Jesaja 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Dameŋ ira Wofuŋ e ʒika‐ticne sanaŋne â kâcɋene â tâpirihec izi Lewiataŋ, homa wiwisene hâcne, â homa qaqaharicne ʒâŋene Lewiataŋ jaha, jahe okacne bazu‐jacteocmu, erâ hâwecko oâ jukac e qâhâmoocmu.

²Dameŋ ira dâŋ ʒiŋuc fuaocmu: “Waiŋ gie biaŋne i gae hecneniŋ!

³Wofuŋ no hâcne soŋaŋ‐ticne; no gâbâ jaha opâ ruacneekopac, sisipiric wiac moc fuacnezacte ŋafe furec soŋaŋkehuc juekopac.

⁴No aaric mi bajukopac; mâc fâpâ uupic â sopâc fuame honerâ râsi ecnehuc turuŋkepe ʒafâreocmu!

⁵Nore dapeŋko soŋkehuc wama qanare‐jâmbâŋkeniŋmuo ine iŋuc mi epemu.”

⁶Juku Jakobozi gâtâ baocmu â Israezi gitec herâ fiehuc âri qaocmu, eme fârine fuarâ mâreŋ sâko mâreŋ sâcke‐fâreocmu.

⁷Wofuŋ go kisâfâc‐jeŋic jopameŋ irec sâc Israe ŋic moc jopameŋ me? Me râsifâc‐jeŋic qâhâmoc‐jopameŋ irec sâc moc qâhâmoc‐jopameŋ me?

⁸Aricne, behec‐jopatec kâpâcwâruo bacjopa rambiŋ izi okacne bazu‐jaremeŋ ewec, ehame kagu mâŋâŋ fuawec ʒoaŋ ira micrombâŋge sanaŋnezi ficnec‐jopahuc jâpec‐jopameŋ.

⁹Iŋuc fuawecte Jakobore kiŋtofa tarakac, eme kiŋ babatara irec fârine wiac kecʒiŋuc fuaocmu: Alatare qânâ sasawa qâfâuckeme qorac qanʒaŋnekicne iŋucne eocmu, â Asera ɋâŋ qâqâtâc‐ticne â nemure wâtuŋ wiac i mocwâc mi âkendâŋnepie domaocmu.

¹⁰Hae sanaŋ i niniŋ siarereŋ fokac, fic hae behekicne i mâreŋ burocne iŋucne tuhutac fokac, ehame bulimakao jaŋe ira ju fofo ehuc jâc dutu rehacne nâfâreeŋgopieŋ.

¹¹Eme tieŋne hâmo‐fâreme ŋic jaŋe bazuniŋmu, ehame ŋokac jaŋe fisirâ ʒoc ruqepie ʒaocmu. Jaŋe ŋicguru maŋ mamanasu tâmiric, irec bâbâfua‐jeŋiczi busâqoc mi mana‐jareocmu â bâfuac‐jopaweczi aki anonoc mi ejareocmu.

¹²Eme dameŋ ira Wofuŋzi Eufrata opâonec fuŋkerâ padi hândâŋne qâmârâŋke ware raku Aigita mâreŋte opâo qâmârâŋke taraocmu. Israere ɋâricfâc ŋoŋe ine buc buc ro nusec eŋarezo.

¹³Dameŋ ira qeŋsâko qapie dâŋeocmu, eme Asiria mâreŋko qac qâsoric ekicne jaŋe mecne â jopa jâpec ejarepie Aigita mâreŋko rambiŋ jaŋe mâmâc fisirâ Jerusalem ira tiri tikio Wofuŋ dapecneniŋmu.