1Anutu‐ŋeŋiczi ʒiŋuc mukac: Ŋicfâc‐nane bâmiriŋ‐jopahuc bubiaŋ dâŋ jazaniŋ!
2Jerusalem hae hone ʒemuraŋ ecnehuc dâŋ âzâcneniŋ, erâ hahaŋne bahuc mupie manazejec: Kiŋaŋ qaqa juju‐ticne tarawec â kiŋ bahac‐ticne behecnekicne, i Wofuŋte meonec sâqocne‐ticne sasawa irec okacne fehuc rowecte iŋuc ecnekicne.
3Wiwira moc ʒiŋuc fuakac: “Mâreŋ tuhuo Wofuŋte hata bâʒâweniŋ, â mâreŋ sawao Anutu‐nâŋecte hata sâko moc hepie wâneŋkeoc.
4Wâcne wâcne hemase‐fârezo, tikine facne hezu hewâneŋ ezo, hehesicne hetiŋnezo â babahacne hefâsâezo.
5Eme Wofuŋte huriri qâreŋ fua taniŋkeme mâreŋŋic jaŋe ʒeŋgoma honenʒepieŋ,” Wofuŋte mickonec dâŋ iŋuc wahawec hâcne.
6Dâŋ moc ʒiŋuc fuawec: “Dâŋ muromackec!” Eme mupo: “No wemo dâŋ muromackepemu?” Mâreŋŋic jaŋe ʒeŋgoma kecɋaŋ iŋucne, â hawari biaŋ‐jeŋic i ʒariŋ gieo domakac irec sâc.
7Wofuŋte micrombâŋzi waha ficneme kecɋaŋ e hâmo ɋaŋac eekac â ʒariŋ e ururuckeekac; jâmbomac, ŋic jaŋe kecɋaŋ iŋucne hâcne.
8Kecɋaŋzi hâmo ɋaŋac eekac â ʒariŋzi ururuckeekac, Anutu‐nâŋecte dâŋ ine fohuc juocmu sanaŋ.
9Zioŋ biŋe biaŋ mumu, go tiki ʒorao fec, Jerusalem biŋe biaŋ mumu, go dâŋ ɋicwânʒâŋnehec muc, go dâŋ hahaŋne bahuc mi hâwicguzejec; ehuc Juda hae ŋerakac jaŋe ʒiŋuc jazac: “Honeniŋ, Anutu‐ŋeŋic jukac i!”
10Honeniŋ, Wofuŋ Anutu e tâpiri sâkohec fisikac, meticne sanaŋkeme guriŋ bapa gie bakac; honeniŋ, furi‐ticne ehec mâmâc ware fisikac â wiac hure hemârec ewec izi bâniecnekac.
11E gurufâc‐ticne jaŋe lama soŋaŋ iŋucne hone soŋaŋ ejareocmu; lama motecne meticnezi qâzuc‐joparâ amec‐jopa rahuc neŋgocne jaŋe ine aimuŋ jowac‐jopaocmu.
12Mozi meticnezi hâwec fiarâ sâcticne manaocmu, me mozi memotec‐ticne qaratiehuc sambâŋte sâc baocmu, me mozi mâreŋko rufe fokac i sâc bapa otoo fiame sâcne hufâreocmu, me mozi tiki â facne facne sigelio sâcne râeme feme ŋemâc‐jeŋic manaocmu?
13Mo ŋiczi Wofuŋ Mâro‐ticne sâcmutâc ecnewec, me mozi bafickehuc dâŋ birickecnewec?
14Me mo ŋic mo mu wioc ecneme mamana bâfuacnewec, me mozi tiŋne hatare fuŋne âzâcne mutâc ewec, me mozi mamana tara qazucnewec, me mozi maŋɋârâŋte hata âzâcne jâutuc ewec?
15Manaŋgopieŋ, ŋicne ŋicne jaŋere maname, pakeonec opâ ʒâmbâŋne moc wahaekac irec sâc eŋgopieŋ, erâ moŋgeŋ uucne moc sigelio fokac iŋucne; manaŋgopieŋ, nucne nucne jaŋere sâc i gâc iŋucne mac.
16Â Lebanoŋte jâckâte i ʒocte sâc mi ezac erâ qowi wiac‐ticne i bâzi ririkere sâc wâc mi ezac.
