâŋ qâreŋkekicne fokac i mananiŋmu â tiŋtuŋ jaŋe dapâc qisiric fimârâŋkehuc wiac hone manac eniŋmu.
19Eme maŋhuhuŋ jueŋgopieŋ jaŋe Wofuŋte bubiaŋ mocwâc mananiŋmu â ŋic qarâ suriŋne jueŋgopieŋ jaŋe Israere Tiri rune ere ʒeri bari eniŋmu.
20Bâbâʒâic ŋic jaŋe arictac eniŋmu â ŋic âke sisicne jaŋe omaeniŋmu, erâ sindaŋ eniŋte maŋjeŋic domaekac jaŋe bâsirowec‐jopa‐fârezo hâcne.
21Sawadâŋte erâ ŋic sâqocne bapa mucjopaeŋgopieŋ, â mumutara ŋic e motâcko gie‐ticne bahuc juhame dâŋzi bitiŋ bacneeŋgopieŋ, erâ ŋic bahacmâc jaŋere dâŋ fuŋne tâmiricko muhasickeeŋgopieŋ jaŋe hâcne iŋuc fua‐jareocmu.
22Irec Wofuŋ e mârâc jaha Abraham firueweczi Jakobore kikefuŋ jaŋere ʒiŋuc muwec: “Jakobore kikefuŋ jaŋe mocwâc mi qurutuanʒepieŋ â ʒâŋe mai‐jeŋiczi mocwâc mi weaŋkezejec.
23Aricne, jaŋe ŋondeŋ‐jeŋicko menanere maqâreŋ, ɋâricfâc‐jeŋic hâcne honec‐joparâ ʒâŋe‐nane tiri foocte ʒoɋac eniŋmu, ehuc Jakobore Tiri rune nore manapie fejâmbâŋkeha Israere Anutu no araŋ banareniŋmu.
24Eme maŋjeŋic sifuckeekac jaŋe mamana biaŋ fua‐jareocmu, â mu kâroŋ eeŋgopieŋ jaŋe dâŋ jaza qazuc epie mananiŋmu.”
