1Beli nemu e betaŋkewec, Nebo nemu e waha qawec, ɋâŋ qâqâtâc‐jekic i doŋgi â kamele jaŋere faio râepie fewec; ŋoŋe wiac hâporâ jujumbieŋ i hâcne qowi betaŋkekicne jaŋere tagi ewec.
2Jahe mâmâc jaha docke betaŋ ekopirec, jahe tagi baafeckenicte eipiehuc jahe jahacne kâpâcwâru ficko rakopirec.
3“Jakobore kikefuŋ jaŋe mecne â Israere kikefuŋ irec ŋic ʒanʒaŋne mecne, neŋgoc bumaŋkonec fuapie fuŋkerâ dope hutuŋ eŋarehuc juwarepo â neŋgoc bumaŋkonec fuapie âsi qataŋ eŋarehuc juwefupo ŋoŋe nore dâŋte hazec râe‐fâreniŋ.
4No jupo iŋuc jaha juhape ŋoŋe jufeku ŋic ŋokac raŋɋa eniŋmu, no de âsic eŋarehuc juhape jaŋɋâŋzi âkec‐ŋopaocmu. No de âsic eŋarepozi eŋarehuc juzepac, no hâpoc‐ŋopahuc ŋezic‐ŋopazepac.
5“Ŋoŋe mohec sâc mocjaha epemurâ muŋgopieŋ, me mohec sâc hecnuzo muŋgopieŋ? Me more hawari jaha epemurâ erao ʒuhucnurâ sâc bacnuŋgopieŋ?
6Jaŋe kânoŋkonec gol hoŋkepie wahaekac â siliwa sigelio râepie feekac erâ golzi wiac bapa e nemuɋâŋ bajareocte furine râcneeŋgopieŋ, erâ e dieŋzi herâ numucneeŋgopieŋ.
7Jaŋe ɋâŋ i hâpo raku dodoma‐ticnao âkendâŋnepie domaekac, eme ira domahuc moc mi waha raocmu. Ehame moczi mu wâwâsic ecneme dâŋ moc mi bâtikiecneocmu, ehuc ʒârâ hâriŋ‐ticnaonec mi bataraocmu.
8“Maŋrâŋgeŋhec ŋoŋe irec manasurâ mimieniŋ, erâ maŋzi manatâc qâtâc eniŋ.
9Fuŋnaonecteaŋ wiac fowarewec irec manasuniŋ: No hâcne Anutu, norao ʒuhuckerâ moc mi jukac; no hâcne Anutu, no iŋucne moc mi jujâmbâŋkekac.
10No hâcne ʒâhec wiac fuazokac i fuŋnaonecteaŋ mutaniŋkehuc juwefupo, â wiac fuawec irec dâŋ i mârâc sasac jaha mufuapo, ehuc mupo: ‘No dâŋ mupaŋkepo i deŋkeocmu â mana biric efârepo i wâc fârine bâfuapemu.’
11No ʒoaŋ wewefunaonec tucwipe moc wiracnepemu, e mâreŋ ʒorickonec ŋic moc hâcne, eki mumupaŋ‐nanere fârine bâfuazejec. No dâŋ mupaŋkepo sâc i mupe deŋkezejec, no mana biric epo sâc i fârine bâfuazepac.
12“Maŋrâŋgeŋhec juhuc bâbâpiaŋ maickerâ mi jueŋgopieŋ ŋoŋe nore dâŋte hazec râeniŋ.
13Noraonec bâbâpiaŋ i mupe maic‐ŋopazo ekac, taicko mocwâc mi fokac, ehame bafic‐ŋopazore ŋeŋec ʒeʒepec mi epemu. No mupe Zioŋko bâbâpiaŋ fuarâ fozejec â huriri qâreŋ‐nane i Israe erao fua taniŋkezejec.”
