Jesaja 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Tuhu mâreŋ â mâreŋ burocne jahe kiwac qawac ezepirec â mâreŋ sawa i ʒeri ezejec, ehuc faroqac iŋucne âri qazejec.

²Ârine mâretec fuame ʒeri bari ehuc gae hezejec. Lebanoŋte ʒâŋe rara erâ Karamele tiki â Saroŋ wâneŋte eri qaraweŋ fuacnezejec. Jaŋe Wofuŋte ʒâŋe rara â Anutu‐nâŋecte eri qaraweŋ honenʒepieŋ.

³Mejeŋic betaŋkekicne â dieŋ‐jeŋic sâqorekicne jaŋe dopec‐jopahuc basanaŋ‐jopapie qiŋ herâ domanʒepieŋ.

⁴Ehuc maŋjeŋic gâckekicne jaŋe ʒiŋuc jazaniŋ: “Ŋoŋe hâbi‐ŋeŋic hepie hume hâhâwic tâmiric junʒepieŋ. Manaŋgopieŋ, Anutu‐ŋeŋic e jukac! E okac babazu gie baocte fisiocmu; Anutu ŋic okacne jareekac e hâcne ware bafic‐ŋopaocmu.”

⁵Iŋuc fuame tiŋtuŋ jaŋe ʒâŋe fifi eniŋmu â qepoŋ jaŋe hazec‐jeŋic uŋtoocmu.

⁶Puriŋ jaŋe kâte bulimakao iŋucne gasackeniŋmu â nâŋguŋ jaŋe nameŋ‐jeŋic forisieme ʒeri gae heniŋmu. Manaŋgopieŋ, mâreŋ burocnao opâ ʒâŋene â mâreŋ sawao opâ sâko fuarâ foraocmu.

⁷Ehame dameŋ juwicnao mâreŋ opâ tâmiric fowec ira riqic fuarâ foocmu â kereŋke hahaŋ ekicnao opâ ʒâŋene wefuocmu. Mârâc kâte qâto jaŋe juju fofo embiŋ ira sohoŋ fuaocmu â sopâc irec okacne saparac â ʒamac ʒamac wefuocmu.

⁸Eme ira hata sâko hewâneŋkekicne moc fuame ʒâŋene “Tiri Hata” muzo. Ŋic hehesicne jaŋe ira moc mi âtehuc juhapie ŋicfâc‐ticne jaŋere biŋe sawa foocmu. Ehame jaŋe ira rahapie ŋic mutucnezi kosa rac warec mi enʒepieŋ.

⁹Laioŋ jaŋe ira moc mi juniŋmu â qowi mimicnezi wâc mi âteniŋmu, jaŋe ira basac‐jopazo; ehame batarac‐jopakicne jaŋe ine ira rahuc juniŋmu.

¹⁰Â Wofuŋzi rambaŋko râec‐jopawec jaŋe ira risieniŋmu, erâ Zioŋko fisirâ aŋara heniŋmu; ehame bubiaŋ fofo sanaŋzi fua‐jareocmu, ʒeri â bubiaŋ fua‐jareme busâqoc â kio husezi omaeocmu.