Jesaja 60

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Faharerâ tamaec, ʒoctamacge fisikac, Wofuŋte huriri qâreŋzi tamae‐garekac.

²Manakic, dapâczi mâreŋ qofackekac, dâpâc qisiriczi ŋicne ŋicne foŋjopakac; ehame gorao Wofuŋzi ʒoaŋ iŋucne wefukac, ere huriri qâreŋzi gorao uucne riŋkekac.

³Eme ŋicne ŋicne tatamacgao fisiniŋmu, â ŋicwofuŋ jaŋe huriri bâbâricgao wareniŋmu.

⁴Qâhâŋnerâ rârec rârec fitec rame honec: Ʒeŋgoma tumaŋnembieŋ gorao wareŋgopieŋ; ŋokâfâcge wiwickonec fisiniŋmu, otâfâcge meo bacjopa wareniŋmu.

⁵Eme go hone aŋac erâ ʒâŋege qârucneocmu, maŋgezi mana ʒiziwerâ ʒeri bari ecmu, i hâwecte mâririzi gore biŋe ekacte, â ŋicne ŋicne mafa‐jeŋic gorao warekacte.

⁶Kamele guru sâkozi bârârâŋguniŋmu, kamele socɋâri Midiaŋ â Efanec, erâ wâc Sebanec mâmâc fisiniŋmu. Jaŋe gol â hosâc âsu bagare wareniŋmu, ehuc Wofuŋte ʒâŋe biŋe musokaniŋmu.

⁷Kedaranec lama guru jaŋe gore erâ heâckembiŋ, Nebajotinec lama ŋicne jaŋe gore biŋe embiŋ. Manape biaŋkeha alata‐naneo fenʒepieŋ, eme biŋe rara ficnane jai jowarecnehec ezejec.

⁸Keci weni jaŋe karorac tinac ɋeŋjaha wareŋgopieŋ? ehuc hapâzi sareŋ‐ticnao risie heekac irec sâc eŋgopieŋ?

⁹Woke gomba nore erâ heâckeŋgopieŋ, Tarasisionec racwoke jaŋe micne baŋgopieŋ, i ŋokâfâcge wiwickonec wokec‐jopa wareniŋte, â moneŋ mafa‐jeŋic mâmâc ameckerâ fisiniŋte. I Wofuŋ gore Anutu ere ʒâŋere eŋgopieŋ, Israe guru Tiri Wofuŋ‐jeŋic ere hâcne, eki ʒâŋe biŋege bafahare‐garewecte.

¹⁰Ŋic jabanezi qânâsacge bagareniŋmu, ŋicwofuŋfâc‐jeŋic jaŋe kiŋaŋ qagareniŋmu. No kimbeŋ‐nanere jâmbomac hetapaicgupo, ʒi ine anonoc‐nanere ehâmo‐garekopac.

¹¹Sacmotâcge aaŋ domahuc juzejec, ʒoaŋko me ŋafeo mi hezo. Eme ŋicne ŋicne mafa mâriri‐jeŋic fehuc fozejec, â ŋicwofuŋfâc‐jeŋic birihec fisirâ fenʒepieŋ.

¹²Ŋicne ŋicne â ŋicwofuŋfâc‐jeŋic gore kiŋaŋ qaniŋte qikiŋneniŋmu jaŋe siroweniŋmu, ŋicne ŋicne i jaŋe hâcne sipiricke‐jâmbâŋkeniŋmu.

¹³Lebanoŋ tikire eri qaraweŋ gorao fisiocmu, wete, becʒi â jâmâzâc hâcne, i tirific‐nanere hae ʒoŋa erickeocte; eme no kike‐nanere ââtesiŋ ericke bâpiaŋ epemu.

¹⁴Bâʒâicgumbiŋ jaŋere ɋâricfâc jaŋe gorao dadape fisiniŋmu â qaisocgumbiŋ sasawa jaŋe maŋfuŋgao fodapeniŋmu, ehuc ʒâŋege ʒiŋuc muniŋmu: “Wofuŋte hae sâko”, “Israere Tiri rune ere Zioŋ”.

¹⁵Behe qaisoc egarehuc gorao sicne fotâc moc mi embiŋ; irec okacne bafaharecgupe eri qaraweŋhec erâ juzemec, eme mimiŋzi ɋâric hone ʒiziwecguhuc junʒepieŋ.

¹⁶Go ŋicne ŋicne jaŋeraonec susu nâhuc juzemec â ŋicwofuŋ jaŋe moŋ gumecgupie nâzemec, ehuc ʒiŋuc mana tarazemec: Bâbâpiaŋge i Wofuŋ no hâcne, â fifiruege i Jakobore tâpiri rune no hâcne.

¹⁷No aeŋ bâbâroŋte okacne gol bafisipemu â aeŋte okacne siliwa, jâcte okacne aeŋ bâbâroŋ erâ qânâre okacne aeŋ, iŋuc bafisipemu. No wama bâfua‐garepe izi soŋaŋguzejec â tiŋne juju bâfua‐garepe izi eebapagere guriŋ bazejec.

¹⁸Hae mâreŋgao bâbâʒâic me ima me sisipiric irec biŋe mocwâc fuame mi manazemec, go qânâsacge irec ʒâŋe “Bâbâpiaŋ” â sacmotâcgere ʒâŋe “Mumuteŋ” muzemec.

¹⁹Ʒoaŋte tatamac â mosare tatamaczi mocwâc mi tamae‐garezejec; aricne, Wofuŋzi ʒoctamacge fofo sanaŋ â Anutugezi huriri qâreŋge juzejec.

²⁰Ʒoaŋgezi mocwâc mi huocmu â mosagezi mi pitiwaocmu, aricne, Wofuŋzi ine ʒoctamacge fohuc juocmu sanaŋ, ehame ki mamakuc dameŋge taraocmu.

²¹Ŋicgurufâcge jaŋe ʒeŋgoma tiŋne juniŋmu; jaŋe jufu gie‐nanere gitecne â meqâreŋ‐nane juhuc mâreŋ tatara tâmiric rauckepie mumuteŋ‐nane fuazejec.

²²Ŋic guru piticnezi sawerâ guru sâko fuanʒepieŋ â qarâ suriŋnezi ŋicguru tâpirichec enʒepieŋ. Wofuŋ no hâcne dameŋne maickeme ɋeŋjaha fuaocte giene bapemu.