1Nucne nucne ŋoŋe nore maio niniŋkeniŋ â ŋic gurune gurune jaŋe tâpiri‐jeŋic mocwâc fua‐jarezejec! Jaŋe mai ware fuarâ dâŋ munʒepieŋ, ehame dâŋgie i mâmâc jaha banʒepeneŋ.
2Mozi ʒoaŋ wewefunaonec ŋic moc suru jâiŋ ecneme ira me ira fisirâ ʒika qahuc sanaŋkeekac? Me ŋicne ŋicne ere meo râec‐jopame ŋicwofuŋ qâhuc‐jopaekac, ehuc ʒika‐ticnezi qanʒaŋ‐jopame rufe iŋucne eeŋgopieŋ â tepe‐ticnezi muruc‐jopame padi jawa iŋucne eeŋgopieŋ?
3E kike‐ticnezi hatagâŋ juwicnao moc mi âtewecko ira jopa jâpec ejarehuc sisipiric moc mi bâfuaekac.
4Mozi iŋuc eekac â mume fuaekac? Me mozi fuŋnaonecteaŋ ŋic gaŋne gaŋne wira‐jareme fua wefueŋgopieŋ? Bâbâni jupozi jukopac erâ ʒâhec juniŋmu jaŋerao ijaha juzokopac, Wofuŋ noni hâcne.
5Nucne nucne jaŋe iŋuc honerâ hâwic‐jopawec â mâreŋ qaŋeŋne jaŋe ɋiɋiteckembiŋ jaŋe ware mai fuambiŋ hâcne.
6Jaŋe sasawa babafic ehuc dâŋ ʒiŋuc nazaŋ gazaŋ eeŋgopieŋ: “Go hâbige roc!”
7Ehame metâ bapa e golzi wiac bapa esockekac, â hamazi wiac qajacneekac eki ine aeŋzi wiac bapa esockekac, ehuc kizi rike bâzickerâ mukac: “Biaŋkekac.” Iŋuc murâ ŋeŋgoroŋkezacte biriŋzi qasanaŋkekac.
8O Israe kiŋaŋ qaqa‐nane, Jakobo bâwosâecgupo, âgo‐nane Abraham ere ɋâric,
9go mâreŋ qaŋeŋnaonec ro sakac egarepo â mâreŋ tuturuŋnaonec wira hefârec egarepo, ehuc ʒiŋuc gazapo, “Go hâcne kiŋaŋ qaqa‐nane, no hone suŋgiŋ mi egarehuc rowosâecgupo.”
10No gohec jukopacte mi hâwicguzejec, no Anutuge jukopacte maŋge mi gâckezejec; no hâcne basanaŋguhuc baficgupemu, ehuc mefâre‐nane sanaŋnezi dopecgupemu.
11Manakic, râsi egareeŋgopieŋ sasawa jaŋe qurutuapie mimi busâqoc fua‐jarezejec, â kisâfâcge jaŋe tâpiri‐jeŋic arictac eme sipirickenʒepieŋ.
12Gohec juju gie baeŋgopieŋ jaŋe basac‐joparâ mocwâc mi bâfuac‐jopacmu â gohec ʒika gie baeŋgopieŋ jaŋe omaerâ arictac efâreniŋmu.
13No Wofuŋ, gore Anutuzi hâcne mefâregao rocgurâ ʒiŋuc gazakopac: “Go mi hâwicguoc, no hâcne baficgupemu.”
14O Jakobo, go mâreŋko ɋâsu fokac iŋucne jukomeczi mi hâwicguzejec, â Israe guru pitic go mi fâfârezemec! No hâcne baficgupemu, erâ Israere Tiri rune no fifiruege jukopac, Wofuŋzi iŋuc mukac.
15Manakic, no mupe go padi ââkenʒaŋ gitu ɋâricne ɋâfoŋne â ŋemâcne iŋucne ezemec, ehuc tiki facne facne qâfâucke qanʒaŋ etecne mâreŋ uucne efârezejec.
