1Ŋicwofuŋ Uʒija hâmowec jara dameŋ ira ʒiŋuc honepo: Wofuŋ e eri ŋeŋe fekicne ʒorao ŋeha ŋaqi‐ticne qaŋeŋnezi ufuŋ fusucmawec.
2Ŋewec irec faicnao serafim domambiŋ fakec‐jeŋic mocte 6 mocte 6 jaha. Fakec jajaheczi ʒâŋe mai‐jeŋic sâockembiŋ, jajaheczi kike‐jeŋic sâockembiŋ, â jajaheczi furuc furuc qambiŋ.
3Ehuc jaŋaczia wiwira ehuc kecʒiŋuc mumbiŋ: “Tiri, tiri, tiri, Anutu Tâpiri Ɋuŋɋasaŋ Wofuŋ; eri tatamac‐ticnezi mâreŋ sâc fuse rakac!”
4Eme wiwira‐jeŋicte marac fânâŋ fuame ficte woke qâtâc ɋiɋiteckewec, â hosâczi fic fusucmawec.
5Eme wirarâ mupo: “Jei, wenac epe, ʒi sipirickepemu, no micbipic‐nane wâwânâŋhec, â ŋicguru micbipic‐jeŋic wâwânâŋhec jaŋere ŋondeŋko juekopac; ehame ʒâŋe‐nanezi Fekicne sâko, Anutu Tâpiri Ɋuŋɋasaŋ Wofuŋ, e honekopac.”
6Eme serafim jaŋeraonec moc e fitaczi alataonec ʒoc kine moc rorâ norao furuc furuc qarâ warewec.
7Erâ izi micnane heuarâ muwec: “Honec, ʒi bipicge heuajec. Irec kiŋge bârâriekicne â sâqocnege bâtâmirekicne.”
8Eme no Wofuŋ dâŋmarac‐ticne ʒiŋuc fuame manapo: “No mo sorepe? Mozi hata kiŋaŋ ranâreocmu?” Eme mupo: “No ʒi, sorecnuc.”
9Eme muwec: “Rarâ ŋicguru keci ʒiŋuc jazac: ‘Mamana i mananiŋ, erâ mi mana taraniŋ; hohone i honeniŋ, erâ mi ʒâŋitaniŋ.’
10Ŋicguru ʒi maŋjeŋic basanaŋkec, â hazec‐jeŋic bâbâzickec, ʒâŋe‐jeŋic bâhâpoc; eme ʒâŋe‐jeŋiczi wiac mi hone taranʒepieŋ, â hazec‐jeŋiczi wiac mi mana taranʒepieŋ, â maŋjeŋiczi wiac mi manasu‐hâmonʒepieŋ, ehuc maŋjeŋic mi bârisiepie mi bâpiaŋ‐jopazo.”
11Eme no mupo: “O Wofuŋ, i mo dameŋte woŋec?” Eme muwec: “Wiac fuaocmu irec woŋec: Hae sâko ŋeraŋgopieŋ i sesuctac fuarâ tuhu eniŋmu, ficzi ŋic ŋokac tâmiric ŋeraocmu, â mâreŋ i kâte uupiczi bârârâŋneocmu.
12Erâ Wofuŋzi ŋic taicko bârâriec‐jopame, haene haene behe‐fârekupie niniŋ siarereŋ fuarâ foocmu.
13Eme tiwâne teŋkonec wâŋ irec sâc juhapie sifu sisipiric hâsine harierâ fisi‐jareocmu eme jâmiŋ me beŋjâc qafarapene fuŋgâtâne sawa ŋeekac iŋuc fuaocmu. Fuŋgâtâne izi hâcne tiri ukic ŋeocmu.”
