1Tiro haere okacdâŋ. O Tarasisi woke sâko, Tiro hae ima bakicnere kio owa eniŋ, fic hae omae‐fârewec hâcne. Jaŋe Kipiro nuckonec risiehuc biŋe bâroŋ i manambiŋ.
2Hâwecmecko ŋec juc eeŋgopieŋ ŋoŋe niniŋkeniŋ! Sidoŋte âbârâ ŋic hâwec fotâcnehuc jueŋgopieŋ jaŋe mâriri bâfua‐ŋare jumbiŋ.
3Sihoro opâ mecko wiac nânâne â Nilu opâ ʒiŋuc ocniŋuc padi jacgoŋ fuawec i opâ sâko fotâcnehuc Sidoŋ haeo barakicne, eme ŋicne ŋicne jaŋere furi bapa toma erâ ŋemeŋ.
4Sidoŋ, go mimiec, hâwecmecko hae sanaŋ ŋekac izi ʒiŋuc mukacte: “No gozi kicnume naru motec roroc‐jopa i mi epo, â ŋicmotec me naru ŋokac i wâc mi hone maiŋ ejarehape sokambiŋ.”
5Tirore biŋe bâroŋzi Aigita mâreŋko fisime ŋic jaŋe manarâ ɋarac ɋarac qaniŋmu.
6Hâwec fotâcnerâ Tarasisi haeo raniŋ; hâwecmecko ŋec juc eeŋgopieŋ ŋoŋe kio owa eniŋ!
7Mârâc sasac jaha fuawec â maŋnao ʒeri sâko fowec erâ ŋic guru gâcne jaŋehec jaba juocte kike‐ticnezi ʒoricko rajujec, hae keci hâcne me?
8Tiro haezi ŋic gâcne jaŋe eridu tahac‐jopa jujec â âbârâ ŋicfâcne jaŋe ŋicbomboŋ erâ jujumbieŋ erâ nareŋ gareŋ gie bapafâcne jaŋere ʒâŋe biŋe fejujec, ehame hae e wiac i fuacneocte mozi mupaŋkewec?
9Anutu Tâpiri Ɋuŋɋasaŋ Wofuŋ eki mupaŋkewec, i pepec penaroŋ sasawa qame wahaocte â mâreŋ sâc boc sâsec‐jopambiŋ jaŋe ba jawa ejareocte.
10Tarasisi rune, ŋoŋe niŋgiŋ‐ŋeŋic mocwâc mi fokacte Nilu opâzi roma baekac irec sâc ehuc mâreŋ‐ŋeŋic sâcke‐fârenʒepieŋ.
11Wofuŋ e meticne hâweckopec sicneme ŋicne ŋicne â ŋicwofuŋfâc‐jeŋic jaŋe ɋarac ɋarac qambiŋ; e Kanaaŋ mâreŋko ficsanaŋ ŋerawec i tâtie‐fâreocte mupaŋkewec.
12Ehuc muwec: “O Sidoŋ rune, go hâcne ro waha âte egarekicne, go ʒeri bari mocwâc mi ezemec. Ajoc, go Kipiro nucko ra juzemec, eme ira ŋeŋemana wâc mi fua‐garezejec.”
13Manaŋgopieŋ, Asiria jaŋe mâcne, Kaldea ŋic jaŋe hae ima bapie qowi jaŋere biŋe ewec. Jaŋe somâ bapare ʒae ʒora bapie fewec, erâ ŋicwofuŋ fic heropierâ hae hetâc qâtâtiembiŋ.
14Tarasisi woke rune, ŋoŋe hae sanaŋ‐ŋeŋic ima bakicnere kio owa eniŋ!
15Dameŋ ira Tiro haere ninikec fuame jara 70 taraocmu, i ŋicwofuŋ mocjahare juju dameŋ tinac. Eme jara 70 tarame sasec ŋokac mocte gae hembiŋko dâŋ fokac irec sâcko Tiro hae fuacneocmu, ine kecʒiŋuc:
16“Sasec ŋokac nâme ninikec egarekicne go mimi ŋokac rorâ hae sâkoo rac warec ehuc ficnezemec â gae bocjaha hezemec, eme ŋiczi gore mocwâc manasunʒepieŋ.”
17Jara 70 tarame Wofuŋzi Tiro hae manacneha moneŋ gie‐ticnao mocwâc risieocmu, ehuc mâreŋ sâko mâreŋ irec faio ŋicne ŋicne juraŋgopieŋ jaŋehec âbârâ gie baocmu.
18Mâc gie furi i ro qâzuc me râe guruc mi ee Wofuŋte biŋe qame foocmu; izi Wofuŋte maio jueŋgopieŋ jaŋe nânâ mâriri â ŋaqi qoruc biaŋ bâfua‐jarezejec.
