Jesaja 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Mâreŋ ŋicwofuŋte lama amec‐jopa ranʒepieŋ, ehuc Sela hae mâreŋkonec tuhu mâreŋ fotâcne raku Zioŋte otâ ere tikio fisinʒepieŋ.

²Moabi otâfâcne jaŋe wipezi fururuc qahuc kosa rac warec eeŋgopieŋ, me sareŋkonec jâpec‐jopakicne irec sâcko Aronoŋ opâ fotâcneeŋgopieŋko siŋsaŋ qarâ juniŋmu.

³“Go dâŋ mu biric enârehuc mumutiŋ gie bac; mumucge mutecne ʒoaŋ ɋaɋacko ŋafe iŋucne ezejec; eha jopa jâpec ejarekicne jaŋe soŋjopazemec, â wisehuc juŋgopieŋ jaŋe mi mac mufuac‐jopazemec.

⁴Moabi mâreŋkonec wisekicne jaŋe ŋondeŋ‐ŋeŋicko jaba juniŋte mana‐jarenʒepieŋ, â ima qaqa ere erâ huec sanaŋ ejarenʒepieŋ. Eme guguriŋfâc‐jeŋic jaŋe omaepie ima bapa tarame ŋicbomboŋ ejarehuc jumbiŋzi mâreŋ beherâ ratâmireniŋmu.

⁵Eme maŋjauŋte ŋesiŋko eri ŋeŋe moc fuarâ Dawidire qoruc bozeo ŋeha fainao mumutara ŋic ŋeocmu e siocmâc juhuc mumutiŋte henʒiriŋnehuc tiŋne juju fuarâ foocte ʒoɋac bâfuaocmu.”

⁶Nâŋe Moabi sahac fefe‐ticne hâhâwicne jâmbâŋ irec biŋe manambeŋ, maŋfefe, sâke bâbâc, pepec penaroŋ â jawadâŋ‐ticne irec biŋe hâcne.

⁷Irec Moabi jaŋe jaŋaczia kio owa eec eniŋ, jaŋe ʒeŋgoma kio owa eniŋ. Ehuc Kiri‐Heresi haeonec nânâ poroŋ waiŋ hândâŋnehec irec mu heŋɋâŋ ehuc busâqoc mananiŋ!

⁸Eme Hesiboŋte jufu gie, Sibema irec waiŋ gie i hâmo ɋaŋac ewec; tieŋ taeŋne haŋ barâ raku Jazereo mecne, mâreŋ burocnao mecne fisiwec, â qaŋeŋne qaratierâ hâwec fotâcnewec i ŋicne ŋicne fekicnefâc‐jeŋic jaŋe âte tâcnembiŋ.

⁹No irec hâcne Jazere ŋic jaŋehec Sibema waiŋ fuŋqizecnere ki mamakuc ekopac, â Hesiboŋ â Eleale hae ŋohe ʒâŋeuc‐nanezi rua‐ŋactekopac, i fâri fufua â qa roro dameŋko râsi jaŋere saoreŋ fuawec irec.

¹⁰Eme jufu gieo ʒeri â bubiaŋ i omaewec, â waiŋ gieo ʒeri gae â semuja mocwâc mi heeŋgopieŋ; waiŋ bapa ŋic jaŋe waiŋ hândâŋne oto sâkoo mocwâc mi âte pisickeeŋgopieŋ, â qa roro ŋic jaŋere ʒeri fânâŋ i bâniniŋkekicne.

¹¹Irec maŋnanezi Moabire erâ mimi ŋokac iŋucne ki mamakuc ekac; â bunane Kiri‐Heresi ere erâ sâqorekac.

¹²Eme Moabi jaŋe tikio ferâ taha bapa gie samarierâ baniŋmuo me nemu ufuŋko raʒirâ nunumu gie baniŋmuo ine sifu bâipieniŋmu.

¹³Wofuŋzi mârâc jaha Moabire dâŋ muwec ine hâcne.

¹⁴Miŋecgac ine Wofuŋzi kecʒiŋuc mukac: “Jara jahec â moc, gie motec jaŋere jara dameŋ iŋucne, i tarame Moabire tâpiri â ŋicfâc‐ticne guru sâko jaŋere ʒare waha‐jâmbâŋkeme ŋic ʒanʒaŋne â betaŋkekicne sawa juniŋmu!”