1Dameŋ ira Hisikia e hucsâko bame hâmozo ewec. Ehame Amozire ŋokâ, porofete Jesaja e erao fisirâ ʒiŋuc âzâcnewec: “Wofuŋ e ʒiŋuc mukac: Go wiacfâcge mâzoc‐joparâ ʒawiec, go ɋiɋic mocwâc mi qahuc hâmo‐jâmbâŋkecmu hâcne.”
2Iŋuc mume Hisikiazi sâpeopec forisierâ Wofuŋ numu wâwâsic ecnewec.
3Ehuc ʒiŋuc muwec: “O Wofuŋ, no gore maio siocmâc â maŋ hâcbuc jupo, ehuc goki manatec biaŋkeekac i hâcne ebac epo, go irec manasuc mac!” Hisikia e iŋuc murâ ki kâcɋene kiowec.
4Eme Wofuŋte dâŋ Jesajarao ʒiŋuc fuawec:
5“Go ra Hisikia âzâcnec, Wofuŋ, apage Dawidi ere Anutu e ʒiŋuc mukac: No nunumuge manahuc ʒâŋeucge honepac; irec manac, go juju dameŋge bâʒorape jara 15 ʒuhuckerâ juzemec.
6Erâ no go â hae ʒirec rune ŋoŋe Asiria ŋicwofuŋ ere meonec batarac‐ŋoparâ hae kecʒi ŋezickepemu.
7“Eme Wofuŋzi dâŋ mupaŋkewec i Wofuŋzia fârine bâfuaocmu irec ma kecʒiŋuc fuame honezemec:
8No ʒoaŋzi huzo ehame Ahaʒi ficticnere mumuc ʒorakac i mupe ʒoaŋzi risie wefume mocwâc bembeŋkezejec.” Eme ʒoaŋzi risieme mumuc mocwâc bembeŋkewec.
9Juda ŋicwofuŋ Hisikia e hucsâko foku biaŋkerâ gae kecʒiŋuc hefuarâ qâreŋkewec:
10No maŋnanezi ʒiŋuc mupo: Juju dameŋ‐nane mi qosackeha biac hâmoc haeo hupemurâ munarekicne, ehame jara‐nane nâfocne fokac i nowac rokicne.
11No mupo: Wofuŋ e ŋic jujune jaŋere mâreŋko mocwâc mi honepemu erâ mâreŋ sâko mâreŋ ŋecjucfâc‐ticne jaŋere ŋondeŋko juhuc ŋic mocwâc mi honec‐jopapemu.
12Boze‐nane heropiekicne â lama soŋaŋte qoruc boze iŋucne noraonec bârâriekicne; ŋokac jaŋe he fuku muc wiac qâzuckerâ râeeŋgopieŋ irec sâc no juju‐nane râekopac; Wofuŋzi juju‐nane muc iŋucne bâtâcnekac; hae mi ŋafeha behecnume omaekopac.
13No wira wâwâsic ehuc juhape hae fureekac, eki ine laioŋ iŋucne siec‐nane sasawa bazuekac; e furicte fuŋkerâ bâʒâicnuhuc juhame hae ŋafeekac.
14No sawa hehetâc wipe â hapâ iŋucne dâŋ dâŋ eekopac. Faicpec ʒâŋe fihuc juhape ʒâŋeuc‐nane wahaekac. O Wofuŋ, ʒâic busâqoc fua‐narekac, go baficnuc.
15Ʒi ine weniŋuc mupe? E jahac dâŋ mupaŋke‐narewec irec fârine bâfuawec. Bunanezi hâhâtâwekacte guŋɋâri juekopac.
16O Wofuŋ, ŋiczi gore erâ jueŋgopeneŋte, maŋnanezi gorao hâcne siŋkerâ foekac; irec mutec mocwâc ɋiɋic qarâ biaŋkezepac!
17Manakic, ʒâic busâqoczi maŋ wama bâfua‐narewec; goki ine maŋnanezi sisipiricte nombâŋko huzacte ŋezicnumeŋ, ehuc kiŋnane behe‐fâremeŋ.
18Hâmokicne jaŋe mi muteŋgueŋgopieŋ â hâmoc e wâc muteŋ bâteŋ mi egareekac, erâ nombâŋko hueŋgopieŋzi jauŋ fârigere woŋec sâcne mi juniŋmu.
19Jujune jaŋe sawa muteŋgueŋgopieŋ, ine no miŋecgac muteŋgukopac irec sâc. Mamaczi naru motecfâcne jauŋ fârigere fuŋne mutâcne‐jareme manaeŋgopieŋ.
20Wofuŋ e baficnuocte afeckewec, irec jufenaŋmu sâc Wofuŋte ufuŋko gitazi musi bahuc gae hecnehuc junʒepeneŋ.
21Jesaja e kecʒiŋuc muwec: “Ŋoŋe qaqanac jâc sahacne fâzerâ uucne sisiwiŋ‐ticnao râepie biaŋkezejec.”
22Hisikiazi ine muwec: “No Wofuŋte ufuŋko mocwâc fepemurâ wemo ma mo fuame honezepac?”
