1Dotu, kote huara pania e Zihova sa popoa pepeso meke va kaleana pania Sa; kote hobea Sa sa dinoṉona sa popoa pepeso, meke kote va hurakatae lamae i Sa sari tie.
2Kote kekeṉoṉo mo sa tinasuna tutuvia ri doduru: sari na hiama meke sari tinoni, sari na pinausu meke sari palabatu, sari na tie holu vagi meke arini pu vata holu, saripu va malumu lipulipu meke sarini pu ari dia lipulipu, sari na tie tagotago meke sari tie habahuala.
3Sa popoa pepeso si kote ta huara palae hokara meke kote ta hiko vagi sari na likakalae, kote loketoṉa hokara si koa hola.
4Sa popoa pepeso si popa meke harahara, sa kasia popoa si mate gore meke harahara, sari tie nomadi ba lopu goto meke mate palapalae.
5Sa popoa pepeso si tava boni koari na tie; na lopu lulia rini sa tinarae, lopu luli rini sari na vina turu meke sekea rini sa vinariva egoi sapu koa ninae rane
6Gua ke na lineveleve onolo toa ia sa popoa pepeso: sari tiena kaqu ta sigiti ni sari dia sinea. Gua ke saripu koa ia sa popoa pepeso si ta sulu palae, meke visavisa hokara mo si koa hola.
7Sari vaeni vaqura si beto meke sari huda vaeni si popa meke harahara; sarini pu qetuqetu visoroihe si nominomi sina loke napo vaeni.
8Sa mamalaiṉi avoso lea tanisa tabarini si noso, meke sa vevehe qetuqetu tadi tie si lopu ta avoso, sa mike si lopu ta seke pule.
9Lopu napo vaeni meke kera pule sari tie; meke sa bia si pasa koarini pu napona.
10Sa vasileana nomana si kaleana beto sari doduru tiṉitoṉa; sari sasada koari na vetu si bara tuku beto.
11Kukili hata vaeni si arini pa sisiraṉa; sari doduru qinetuqetu si iliri la pa tinalotaṉa, doduru vevehe qetu si ta hitu taloa pa popoa pepeso.
12Sa vasileana nomana si ta huara va kaleana, meke sari sasada koasa goba si ta seke va umumu beto.
13Ke kote gua asa sa doduruna sa popoa pepeso meke koari doduru butubutu, ka visavisa mo si kote koa hola, gua totoso ta zoru sa huda olive, meke totoso koa hola si kaiqa qurepi mudina sa totoso pudiki.
14Va ululi rini sari mamalaiṉi dia meke kukili qetuqetu; pa kali lodu rimata si va lavatia rini se Zihova, sa Baṉara tolavaena.
15Gua ke pa kali gasa rimata si vahesia rini se Zihova; gamu pu koa koari na nunusa pa lamana, mi va ululia sa pozana e Zihova, sa Tamasa tadi pa Izireli.
16Koari pa vina betona sa popoa pepeso si avosia gita sa kera: “Vahesia si Asa pu Toṉotona.” Ba zama si rau, “Arau si gore hiteke, gore hiteke sa tiniqu! Na tinalotaṉa si taqarau! Na tie qoraqora si korapa koa! Na vinari qoraqorai si doduru vasina!”
17Na kinoa matagutu, na pou meke na sipata si aqani gamu, kei gamu na tiena sa popoa pepeso.
18Asa sapu matagutu meke govete si kote hoqa nuquru pa pou; asa sapu haele vura pa pou si kote ta saputu vagi pa sipata. Sa naqe pa maṉauru si nama pude titisae, meke sa vasina pu ta sokirae sa popoa pepeso si niu.
19Sa popoa pepeso si viqala, sa popoa pepeso si tukele, sa popoa pepeso si ta niu va kaleana.
20Sa popoa pepeso si tedeve guana tie vivirina, niu guana vetu pa givusu raneboṉi; ta mamata ni sa sari nana sinea sapu korona luli zinama, ke kote hoqa si asa meke lopu boka tekulu pule.
21Koasa rane asa si kote va kilasi e Zihova sari ṉiniraṉira tadi tomate pa galegalearane panaulu, meke sari na baṉara pa popoa pepeso panapeka.
22Kote ta veko varigara si arini guari na boso sapu ta veko pa pou; kote ta tuku tamunu pa vetu varipusi meke aqa nia sa dia rane pude tava kilasa.
23Sa sidara si kote tava paere, sa rimata ba lopu kaqu bakala; ura se Zihova Tadi na Qeto Minate si kote koa baṉara pa Nana tinolava koasa Toqere Zaione meke pa Zerusalema, pa kenu dia ri na koimata tadi Nana tinoni.