16Eme sawao behetec feme mâŋâŋzi bawiseocmu â mâŋâŋ sâkozi qâtâtieocmu. Goki ine Wofuŋte manasuhuc ʒeri bari ezemec, ehuc Israere Tiri rune ere bubiaŋ manahuc mumbiaŋkezemec.
17Qarâ suriŋne â hapetac jaŋe opâ basapie arictac eme nameŋ‐jeŋic kereŋkeha Wofuŋ no hâcne bafic‐jopapemu. Israere Anutu no mi behec‐jopapemu.
18Noni mupe tiki botâŋko opâ fuaocmu â mâreŋ wâwâneŋko opâ ʒâŋe wefuocmu; noni mupe mâreŋ burocnao opâ riqic fuazejec â mâreŋ kereŋnezi opâ fisihuc fozejec.
19Noni mupe mâreŋ burocnao jâmâzâc, jâmiŋ, ʒariŋ â oliwa jâc fuazejec; noni mupe mâreŋ sawao wete, becʒi â niwijâc mâmâc jaha fuarâ doma razejec.
20Eme ŋic sasawa jaŋe i honehuc fuŋne ʒiŋuc mana taranʒepieŋ: Wiac i Wofuŋte mezi bawec â Israere Tiri rune eki bâfuawec.
21Wofuŋzi mukac: “Ŋoŋe dâŋ bajuŋgopieŋ i mufuaniŋ, â Jakobore Wofuŋ Sâkozi mukac: Dâŋŋeŋic wemozi dopeckeniŋmu i muniŋ.”
22Ŋoŋe mupie nemufâc‐ŋeŋic jaŋe ware fua taniŋkerâ, wiac fuazokac i hâcne nâzânʒepieŋ. Ehame mârâc jaha wiac fuawec irec fuŋne mecne erâ weniŋuc ehuc fârinehec ewec irec fuŋne i mâmâc nâzâ mutâc epie manarâ maŋzi manatâc qâtâc enʒepeneŋ, me wiac ʒâhec fuazokac irec dâŋ mupie mananʒepeneŋ wâc.
23Juku wiac fuazokac irec dâŋ mupie fuŋne‐jeŋic mana tararâ ʒiŋuc jazanʒepeneŋ: Ŋoŋe nemu! Ajoc, ŋoŋe wiac biaŋne me sâqocne moc epie nâŋe sasawa hone warec ehuc fâfârenʒepeneŋ.
24Manaŋgopieŋ, ŋoŋe fârine‐ŋeŋic aricne, â gie‐ŋeŋic i fâri tâmiric jaha; eme bâwosâec‐ŋopaocmuzi mamakâcne eocmu.
25No faic mâreŋkonec ŋic moc wareocte esoc qafeŋ ecnepe ware fisiwec, ʒoaŋ wewefunaoneczi ʒâŋe‐nane muhuc wira wâwâsic enareocmu e hâcne; eki ŋicwofuŋ fekicnefâc‐ticne jaŋe mâreŋ dodocne iŋucne âte docjopaocmu erâ kuʒi bapazi afe âtenʒaŋneekac irec sâc âtenʒaŋ‐jopaocmu.
26Mozi fuŋnaonecteaŋ musokame mananʒapeŋ, me esecne nâzâme manarâ ʒiŋuc munʒapeŋ, “E fârine mukac?” Aricne, moczi moc mi musokawec, moczi moc mi nâzâwec, ŋoŋeraonec moczi findaŋdâŋ moc mi manawec.
27Noni hâcne fuŋkerâ Zioŋ dâŋ âzâcnekopac, ehuc Jerusalem biŋe biaŋ mumu ŋic moc bâfuacnekopac.
28Erâ no ʒâŋe fihuc basac‐jopaekopac, ŋondeŋ‐jeŋicko dâŋ mumu ŋic moc mi jukac, irec mu wioc ejarepe okacne mi bârisie‐nareeŋgopieŋ.
29Manaŋgopieŋ, jaŋe furu jaha fâri‐jeŋic aricne, â gie‐jeŋic i fâri tâmiric jaha; nemuɋâŋfâc‐jeŋic jaŋe wiac omane â jawa sawa.
