1Jei, sisipiric ŋic go, gahacne mi sipiricgukicne! Jei, gâcne jaŋere wiac kâŋgâc jowac rohaŋtec gahacne wiac moc mi gowac rombiŋ. Go sisipiric gie batec tarame gahacne sipiricguzo wâc, â gâcne jaŋere wiac kâŋgâc jowac rofâretec tarame gahacne wiac i gowac rozo wâc.
2O Wofuŋ, go nâŋere busâqoc manac, nâŋe gore mamanac juŋgopeneŋ, go furic sâc mesanaŋgezi bacnâpo juhuc ʒârâ hâriŋ dameŋko babafic‐nâŋec juzemec.
3Ŋic gurune gurune jaŋe fânâŋ sâkore wiseniŋmu, â go gahacne faharetec ŋicne ŋicne jaŋe tâtieniŋmu.
4Ɋirikiŋzi monʒaŋ nâfâreekac irec sâc mafa mateŋ‐ŋeŋic ŋowac ropie omaeocmu, â ɋirikiŋ motecnezi gasackeeŋgopieŋ irec sâc gasackerâ ro rauc eniŋmu.
5Wofuŋ e fekicne jâmbâŋ, e faic fejâmbâŋkerâ jukac hâcne; eki mume mumutiŋ dâŋ â tiŋne juju izi Zioŋ hae sâcke‐fârerâ foocmu.
6Eme eki juju dameŋgere hobeteŋne eocmu, ehame bâbâpiaŋ â maŋɋârâŋ â mamana tara tahacgume ɋâfoŋne fogareocmu; Wofuŋ araŋ babacne izi Zioŋ ʒeŋaŋ‐ticne eocmu.
7Manaŋgopieŋ, ŋic qac momori jaŋe hae ʒoŋao kio huse eŋgopieŋ, â wamare biŋe mumu jaŋe ki kâcɋene kioŋgopieŋ.
8Hata sâkozi niniŋ siarereŋ fokac â ŋiczi hata rac warec ee i omaewec. Ʒâʒâfic hetâcnekicne, â mumutaniŋ ŋic qaisoc‐jopakicne, erâ ŋicte manapie wawahane eekac.
9Mâreŋ hawarine i mamakucne ekac, Lebanoŋ tiki e mimierâ hâmo qanʒaraŋ ekac; Saroŋ wâneŋ e mâreŋ burocne iŋucne erâ Basaŋ mâreŋ â Karamele tiki jahe jâc garaŋ garaŋ iŋucne.
10Wofuŋzi ine mukac: “No ʒi qâhâŋnerâ fahare hâŋ ferâ fekicne domapemu hâcne.
11Ŋoŋe jacgoŋ dopâne hâmo kereŋ ekicne kiweckerâ jawane roniŋmu; nokafe‐ŋeŋiczi ʒoc iŋucne erâ ŋoŋe ŋaŋacne ʒâseŋ‐ŋopaocmu.
12Eme ŋic gurune gurune jaŋe ʒacjopa‐fâreme huc iŋucne eniŋmu, fâpâ uupic hetâcnekicne iŋucne ʒocko ʒatâmirec‐jopaocmu.”
13Taicko juraŋgopieŋ ŋoŋe wiac ebac epo i mananiŋ â bembeŋko juŋgopieŋ ŋoŋe tâpiri‐nane ʒâŋitaniŋ!
14Zioŋ haeo sâqocne bapazi fâfâreŋgopieŋ â ŋic sindaŋne jaŋe ɋarac ɋarac qahuc ʒiŋuc mu wioc eŋgopieŋ: “Mozi ʒoc ʒa ʒâtâc eene irec maŋfuŋko sâcne ŋeocmu? Mozi ʒocmimiŋ fofo sanaŋko ŋec juc eocmu?”
15Moc e tiŋne juhuc dâŋ fârine muocmu me moc e ŋic jâiŋ‐jopahuc moneŋ mafa huhure i qaisockeocmu, me bâbâmiriŋ moneŋ rozacte meticne soŋaŋkeocmu, me ʒikare saŋuczi hazecnao huzacte hazec‐ticne bâbâzickeocmu, me wiac sâqocne honebâckezacte ʒâŋe‐ticne bâsoŋkeocmu,
16ŋic eki hâcne faic tikitoŋko ŋec juc eocmu, ehame qânâuŋzi ficsanaŋ‐ticne eocmu; nânâ poroŋ‐ticne râcnekicnere mi basaocmu â opâ‐ticne mi ʒickeocmu.
17Ʒâŋegezi ŋicwofuŋ hawari biaŋ‐ticnehec honecmu, ehuc ʒâŋe fitec rame mâreŋ moc qaratiekicne fokac i mâmâc ʒâŋitacmu.
18Maŋ mamanasuge i wiac hâhâwicnere manatâc qâtâc ekac, ine ʒiŋuc: “Moneŋ wose biric ewec e weni? Takesi moneŋ sigelio râewec e weni? Ficʒora hâŋ bafekicne wose qâreŋ ewec e weni?”
19Ŋicguru repicne marac buŋbuŋ sâkohecte dâŋjeŋic mi mamanane â dâŋ mu ŋâtâŋ epie mi taniŋkeekac jaŋe hâcne mocwâc mi honec‐jopacmu.
20Zioŋ hae, tutumaŋ wiac‐nâŋecte hae sanaŋ honec! Ʒâŋegezi Jerusalem hae i jujumana hae â qoruc boze ŋeŋe sanaŋ iŋucne ŋeha honecmu; fâzâ‐ticne i mocwâc mi unuckeniŋmu â repa‐ticne sasawa i mocwâc mi tâcneocmu.
21Wofuŋ e ine ira ɋuŋɋasaŋ‐ticnehec erâ opâ â opâ sâko irec okacne junâreocmu, ehame opâ irec faio woke piticne â kâcɋene jaŋe rac warec mi eniŋmu.
22Wofuŋ e dâŋ mumutara‐nâŋec, Wofuŋ e guriŋ bapa‐nâŋec, Wofuŋ e Femicne‐nâŋec, eki hâcne nâŋâc bafic‐nâpoocmu.
23Repa wiacge ŋeŋgoroŋkeha jâmâ qiŋ herâ mi domaocmu â rac mi fâretiŋkeocmu. Eme mafa mateŋ bocjaha kâdoc babac eniŋmu, ehame kike demba jaŋe mafa mateŋ ro sakac eniŋmu wâc.
24Eme haeru moczi ʒiŋuc moc mi muocmu: “No huc bacnukac.” Ŋic ŋokac ira ŋec juc eniŋmu jaŋe sâqocne‐jeŋic bâtâmire‐jarekicne.
