Jesaja 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Manaŋgopieŋ, ŋicwofuŋ moc fuarâ tiŋne jujure hata bâjâpehuc guriŋ bapa gie baocmu â fekicnefâc‐ticne jaŋe soŋaŋ gie‐jeŋic mumutiŋ dâŋte sâcko bahuc juniŋmu.

²Jaŋe sasawa jâcdapeŋ iŋucne, ŋiczi mâŋâŋte erâ ira soŋkeeŋgopeneŋ; jaŋe hoe micsâko heme qânâuŋzi ŋic sâoc‐nâpoekac irec sâc; jaŋe mâreŋ burocnao opâ fifisine iŋucne â mâreŋ fâronao haroŋaŋ sâko irec mumuc iŋuc efâreniŋmu.

³Ehame ʒâŋe fifi jueŋgopieŋ jaŋe ʒâŋe mi hâmonʒaniŋmu â hazeczi mamana jaŋe hazec hâric mananiŋmu.

⁴Fâro faio wiac kosa eeŋgopieŋ jaŋe maŋ mamanasuhec eniŋmu, â dâŋ fâcke turuŋ ehuc mueŋgopieŋ jaŋere nameŋzi afeckeme dâŋ ɋicɋâc jaha musarickeniŋmu.

⁵Eme ŋic sindaŋne e “fekicne” mocwâc mi mucnezo, erâ ŋic hehesicne ere manapene ŋic biaŋne mocwâc mi eocmu.

⁶Ŋic sindaŋne e ʒaucbac dâŋ muocmu â maŋticnezi sâqocnere mamana gie bahuc sindaŋ hârindaŋ eocmu erâ Wofuŋte dâŋ musifuckeocmu, ehuc nânâ opâre hâmoeŋgopieŋ jaŋe nânâ opâ sakare‐jareocmu.

⁷Ŋic sâqocne ere mamana i sâqocne jaha, irec ŋic qarâ suriŋne jaŋe burecdâŋzi imac‐jopaocte mamana gie baekac, ehuc ŋic hapetac e dâŋgieo dâŋticnere sanaŋkeme sifu burecdâŋzi imackeocmu.

⁸Ŋic biaŋne e wiac biaŋnere manatâc qâtâc eekac, ehuc wiac biaŋne ebac eocte sanaŋkerâ domaekac.

⁹Ajoc, ŋokac manabâc tâmiric jueŋgopieŋ ŋoŋe marac fânâŋ‐nane mananiŋ! Naru ŋokac ŋaŋacnere manapie fâsâekac ŋoŋe dâŋnanere hazec râeniŋ!

¹⁰Oi, manabâc tâmiric ŋoŋe, jara moc tarame maŋŋeŋiczi hâhâŋkeocmu, manaŋgopieŋ, waiŋ fârine roro dameŋ i ŋowaruocmu, â jâchândâŋ roro dameŋ i wâc mi fuaocmu.

¹¹Manabâc tâmiric jueŋgopieŋ ŋoŋe hâwic‐ŋopaha ɋarac ɋarac qanʒepieŋ, â ŋaŋacnere manapie feekac ŋoŋe maŋŋeŋiczi hâhâŋkezejec; ŋaqi wiac hetara‐fârerâ mateŋ qonaŋkenʒepieŋ.

¹²Ŋoŋe buŋeŋic bofackehuc jufu gie biaŋne â waiŋ qizec fâri rarau irec ki mamakuc eniŋ!

¹³Ŋicfâc‐nane jaŋere gieo fâpâ uupic â qinʒiŋ sanaŋ wefukac, erâ hae sâkoo ficne ficne ʒeri bubiaŋ omaeocmu irec mâmâc kioniŋ!

¹⁴Manaŋgopieŋ, ŋicwofuŋ fic i behepie fictac ŋeocmu â hae maŋnao ojowa fokac i omaeme niniŋ siarereŋ fuaocmu, ficsanaŋ â ficʒora hâŋ bafekicne izi qânâ hawec iŋucne erâ foocmu sanaŋ, ehame kâte doŋgi jaŋe bubiaŋ manahuc maŋnao ju fofo eniŋmu â qinʒiŋ fuame lama bulimakao jaŋe nâhuc juniŋmu.

¹⁵Iŋuc fokuhame sambâŋkonec Mârozi fai‐nâŋecko wahaocmu, eme mâreŋ burocnezi ŋerisierâ guecnehec eocmu â mâreŋ guecnehecte manapie kâte mâreŋ biaŋ eocmu.

¹⁶Ehame mâreŋ burocnao mumutiŋ dâŋ fuaocmu â tiŋne juju i mâreŋ guecnao ira foocmu.

¹⁷Eme tiŋne jujuzi wama bâfuaocmu â tiŋne jujure fârine jujumana â wamao juju fuarâ foocmu sanaŋ.

¹⁸Eme ŋicfâc‐nane jaŋe fic hae biaŋnao ŋehuc jujumana mâreŋko hâhâwic tâmiric juniŋmu.

¹⁹Hoe sanaŋzi jâckâte sipiricke‐fâreocmu, â hae sâko e waha qaqane jâmbâŋ eocmu.

²⁰Opâ sasawa irec heririŋnao gie he sarac eniŋmu, erâ bulimakao â doŋgifâc‐ŋeŋic ejarepie aka tâmiric rac warec eniŋmu ŋoŋere manape ʒerine ekac.