1Honeniŋ, keci kiŋaŋŋic‐nane, no e hâcne dopeckeekopac, e ŋicnane bâwosâekicne, no e hone aŋac ecneekopac. No Mâro‐nane ere faio râepe bafickeha ŋicne ŋicne mumutiŋ dâŋ musoka‐jareocmu.
2E dâŋ hahaŋne bahuc ojowa sâko mi eocmu â hae ʒoŋao dâŋmarac‐ticne fuame mi mananiŋmu.
3Bo paruczi qakicne i qâtâcne behec mi eocmu, â ʒoc kine mi âte hâpoocmu; mumutiŋ dâŋ fâretiŋ bâtâcne bâtimuŋ eme maniŋ biaŋ fuaocmu.
4E jahacne docke pârâc mi ehuc giene bakume mâreŋko tiŋne juju fuarâ foocmu; ehame nucne nucne jaŋe mumutâc dâŋticnere woŋec ŋeniŋmu.
5Sambâŋ bâfuarâ qaratieme forakac, mâreŋ â fainao wiac fua rakac i bâdâmâreekac, mâreŋ ŋecjucfâc‐ticne nokafe ficne‐jareekac â fainao rac warec eeŋgopieŋ jaŋe jujure mâro jareekac, Wofuŋ Anutu eki hâcne ʒiŋuc mukac:
6“Wofuŋ no hâcne tiŋne‐nanere erâ wira hefârec egarepo, erâ meo bacgu juhuc ŋezicgupemu, ehuc no ŋicguru jaŋehec ʒâʒâfic fuaocte â ŋicne ŋicne jaŋere ʒoc tamac ecmurâ râecgupemu.
7Eme tiŋtuŋ jaŋere ʒâŋe bâtâcnezemec â niŋgiŋko ŋeeŋgopieŋ jaŋe mecne erâ kâpâcwâru ficko ŋehuc dapâcko qiŋquŋkeeŋgopieŋ jaŋe mâmâc goroŋ‐jopatec wahanʒepieŋ.
8Noni Wofuŋ, ʒâŋe‐nane iŋuc hâcne; no ʒâŋe biŋe‐nane mocte biŋe eocte mi manasupemu â ʒai ʒonʒoŋ‐nane nemu jaŋerao fotâcneocte wâc mi manapemu.
9Manaŋgopieŋ, no mârâc dâŋ mupo i fârinehec ewec, eme ʒi dâŋ ɋâricne ŋazakopac; wiac ɋâricne mi fua tâcnehame dâŋne ŋazape manaŋgopieŋ hâcne.”
10Hâwec faio rac warec eeŋgopieŋ â maŋnao wiac fusucmarâ foekac, nucne nucne â ŋecjucfâc‐jeŋic ŋoŋe Wofuŋ gae ɋâricne hecneniŋ, ehuc mâreŋ qaŋeŋnaoneczi ʒâŋe biŋe‐ticne mumbiaŋkeniŋ.
11Mâreŋ burocne â ira hae ŋerakac jaŋe mecne erâ Kedara ŋic qoruc boze ruckerâ jueŋgopieŋ jaŋe mâmâc ʒeri fânâŋ epie fua‐fârezejec; qânâ hawecko ŋec juc eeŋgopieŋ jaŋe ʒeri bari enʒepieŋ â tiki botâŋko domahuc kiwac qawac enʒepieŋ.
12Jaŋe Wofuŋ muac baafec ecnenʒepieŋ â nucne nucne ira ʒâŋe biŋe‐ticne musokanʒepieŋ.
13Wofuŋ e ŋic qac momori iŋucne ʒikare faharekac â momori iŋucne ʒika qaocte bune wefukac; e hahaŋne bahuc semuja hekac â ŋic qac momori iŋucne râsifâcne jopazo rakac.
14No dameŋ ʒora mâc fâsâerâ jupo, no niniŋkerâ maŋnane bâmâteŋkepo; ʒi ine ŋokac gozi kime owackeekac irec sâc owackepemu, no husehuc nokafe kâcɋene hepemu.
15No mupe tikire â facnere jâckâte omaeocmu â kecɋaŋ‐ticne hâmo ɋaŋac efâreocmu; erâ mupe opâ sâkozi mâreŋ kereŋne eocmu â riqic wiaczi ʒicke‐fâreocmu.
16Eme no tiŋtuŋ jaŋe hata kâuc baeŋgopieŋ ira jowac‐jopa rapemu; â hatagâŋ mi honembiŋ ira bacjopa rapemu, no bânie‐jarehuc mupe dapâczi ŋerisierâ tatamac eocmu; â wâcne facne hezu hemasec epe mâreŋ wâneŋkeocmu. Wiac i sasawa moc mi behehuc ejâmbâŋkepemu.
17Eme nemu jaŋerao roweckehuc ɋâŋ qâqâtâc ba akic ekicne jazaeŋgopieŋ, “Ŋoŋe hâcne nemufâc‐nâŋec,” jaŋe rârâpe rahuc qurutuanʒepieŋ.
18Qepoŋ ŋoŋe mananiŋ, â tiŋtuŋ ŋoŋe ʒâŋe firâ honeniŋ!
19Mozi kiŋaŋŋic‐nanere sâc tiŋtuŋ erâ jukac, me mozi biŋe mumu‐nane sorepe raocmu ere sâc qepoŋ erâ jukac? Mozi Wofuŋte âgo fuŋfuŋ â kiŋaŋŋic ere sâc tiŋtuŋ erâ jukac?
20E wiac bocjaha honehuc sifu mi hone taraekac â hazec‐ticne uŋto‐bipieha mi mana‐hâmoekac.
21Wofuŋ e tiŋne juju‐ticnere erâ sâcmutâc dâŋticne tâpiri â eri qaraweŋhec fuaocte maname biaŋkewec.
22Jaŋe ine ŋicguru wiac‐jeŋic fiuckekicne â jowac rokicne; jaŋe sasawa nombâŋko niŋgiŋhec foeŋgopieŋ â kâpâcwâru ficko soŋjopapie ŋeeŋgopieŋ. Jaŋe mafa mateŋ iŋucne rocjopakicne, ehame fifirue‐jeŋic moc mi jukac; jaŋe wiac‐jeŋic jowac rokicne eme moczi ʒiŋuc moc mi mukac: “Bârisie‐narec.”
23Ŋoŋeraonec mozi irec hazec râeocmu me mana‐hâmorâ maŋkeme foha jufeocmu?
24Mozi Jakobo fiuc roro ŋic qikiŋne‐jarewec, â Israe soroŋ qaqa jaŋere meo râewec? Wofuŋ bunao bambeŋ eki hâcne ewec! Jaŋe ine hata‐ticne âteniŋte takic‐jopawec â sâcmutâc dâŋticne mana rereŋ mi embiŋ.
25E irec hâcne kimbeŋ‐ticnere ʒocbâruŋ â ʒika bipinehec fai‐jeŋicko hoŋkeme fewec; izi rârec‐jopahuc ʒâseŋ‐jopaha mi mana tarambiŋ, ʒacjopaha sifu maŋjeŋic mi uŋtowec.
