Jesaja 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Manaŋgopieŋ, Damasko i hae fâri mocwâc mi ŋeŋe ʒaŋkerâ sesuctac fuarâ foocmu.

²Hae piticfâc‐ticne gâcne ŋerakac i wâc sesuctac jaha fosanaŋkehuc qowi hae eocmu, ehame jaŋe ira juhapie moczi moc mi jâpec‐jopaocmu.

³Eferaim huec sanaŋ‐jeŋic i omae‐jareocmu â Damasko rune ŋicwofuŋ juju‐jeŋic iŋuc jaha; eme Israe ŋic jaŋere tâpiri wahawec irec sâc jaha Aram ŋic ʒanʒaŋne jaŋere wahaocmu, Anutu Tâpiri Ɋuŋɋasaŋ Wofuŋ ere dâŋ iŋuc.

⁴Eme dameŋ ira Jakobore ʒâŋe biŋe qaʒueocmu, â sahac opâ‐ticne kereŋkeme siec sawa eocmu.

⁵Qa roro ŋic e padi kikene meticnezi bâturerâ fârine hetâcneekac irec sâc fuaocmu; me ŋic moczi Refaim wâcko padi kikene ro nusec eocmu irec sâc jaha fuaocmu.

⁶Fârine bâtirikicne ʒâhec ro nusec ee ine afecne mac; oliwa jâc itiriŋkepie fârine gâcne sâko waha‐fâreme jâc botâŋnao hândâŋne 2 me 3 â tieŋnao 4 me 5 irec sâc sawa mac ŋeocmu; Wofuŋ, Israere Anutu ere dâŋ iŋuc.

⁷Dameŋ ira mâreŋŋic jaŋe bâbâfua‐jeŋic ʒâŋitahuc Israere Tiri rune erao ʒâŋe finiŋmu.

⁸Jaŋe alata wiac, jaŋe jaŋacne meɋâreŋ hâcne, i mocwâc honepie fârine mi eocmu, â mejeŋiczi metâ wiac bambiŋ, Asera irec ɋâŋ qâqâtâc â ʒoaŋ nemure wâtuŋ ira wâc ʒâŋe mi finiŋmu.

⁹Dameŋ ira hae sanaŋ‐jeŋic sesuctac foraniŋmu i Hiwiŋic â Amori ŋic jaŋe hae‐jeŋic Israe ŋic jaŋere erâ behepie sesuctac forambiŋ irec sâc; mâreŋ niniŋ siarereŋ foocmu hâcne.

¹⁰I ʒiŋucte: Go bâbâpiaŋge Anutu ere nikecguwec, ehuc qânâ sanaŋ â tâpirige irec wâc mi manasumeŋ; irec ʒariŋ gie biaŋne bazo murâ bac, â mâreŋ furunaonec ukicne rorâ râezo murâ râec.

¹¹Eme saracmu ʒoaŋ ijaha bâsokacmu mecne â ukicne râekic i furictea ecnetec âri qaocmu mecne erâ sifu ʒârâ hâriŋ â ʒâic busâqoc mi tatarane fuaocmu dameŋ ira fârine basacmu.

¹²Jei, ŋic gurune gurune jaŋere kike quruŋ i hâweczi fânâŋkeekac irec sâc fuakac; â ŋicne ŋicne ojowa‐jeŋic i opâ rumizi fânâŋkeekac irec sâc.

¹³Ŋicne ŋicne ojowa‐jeŋic i opâ sâko bocjaha fânâŋkeeŋgopieŋ irec sâc fuakac; Wofuŋzi ine dâŋ mujareme taicko wiseniŋmu, mâŋâŋzi tikio jawa wiac bawiseekac irec sâc, â ʒâʒâkiriŋ mâŋâŋzi rufe ficne sueme feekac iŋucne.

¹⁴Opoŋ, owâ ririŋte wiac hâhâwicne fuakac, hae mi fure taniŋkeha biac omaeŋgopieŋ. Wiac‐nâŋec kâŋgâc nâwoc rohuc ʒika qaeŋgopieŋ jaŋe okacne iŋuc fua‐jareocmu, â fiuc serereŋ enâreeŋgopieŋ jaŋe katucne ijaha fua‐jareocmu.