1Wofuŋ e Kirure maio ŋicne ŋicne qâhuc‐jopaocte â ŋicwofuŋ umbika‐jeŋic goroŋkerâ jowac roocte Kiru wokemaŋ ruacnerâ mefârenao rowec. Ehuc ere maio motâc ropie aŋkeocte â motâc sâko mi heniŋte ʒiŋuc âzâcnewec:
2“No nahac bânie‐garehuc hata bâʒâwe‐garepemu, no motâc aeŋ bâbâroŋzi bakicne i qanʒaŋnehuc aeŋ babasanaŋ‐ticne hezupemu.
3No wiac fâri biaŋ dapâcko soŋkekicne â boreŋ ʒeŋaŋko râekicne i garepemu, eme ʒiŋuc mana tarazemec: Ʒâŋe‐nane muhuc wira‐narekac e Wofuŋ, Israere Anutu hâcne.
4No kiŋaŋŋic‐nane Jakobo â bâwosâekicne‐nane Israe ere erâ ʒâŋege muhuc wira‐garepo, ehuc go mi mana taracnuhaŋtec sifu ʒâŋe biŋe sâko bâfua‐garepo.
5No mocjahazi Wofuŋ jukopac, Anutu no iŋucne moc mi jukac, aricne! Go mi manacnuhaŋtec becsahac joma‐garepo.
6Irec ʒoaŋ wewefunaonec â huhunaonec ŋiczi ʒiŋuc mana taranʒepieŋ: E iŋucne moc mi jukac, aricne; e mocjahazi Wofuŋ jukac hâcne.
7Noni hâcne ŋifec tatamac bâfuahuc ŋifec dapâc bâfuaekopac; noni mupe ŋifec wama fuarâ foha ŋifec ʒârâ hâriŋ fuaekac; wiac i sasawa Wofuŋ noni hâcne mupe fua‐fâreekac.
8“Sambâŋne sambâŋne ŋoŋe hoe pisiŋ pisiŋ henʒepieŋ â karorac ŋoŋe tiŋne juju i hoe iŋucne hoŋkepie wahazejec. Eme mâreŋzi aŋkerâ bâbâpiaŋ â tiŋne juju âke suec‐jofame mâmâc wefuzepirec; Wofuŋ noni hâcne wiac i bâfuaekopac.
9“Jei, ŋic e kuʒi dâkâne dâkâne jaŋere sâc juhuc weniŋuc erâ bâbâfua‐ticne aaric dâŋ mucneocmu? Afezi kuʒi bapa ʒiŋuc sâcne âzâcneocmu: ‘Go wemo wiac bakomec’? Me, wiac bâfuakicnezi ʒiŋuc sâcne âzâcneocmu: ‘Go mege aricne’?
10Jei, mozi mamac ʒiŋuc âzâcneocmu: ‘Ɋâric wemocte bâfuakic?’ Me neŋgoc âzâcneocmu: ‘Go wemocte motec kiweckerâ rokomec?’”
11Wofuŋ, Israere Tiri rune â bâbâfua e ʒiŋuc mukac: “Ŋoŋe naru motecfâc‐nane jaŋere erâ mu wioc enarezo muŋgopieŋ me? Me meqâreŋ‐nanere dâŋ mutâcne‐nareniŋte muŋgopieŋ me?
12No hâcne mâreŋ bâfuapo erâ fainao ŋic juŋgopieŋ i nonizia bâfuac‐jopapo. Nore mezi sambâŋ fârepo forakac, erâ momorifâcne bâpiŋ sasawa giedâŋ mujarepo.
13No tiŋne juju‐nanere erâ ŋic moc esoc qafeŋ ecnepo, no hata‐ticne hewâneŋke‐fârepemu wâc. Eki hâcne hae sâko‐nane heɋârerâ bazejec â kâpâcwâru ŋicfâc‐nane firuec‐jopazejec, erâ i furire me bâbâmiriŋ wiacte mi ezejec.” Anutu Tâpiri Ɋuŋɋasaŋ Wofuŋzi iŋuc mukac.
