Jesaja 59

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Manaŋgopieŋ, Wofuŋ meticne i bembeŋne aricne, irec bafic‐ŋopaocte mi eipieocmu, â hazecfoŋ wâc mi juekac, irec dâŋ manaocte mi quŋkeocmu.

²Kiŋ bahac‐ŋeŋiczi ine ŋoŋe â Anutu‐ŋeŋic ŋondeŋ‐ŋeŋicko aka fokacte â sâqocne‐ŋeŋiczi Wofuŋ sâockekacte dâŋŋeŋic mi manaekac.

³Meŋeŋicko soc bohotaekac â memotec‐ŋeŋic i kiŋ bahachec, micbipic‐ŋeŋickonec burecdâŋ wahaekac â nameŋ‐ŋeŋiczi sindaŋdâŋte saŋuc qaekac.

⁴Moczi moc dâŋgieo wiac tiŋnere dâŋ moc mi dopeckeekac â moczi mumutara dâŋ biaŋne moc mi muekac. Aricne, wiac omanao roweckehuc siocdâŋ mueŋgopieŋ, â wiac hâhâwicne kiweckerâ sisipiric roeŋgopieŋ.

⁵Jaŋe homa hândâŋ fomackepie âkeʒuekac, â qâruru bieeŋgopieŋ; moc e hândâŋ‐jeŋic nâocmuzi hâmoocmu me âtenʒaŋneme qotâ wefuocmu.

⁶Qâruru bieeŋgopieŋ izi ŋaqi mi bapane â wiac baeŋgopieŋ i ŋiczi mi rurufane. Eebapa‐jeŋic i eebapa sâqocne â mejeŋiczi sindaŋ bâfuaekac.

⁷Sâqocnere kike afec jueŋgopieŋ â ŋic bahacmâc jaŋere soc hoŋkeniŋte hata ʒocnehec raeŋgopieŋ. Mamanasu‐jeŋiczi wiac hehesicne manasu biric eeŋgopieŋ, hata‐jeŋicko ima samaki â sisipiric foekac.

⁸Wamare hata kâuc baeŋgopieŋ â hata‐jeŋicko mumutiŋ dâŋ moc mi bâbâfuane; jaŋe hata‐jeŋic hehasickembiŋ, eme ira raocmuzi wamare kâuc baocmu.

⁹Irec mumutiŋ dâŋzi mi maic‐nâpoekac â bâbâpiaŋzi nâŋerao mi ware fisiekac. Nâŋe tatamacte woŋec juhuc mi dapâc honenʒepeneŋ i, erâ ʒoaŋ ʒâziriŋte ʒâŋe fieŋgopeneŋzi dapâc qisiricko jueŋgopeneŋ.

¹⁰Nâŋe ŋic ʒâŋe tiŋtuŋ iŋucne ficsâpeo babarâ raeŋgopeneŋ ehuc ʒâŋe tâmiric jaŋe iŋucne babarâ jueŋgopeneŋ. Nâŋe dapâcko quŋkeeŋgopeneŋ iŋuc jaha ʒoaŋ ɋaɋacko eeŋgopeneŋ, nâŋe sahac ɋiɋichec jaŋere ŋondeŋko ŋic hâmokicne iŋucne.

¹¹Nâŋe ʒeŋgoma kâte qowi iŋucne ŋuruŋneeŋgopeneŋ â hapâ iŋucne dâŋeeŋgopeneŋ; mumutiŋ dâŋte woŋec ŋepene arictac eekac â bâbâpiaŋte woŋec jupene mi bâqiŋ‐nâpoekac.

¹²Qaqatara‐nâŋec i gore maio guru sâko fokac i, â sâqocne‐nâŋeczi mufuac‐nâpokac; qaqatara‐nâŋeczi mai‐nâŋecko fokac â sâqocne‐nâŋec i kâuc mi baŋgopeneŋ.

¹³Kecʒiŋuc: Maŋrâŋgeŋ, Wofuŋ ninikec â Anutu‐nâŋec rârâpecke, sindaŋ hârindaŋ ee â qaqatara, burecdâŋ manasu biric erâ manabâc tâmiric mumu.

¹⁴Mumutiŋ dâŋ bâsuepene rawec â tiŋne juju i taicko wisewec fokac, siocmâc juju i tomao waha qawec, â dâŋ fâretiŋ mumu i âgo mi ecneeŋgopeneŋ.

¹⁵Dâŋ siocmâc mumu i omaewec, eme moc e sâqocne qikiŋneocmu e mafa wiac‐ticne fiuc roniŋmu. Wofuŋ e wiac i honewec, ehuc mumutiŋ dâŋ omaewec irec maname sâqorewec.

¹⁶Eme e ŋic fârine moc mi jume honewec â moczi moc bafickeocte mi fuawecte wareckewec; irec e jahacne mezi bafickewec â tiŋne juju‐ticnezi dopeckewec.

¹⁷E tiŋne juju i maruku iŋucne rufawec erâ aeŋdu, ʒâŋene bâbâpiaŋ i heme huwec; e okac babazuzi ŋaqi‐ticne eha heme huwec â ʒoɋac‐ticne i mâmâteŋ ŋaqi iŋucne rufawec.

¹⁸E eebapa‐jeŋicte sâcko furine jareocmu, kisâfâc‐ticne kimbeŋ qajareocmu, râsifâc‐ticne okacne bazu‐jareocmu, nucne nucne jaŋe okacne bazu‐jare‐fâreocmu hâcne.

¹⁹Eme Wofuŋ ʒâŋe‐ticne i ʒoaŋ huhunaoneczi araŋ bacnenʒepieŋ â ʒoaŋ wewefunaonec jaŋe huriri qâreŋ‐ticnere manapie bipinehec ezejec; Wofuŋ e micrombâŋ‐ticnezi opâ sâko fusinehec ficne sueme raocmu irec sâc fisiocmu hâcne.

²⁰“Zioŋko jueŋgopieŋ â Jakobore kikefuŋkoneczi sâqocne râpeckeniŋmu jaŋe ine fifirue fua‐jareocmu.” Wofuŋzi iŋuc mukac.

²¹Wofuŋzi mukac: “No kecʒiŋuc muhuc jaŋehec ʒâʒâfic ekopac: Mâro‐nane faigao wahawec jukac â dâŋnane micgao râepo fokac i gahacne mickonec â ɋâricfâcge jaŋere mickonec moc mi wawaha mimiŋzi ɋâric forahuc juzejec.”