1O Wofuŋ, go nore Anutu, no muac baafec egarehuc ʒâŋege mumbiaŋkekopac; goki hâcne mâsi fuŋne fuŋne bameŋ â mârâc jaha mumutâc dâŋ mana biric emeŋ i jâmbomac â fârine jâmbâŋ.
2Goki hâcne hae sâko ima bameŋ, ficsanaŋ heroc qâropiemeŋ, râsi jaŋere erific bâsirowemeŋ; eme mocwâc heɋârehuc mi baniŋmu.
3Irec hâcne ŋicguru tâpiri‐jeŋichec jaŋe sâsecguniŋmu â ŋicguru qac momori jaŋe hae‐jeŋic sâc araŋ bagareniŋmu.
4Goki hâcne ŋic qarâ suriŋne jaŋere jâcsanaŋ â hapetac keke suec suec ejarekicne jaŋere huec sanaŋ. Go hoe mâŋâŋ hâhâwicnere qânâuŋ â ʒoaŋ fârorocte nâkumuc ejaremeŋ, i tâpirihec jaŋere micrombâŋ hoe micsâkozi fic sâpenao heekac iŋucne tinac, â mâreŋ burocnao ʒoaŋ fârone iŋucne fuaekacte iŋuc ejaremeŋ.
5Go râsi jaŋere ojowa bâniniŋkekomec; karoraczi ʒoaŋ sâockeme fâroroc‐ticne mâteŋkeekac irec sâc bâbâʒâic ŋic aŋara‐jeŋic niniŋkewec.
6Eme Anutu Tâpiri Ɋuŋɋasaŋ Wofuŋ e tiki kecʒira ŋicne ŋicne tiwâ bâzi moc rike‐jareocmu, ehuc wiac wokemaŋhec â waiŋ opâ aŋacne jare gumec eocmu, nânâ wiac âsu mumundoŋ â wokemaŋhec â waiŋ opâ fowefuhuc juku aŋacne jâmbâŋ ewec i.
7Erâ e qâruruzi ŋic gurune gurune foŋjopakicne â bilaŋke ŋicne ŋicne jaŋere faio qaratiekicne fokac i tiki ʒira bârârie‐jareocmu.
8E hâmocte tâpiri qame omae sanaŋkeocmu. Wofuŋ Anutu e ŋic sasawa ʒâŋeuc‐jeŋic bâkereŋkeocmu, ehuc mâreŋ sâc ŋicfâc‐ticne mimi busâqoc jowac rofâreocmu. Wofuŋzi iŋuc muwec hâcne.
9Ʒoaŋ ira kecʒiŋuc muniŋmu: “Honeniŋ, keci Anutu‐nâŋec hâcne, eki bafic‐nâpoocte woŋeckembeŋ; woŋec‐ticne jumbeŋ Wofuŋ e hâcne. Irec ʒeri bari ehuc hone bafic enâreekacte bubiaŋ mananʒepeneŋ!”
10Eme Wofuŋ e tiki kecʒi akickehuc meticne râeme foocmu; Moabi ŋic jaŋe ine juŋgopieŋkoa âtenʒaŋ‐jopaocmu, i ŋiczi sopâc sohoŋmaŋko âte utuckeeŋgopeneŋ irec sâc.
11Eme jaŋe irec maŋnao fohuc, ŋic moczi fifia baocte mene sicneekac irec sâc mejeŋic sicneniŋmu, Wofuŋzi ine sifu pepec‐jeŋic â mejeŋicte gie sâko i mâmâc bawahaocmu.
12Ehuc qânâsac‐jeŋic sanaŋne â ʒoricne i hefâc qâfâuckehuc mâreŋko tuŋkeme waharâ rufemaŋko huocmu.
