Jesaja 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Ŋicne ŋicne ŋoŋe ware mananiŋ, â ŋic gurune gurune ŋoŋe hazec râeniŋ! Mâreŋ â mâreŋte faio wiac fusucmarâ fokac, erâ mâreŋ sâko mâreŋ â ŋecjucfâc‐ticne ŋoŋe sasawa mana‐fâreniŋ.

²Wofuŋ e ŋicne ŋicne jaŋe aaric mana‐jarekac â kimbeŋ‐ticnere ʒoc i momorifâc‐jeŋic bâruŋke‐jarekac, e sisipiricte biŋe mujarehuc ʒikare nânâ eniŋte qikiŋ‐jopawec hâcne.

³Eme qâhâmoc‐jopakicnefâc‐jeŋic jaŋe mâc behec‐jopapie foraniŋmu, ehuc qâŋɋâŋfâc‐jeŋic âsu fihuc foniŋmu; ehame socjeŋiczi tiki rua‐jareme urueniŋmu.

⁴Sambâŋko bâpiŋ gurune gurune ŋeraŋgopieŋ jaŋe sirowe‐fâreniŋmu, â sambâŋ e papia bataforieeŋgopieŋ iŋuc foforieocmu; eme gurufâc‐ticne jaŋe waiŋ rehacne me jâmbojâc rehacne ɋaŋa ururuc erâ mârâŋkeekac irec sâc mârâŋkerâ wahaniŋmu.

⁵Manaŋgopieŋ, ʒika‐nanezi sambâŋko kimbeŋ nâ gapec erâ waha Edomko okac babazu gie baocmu, ŋicguru sisipiricte biŋe râec‐jopapo jaŋerao hâcne.

⁶Wofuŋte ʒika i soc â wokemaŋhec sasawa, lama â noniŋ irec soc erâ lama ŋicne râpe hândâŋne irec wokemaŋ hâcne. Wofuŋ e Bozera hae ira taha bâzi gie â Edom mâreŋko qa hezuc ee sâko bâfuaocmu.

⁷Kâte bulimakaozi bulimakao biuc sâko jaŋehec hâmoniŋmu, â bulimakao ŋicnezi motecne jaŋe ŋicne tâpiri sâko jaŋehec sipirickeniŋmu. Eme soczi hae mâreŋ‐jeŋic isirickeocmu â mâreŋ i wokemaŋhec sasawa foocmu.

⁸Wofuŋte okac babazu dameŋ maickeocmu. Zioŋ kikefuŋ râsi ejarembiŋ jaŋere okac babazu jara dameŋ hâcne.

⁹Eme Edomte opâ jaŋe ŋerisierâ waha kufaŋ sâŋiŋ eniŋmu â mâreŋ‐ticnezi ŋerisierâ paura sâqocne eocmu; mâreŋ‐ticnezi kufaŋ sâŋiŋ erâ bâruŋkeocmu.

¹⁰Ehuc ŋafeo mecne ʒoaŋko mecne mi hâhâpo, hosâcne ŋezume ŋezu fehuc domaocmu sanaŋ. Mâreŋ i mimiŋzi ɋâric ima bakicne jaha foocmu, ehame ŋic moczi ira sicne fotâc moc mi eocmu hâcne.

¹¹Gafu hâro â homa jaŋe rauckeniŋmu, erâ ŋafe wipe â kâec kâec jaŋe ira ŋec foc eniŋmu. Ehame Wofuŋzi ima baocte sâcmeda fâreocmu â niniŋ siarereŋ fuarâ foocte ma baocmu.

¹²Zioŋ fekicnefâc‐ticne jaŋe ŋicwofuŋ juju fuaocte mocwâc mi muniŋmu, erâ micnefâc‐ticne jaŋe ʒeŋgoma omaeniŋmu.

¹³Eme ŋicwofuŋ ficko fâpâ uupic fuarâ foocmu â ficsanaŋ ira ʒâŋ opac fuame kâte qâto â qera jaŋere ŋeŋe hae eocmu.

¹⁴Eme ŋifec qowi mimicne â kâte qâto â ŋifec ine kâpâ jaŋe âgofâc‐jeŋic jaŋehec bâbâfuac eniŋmu, erâ ŋafere demoŋzi ira ŋeŋemana hae‐ticne bâfuaocmu.

¹⁵Qotâ e jâc semunao juju fofo ehuc hândâŋ râerâ fomackekume âteʒuocmu; erâ tucwipe jaŋere hozi ira fuaocmu wâc, ehame moczi moc âgone moc mi basaocmu.

¹⁶Ŋoŋe Wofuŋte papiao dâŋ ʒiŋuc fokac i wose gufuc erâ mananʒepieŋ: Jaŋeraonec moc mi basazo, moczi âgo tâmiric moc mi juocmu. Wofuŋte mickonec mumupaŋ dâŋ iŋuc hâcne wahawec â Mâro‐ticnezi hetumaŋ‐jopawec.

¹⁷Eme e jahac mâreŋ bâtâc bajareocte qaŋgec qawec, ehuc meticnezi sâcmeda fârehuc kâdoc qajarewec; eme jaŋe irec rune erâ jusanaŋkenʒepieŋ, â mimiŋzi ɋâric maŋnao ŋec juc ehuc juranʒepieŋ.