1Wofuŋ Anutu Mâro‐ticnezi nore faio wahawec, i gie ʒiŋuc bapemurâ Wofuŋzi rua‐narewec: Hujukicne bubiaŋ dâŋ jazapemurâ, â bu qâqânducne jauŋ‐jopapemurâ sorecnuwec kâpâcwâru ŋic rambaŋ jujure biŋedâŋ jazazo, niŋgiŋhec jaŋe niŋgiŋ goroŋke‐jareocmu i mufua‐jarezo.
2Wofuŋte aki jara biaŋ musawezo, erâ wâc Anutu‐nâŋecte okac dameŋte muzo, eme busâqoc ehuc juŋgopieŋ jaŋe fie ruruckenʒepieŋ.
3Zioŋ maŋnao ki mamakuc ehuc jueŋgopieŋ jaŋe mateŋte okacne hendiŋ jarezo, ʒafe ʒure‐jarehuc tokic rua‐jarezo, ehame kire okacne mumuteŋ gae fuazejec. Ʒâŋe‐jeŋic ine tiŋne jujure jâcne muzo, eme Wofuŋte jufu gie epie ere mumuteŋ fuazejec.
4Jaŋe fic sesuc raŋɋane heɋârerâ banʒepieŋ, wiac mârâc jaha mâreŋko waha qawec fokac i bafaharenʒepieŋ, erâ hae ima bakicne mimiŋzi ɋâric fowarewec i giene bakupie harierâ fuazejec.
5Eme ŋic jabane jaŋe hae qowifâc‐ŋeŋic soŋaŋ‐jopaniŋmu, mâreŋ mockoneczi nânâ â waiŋte hesarac gie baŋareniŋmu.
6Ŋoŋere ʒâŋe ine Wofuŋte taha bapa muzo, ŋiczi Anutu‐nâŋecte kiŋaŋŋicfâc muŋareniŋmu; ŋicguru gâcne jaŋere mâriri nâniŋmu, jaŋeraonec mafa bajuhuc mana aŋac eniŋmu.
7Mimi faio jumbiŋ irec furine fehuc ŋarezo, bawahac‐ŋopakicnere aŋac faio juniŋmu; erâ mâreŋ dâkâne jajahec jajahec rauckeniŋmu, â bubiaŋ tofamâc mana rahuc juniŋmu.
8Wofuŋ no wiac tiŋkerâ foocte enareekac, fiuc â bâbâsifucte ine takicnuekac. Irec no furi aickerâ jarepemu, erâ jaŋehec ʒâʒâfic sanaŋne epemu.
9Ɋâricfâc‐jeŋic i mâreŋ sâc manac‐jopanʒepieŋ, ŋicne ŋicne jaŋe oso gitecfâc‐jeŋic hone ʒâŋitac ejarenʒepieŋ. Hone manac ejareniŋmuzi ʒiŋuc munʒepieŋ: Ŋicguru ʒi jaŋe Wofuŋzi jambuŋ‐jopawec.
10No Wofuŋ bubiaŋ sâko manacnepe, maŋ qâqâtâc‐nanezi Anutu‐nane ʒeri ecneoc! E bibiaŋkere ŋaqi henareme huwec, titiŋkere rurufa biaŋ rufa‐narewec: Ŋicʒeŋoŋ moczi eri hendiŋ heme huekac irec sâc, â ŋokac ʒeŋoŋzi kubu qonaŋkeekac iŋuc hâcne.
11Mâreŋkonec jâc bac wiac âkeʒurâ wefuekac, â gieo nânâ monʒaŋ bâpâŋ qarâ wefuekac, irec sâc Wofuŋ Anuture micte tiŋne juju fua biaŋ eocmu, eme ŋicne ŋicne jaŋere maio mumumbiaŋ fuaocmu.