17Ŋicne ŋicne jaŋe ere maio nokafe sawa, jaŋere maname wiac omane â jawane eŋgopieŋ ekac.
18Ŋoŋe Anutu e mohec sâc hezo muŋgopieŋ? Me wemo wiac mo ba akic epie ere hawari iŋucne eocmu?
19Metâ bapazi ɋâŋ qâqâtâc bâfuaekac, â golzi eri wiac bapa eki golzi foŋkerâ sahacnao siliwazi kâpâcwâru basanaŋkeekac i me?
20Me moc e hapetac juhuc ɋâŋ qâqâtâc iŋucne taha râeocte quŋkeocmuzi ine jâcsanaŋ moc gârecke ʒaŋ mi eene bâwosâeocmu. Erâ metâ bapa saric ŋic moc bâfuarâ ɋâŋ qâqâtâc sanaŋne domaocmu iŋucne moc fasaecneocte jâc i râcneocmu.
21Ŋoŋe kâuc baŋgopieŋ me? Â mananiŋte mi eŋarekac me? Fuŋnaonecteaŋ mi ŋazakicne me? Me mâreŋte hobeteŋnezi weniŋuc nâzâ nâwotuc ekac i hone wosâc mi embiŋ me?
22Anutuzi hâcne mâreŋ jâuru‐fârerâ faic jâmbâŋ eri ŋeŋeo ŋekac, ehame mâreŋ ŋecjucfâc‐ticne jaŋe ine ɋirikiŋ iŋucne erâ juŋgopieŋ; eki sambâŋ i qoruc iŋucne qaratiekac â selific ŋiczi maŋnao ŋec juc eene irec sâc fârekac.
23Eki mume ŋicwofuŋ fekicne juju‐jeŋic omaeocmu â mâreŋte guriŋ bapa ŋic tâpiri‐jeŋic bawahame arictac eocmu.
24Jaŋe ɋâricne mac sarac‐jopakicne â ɋâricne mac tiec‐jopakicne erâ fuŋne‐jeŋiczi mâreŋko ɋâricne mac jaha gâtâ bahame ficne suec‐jopame hâmo ɋaŋac eniŋmu, eme mâŋâŋ sâkozi padi jawa iŋucne bawisec‐jopaocmu.
25Eme no ʒi more hawari jukopacte ehec sâc hecnuzo muŋgopieŋ? Tiri runezi iŋuc muhuc wiokac.
26Faic fipie feme hone taraniŋ: Bâpiŋ ŋeraŋgopieŋ i mozi bâfuac‐jopawec? Mume guru‐jeŋicko furu jaha fua taniŋkeeŋgopieŋ â ʒâŋe‐jeŋic mufâreekac eki hâcne bâfuac‐jopawec; e tâpiri sâko‐ticnehec â sasanaŋ‐ticne bipinehec irec moczi moc mi sifuckeocmu.
27Jakobo, go wemocte dâŋ ʒiŋuc mukomec, â Israe go wemocte dâŋ ʒiŋuc ekomec: “Wofuŋ e hata‐nane kâuc baekac â Anutu‐nanezi dâŋnane sâcne mi dopeckeekac?”
28Go kâuc barâ ʒiŋuc mi manameŋ? Wofuŋ e juju sanaŋ Anutu juweczi jukac, eki hâcne mâreŋ qaŋeŋne bâfuawec; e docke pârâc mi eekac â maŋɋârâŋ‐ticne i mamana tarane aricne.
29E betaŋkekicne jaŋe tâpiri qikiŋne‐jareekac â rokawekicne jaŋe sasanaŋ bâsoka‐jareekac.
30Motec socɋâri jaŋe betaŋkepie tâpiri‐jeŋic omaeocmu â ŋicmotec jaŋe wâc docke pârâc ehuc rândiŋkeniŋmu.
31Wofuŋtao roweckeniŋmu jaŋe ine tâpiri ɋâricne bâfuaniŋmu, jaŋe tucwipe iŋucne fafakechec erâ furuc furuc qahuc feniŋmu, jaŋe gasackeku mi dockeniŋmu erâ hata raku wâc mi betaŋkeniŋmu.
