Jesaja 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Erâ hâhâwic maŋko juhapie dapâc fowec i mi fosanaŋkeocmu. Mârâc dameŋko Wofuŋzi Sebuloŋ â Naftali mimi busâqoc bâfua‐jactewec, ʒâhec dameŋko ine riqic hata, Jordaŋ ocniŋuc mâreŋ fokac, qâpuc jaŋere hae mâreŋ irec ʒâŋe biŋe bafahareocmu.

²Ŋicguru dapâcko hata juŋgopieŋzi ʒoctamac sâko honeŋgopieŋ, â mâreŋ dapâcnao ŋec juc eŋgopieŋ jaŋe tamae‐jarekac.

³Go ŋicguru basawec‐jopakic â bubiaŋ bâŋɋârâŋke‐jarekic; maigao ʒeri eŋgopieŋ i nânâ nânâsuo ʒeri fuaekac irec sâc, â râsi jaŋere mafa bâtâc bahuc aŋac‐jopaekac iŋuc hâcne.

⁴Tagi kimac‐jopawec â reŋ ɋawe‐jeŋic nâwec â bâbâʒâic ŋic ere ɋaruc i qazu behec ekic, Midiaŋte dameŋko fuawec irec sâc.

⁵Momori ʒikao kike saoŋ qaeŋgopieŋ jaŋere kikehuhu â ŋaqi soc rurua i ʒocte nânâ efârekac.

⁶Nâŋâc ɋie moc fua‐nârekac, ŋokâ moc tahac‐nâpokicne, eme guriŋ bapa gie i ere ɋaweo foocmu. Ʒâŋe‐ticne ʒiŋuc muzo: “Mâsi‐Hata‐Bâbâfua, Tâpiri‐Anutu, Juju‐Sanaŋ‐Mamac, Wama‐Ŋicwofuŋ.”

⁷Guriŋ bapa gie‐ticne ŋeratie rame wama fofo sanaŋ foocmu, Dawidire eri ŋeŋeo â mâreŋ sâc guriŋ baocmu; eme ere bâbâtiŋ â tiŋne jujuzi eri ŋeŋe‐ticne bafaharerâ dopeckeme ʒiŋuczia ŋekaczi ŋerahuc juzokac. Anutu Tâpiri Ɋuŋɋasaŋ Wofuŋ ere ʒoɋaczi wiac i bâfuaocmu.

⁸Wofuŋzi Jakobo okacdâŋ moc râecnewec, dâŋ izi Israe fainao waha qaocmu.

⁹Eme ŋic sasawa hone manac eniŋmu, Eferaim guru â Samaria rune, maŋfefe â penaroŋ ehuc ʒiŋuc mumbiŋ jaŋe hâcne:

¹⁰“Qoracfic ʒaŋkewec irec okacne busefic banaŋmu, nemuja farawec irec âkehoc jâmâzâc saranaŋmu.”

¹¹Eme Wofuŋzi guguriŋfâc‐jeŋic tâpiri jareocmu, â râsifâc‐jeŋic suruc‐jopame fisi‐jareniŋmu.

¹²Siria ŋic ʒoaŋ wewefunaopec â Filisa ŋic huhunaopec, jaŋe Israe ŋic mauc fufusuc ki nâc ejareŋgopieŋ. Eme sifu kimbeŋ‐ticnezi mi qaʒue wahakac, â menezi mi betaŋkehuc qiŋ herâ domakac jaha!

¹³Eme ŋicguru jopa bâtiŋ ejarewec jaŋe erao mi risiembiŋ, â Anutu Tâpiri Ɋuŋɋasaŋ Wofuŋ e wira basac mi ecnembiŋ.

¹⁴Irec Wofuŋzi Israe qizecne â gecne mâmâc hetâcnewec, fuŋne â botâŋne i ʒoaŋ mocjahao iŋuc hâcne ecnewec.

¹⁵Ŋic raŋɋaŋne â ʒâŋe biŋehec jaŋe qizecne eŋgopieŋ, â porofete burecdâŋ mumufua jaŋe ine gecne.

¹⁶Ŋicguru ʒi micne bajareŋgopieŋ jaŋe jojowac ŋic bâbâsifucne â bâjâpec‐jopaeŋgopieŋ jaŋe sisipiricte biŋe eŋgopieŋ.

¹⁷Irec Wofuŋzi ŋicmotecfâc‐jeŋic jaŋere mi aŋackekac, â hozec bekâfâc‐jeŋic busâqoc mi mana‐jarekac. Jaŋe ʒeŋgoma sindaŋne â sâqocne bapa hâcne, â micjeŋiczi mutucdâŋ sasawa mueŋgopieŋ. Eme sifu kimbeŋ‐ticnezi mi qaʒue wahakac, â menezi mi betaŋkehuc qiŋ herâ domakac jaha!

¹⁸Sindaŋ hârindaŋzi ʒoc iŋucne bâruŋkekac, i ʒoczi sopâc â saparac ʒâtâcneekac erâ wâc kâte uupicko qâhâsârâ ʒaekac iŋucne, eme hosâcnezi ririsiehuc hâŋ feekac.

¹⁹Anutu Tâpiri Ɋuŋɋasaŋ Wofuŋte kimbeŋ izi hâcne ʒocbâruŋ erâ mâreŋ ʒâtâcnekac, eme ŋicguru jaŋe ʒocte nânâ eŋgopieŋ, â qoqomâzi aakic mi eŋgopieŋ.

²⁰Fâreopec ki nâc ejarerâ mi sâcjopakac, qanaopec ɋâcjoparâ mi gapec‐jopakac; qoqomâzi nânâc eŋgopieŋ.

²¹Manasezi Eferaim nakac â Eferaimzi Manase nakac, erâ turerâ Juda râsi ecnekopirec. Eme sifu kimbeŋ‐ticnezi mi qaʒue wahakac; â menezi mi betaŋkehuc qiŋ herâ domakac jaha!