1O ŋokac ʒeŋoŋ, Babere otâ, go popoonec waharâ wândocko ŋec! Kaldea ŋic jaŋere otâ go eri ŋeŋe tâmiric mâc mâreŋko waha ŋec! Manakic, gore ʒiŋuc mocwâc mi muzo: Joroc kogoc sahac hawari biaŋgehec.
2Go kiŋaŋ naru iŋucne gie omane bahuc juzemec, go rurufage batararâ ŋaqi ʒorage heunuckec â qorucge qafiruŋkerâ dokâge mâc foha opâ fotâcnec.
3Go biuctac jutecne mimige tâtâc fuazejec. No okac babazu gie bahuc ŋic moc mi akickepemu.
4Fifirue‐nâŋec, Israere Tiri rune, ʒâŋene “Anutu Tâpiri Ɋuŋɋasaŋ Wofuŋ” e iŋuc mukac.
5Kaldea ŋic otâ‐jeŋic, go niniŋkerâ ŋec erâ dapâcko raʒic; manakic, go ŋicne ŋicne jaŋere ŋokac bomboŋ mocwâc mi mugarezo!
6No ŋicfâc‐nane kimbeŋ qajarehuc â biŋefâc‐nane ŋic omane mujarehuc gore meo râec‐jopape fembiŋ; goki ine busâqoc mi mana‐jaremeŋ, ehuc ŋic ŋokac qizecne jaŋere faio tagi ŋemâcne jâmbâŋ râetec fewec.
7Ehuc ʒiŋuc manasumeŋ: “Noni hâcne ŋokac bomboŋ juraʒihuc jupemu sanaŋ,” ehuc ʒâhec wiac weniŋuc fuaocmu irec manasuhuc manatâc qâtâc mi emeŋ.
8“No hâcne jukopac ʒi, no iŋucne moc mi jukac; no hozec erâ juju i mi epemu erâ ŋokac mesawane wâc mi jujâmbâŋkepemu,” go iŋuc muhuc aŋac faio â manabâc tâmiric jukomeczi kecʒiŋuc manac:
9Hozec juju â naru motec tâmiric juju, wiac jajahec izi ʒoaŋ mocjahao ututuŋ jaha fua‐gareocmu; jâmbomac, i qaŋgec bapa mâsige bocjaha â riuc bapare tâpiri sâkoge foipie‐gareha sifu fua‐gare‐jâmbâŋkeocmu.
10Go sindaŋ ehuc manabâc tâmiric jumeŋ, ehuc mumeŋ: “Moczi moc mi honecnuekac”; maŋfânâŋ erâ mamanagezi maŋ bâsifuc egareme qâsoriehuc maŋgezi ʒiŋuc mumeŋ: “No hâcne jukopac ʒi, no iŋucne moc mi jukac.”
11Ʒi ine ʒârâ ʒâpâ faio ferâ qaŋgec batec mi rârieocmu; sisipiriczi sahacgao feocmu i sahac tahage râetec sifu mi hetiricguocmu. Ima bâroŋ ʒâŋe furuge moc izi hâcne maicguocmu.
12Qaŋgec wiacge â riuc ripage bocjaha ɋiegaonecteaŋ bahuc juwefumeŋ i fua taniŋkerâ bac me! Eme izi sâcne baficguocmu mecne â wiac mukicne i jâpeme raocmu mecne.
13Go dâŋ bocjaha manasu biric ehuctecne betaŋkemeŋ; irec sambâŋte fuŋne mamana â bâpiŋte fuŋne mamana jaŋe fua taniŋkerâ baficgunʒepieŋ; jaŋe hâcne go wemo wiac fua‐gareocmu i mosa wahaekac sâc mufua‐gareeŋgopieŋ.
14Manakic, jaŋe ʒoczi sopâcko herâ ʒâseŋkeekac irec sâc, ʒocbâruŋko sahac‐jeŋic ŋezickeniŋte eipieniŋmu, i ʒocmimiŋzi sahac‐nâŋec hâroŋkeekac iŋucne mâcne, erâ orâŋkehuc ruaeŋgopeneŋ iŋucne wâc aricne.
15Ɋiegaonecteaŋ âgo ejarecmurâ gie sâko bameŋ, me gohec wiac nareŋ gareŋ ehuc jumbiŋ jaŋe iŋucne sasawa; jaŋe tâtierâ moc e mocko raocmu â moc e mocko raocmu, ehuc moczi moc mi baficguocmu.