14Wofuŋ e ʒiŋuc mukac: “Aigitaonec moneŋ mafa â Etiopiaonec huhure wiac i gore biŋe eocmu, â Sebaŋic ʒoricne jaŋe ware gore biŋe eniŋmu. Jaŋe bâjâpecguniŋmu, ehuc me kike‐jeŋic kâpâcwâruzi bândeŋnekicne foha ware fodape‐garerâ mumbiaŋguhuc ʒiŋuc muniŋmu: ‘Anutu fârine e gorao mocjaha jukac, e iŋucne moc mi jukac, aric kereŋne jâmbâŋ!’”
15O Israere Anutu, bâbâpiaŋ rune, go jâmbomac Anutu soŋne.
16Ɋâŋ qâqâtâc baeŋgopieŋ jaŋe mâmâc sasawa qurutuarâ mimi busâqoc fua‐jareme mimiehuc junʒepieŋ.
17Wofuŋ e bâbâpiaŋ fofo sanaŋzi Israe bâpiaŋkeocmu, eme e mi qurutuahuc mimi busâqoc tâmiric juraʒihuc juocmu sanaŋ.
18Sambâŋ â mâreŋ bâfuac‐jofawec, â mâreŋte hobeteŋne râewec, erâ mâreŋ i tuhu fuarâ foocte mâcne, fainao ŋiczi ŋec juc eniŋte bâfuawec, Wofuŋ Anutu e hâcne ʒiŋuc mukac: “Noni sawa Wofuŋ, moczi aricne.
19No soŋsoŋko me mâreŋ dapâcko dâŋ mi mupo, no Jakobore ɋâricfâc jaŋe ʒiŋuc wâc mi jazapo: ‘Ŋoŋe basacnu‐bipienʒepieŋ.’ Noni Wofuŋ hâcne, no dâŋ tiŋne muekopac â dâŋ fârine muratieekopac.
20“Ŋicne ŋicne irec ʒanʒaŋne sasawa ŋoŋe qâturerâ bembeŋko ware fuaniŋ! Manaŋgopieŋ, ɋâŋ qâqâtâc‐jeŋic hâpo jueŋgopieŋ, â bafic‐jopaocte tâpiri mi focnekac, nemu iŋucne mu wâwâsic ecneeŋgopieŋ jaŋe maŋ mamanasu‐jeŋic aricne.
21Ŋoŋe dâŋ bajuŋgopieŋ i mufuanʒepieŋ, ehuc ʒiŋucte mâmâc muc manac enʒepieŋ: Dâŋ keci i mozi esecne mufuawec, mozi mârâc jaha jâmbâŋ muiŋnewec? Wofuŋ noni mi epo me? Norao moc ʒuhuckerâ Anutu juju i mi fokac, no Anutu tiŋne â bâbâpiaŋ rune, no iŋucne moc mi jukac.
22“Mâreŋ qaŋeŋnaonec sasawa ŋoŋe norao risie warepie bâpiaŋ‐ŋopape! Noni hâcne Anutu, no iŋucne moc mi jukac.
23No nahacnao ɋetickehuc mumupaŋ dâŋ mupo, ehame micnaneonec dâŋ tiŋne wahawec izi fârinehec ezejec, kecʒiŋuc: ‘Ŋic ʒeŋgoma jaŋe dieŋzi henare‐fârenʒepieŋ â ru sâc micjeŋiczi muafecnunʒepieŋ.’
24“Ehuc munʒepieŋ: ‘Bâbâpiaŋ â tâpiri i Wofuŋtao mocjaha fokac.’ Râsi ecneeŋgopieŋ sasawa jaŋe ine erao fuarâ mimi busâqoc bâfuanʒepieŋ.
25Israere ɋâricfâc jaŋe ʒeŋgoma Wofuŋtao tiŋne juju bâfuarâ e mumbiaŋkehuc junʒepieŋ.”
