1Eme Wofuŋ e Jakobore busâqoc manahuc Israe ŋic harierâ bâwosâec‐joparâ mame sâko hae‐jeŋicko râec‐jopame juniŋmu. Ehame jaba jaŋe qâtec‐joparâ Jakobore kikefuŋko ʒuhuckeniŋmu.
2Eme Israe kikefuŋzi ŋic gurune gurune rocjoparâ hae mâreŋ‐jeŋicko bacjopa raniŋmu; ehuc rauc‐jopapie Wofuŋte mâreŋko kiŋaŋ ŋic ŋokacfâc‐jeŋic erâ juniŋmu. Israe ŋic jaŋe iŋuc ehuc mârâc kâpâcwâru bacjopambiŋ qâpuc i jaŋe hâcne kâpâcwâruo râec‐jopaniŋmu â guguriŋfâc‐jeŋic jumbiŋ jaŋe ŋicbomboŋ ejareniŋmu.
3Eme Wofuŋ e ʒârâ hâriŋ â ʒâic serereŋ â kiŋaŋ qaqa gie ŋemâcne faigao fowec i gowac rome maŋge âke urueocmu dameŋ ira
4Babe ŋicwofuŋ âke sisic gae kecʒiŋuc muhuc hecnezemec: “Opoŋ, fenârewec e hombaŋ ŋekac i, â nâŋerao bâbâʒâic fuawec i tarakac!
5Wofuŋ e ŋic hehesicne jaŋere ɋaruc bazuwec, ŋicbomboŋ jaŋere gunu hâcne.
6Ŋicbomboŋ e hâcne aaricko ŋic gurune gurune ʒuhuckeme ʒuhuc jopa rahuc juwec, â kimbeŋko ŋicne ŋicne qâhuc‐jopahuc aakic tâmiric jopa jâpec ejarewec.
7Ʒi ine mâreŋ sâko mâreŋ e niniŋ qiririŋ â nacgumo roroc fuarâ foha ŋiczi ʒeri fânâŋ sâko eŋgopieŋ.
8Eme wetejâc â Lebanoŋte jâmâzâc jaŋe wâc gore bubiaŋ manahuc ʒiŋuc muŋgopieŋ: ‘Go waha fohaŋte moczi moc qafarac‐nâpoocte mocwâc mi wefuekac.’
9Juwic hâmoc haeo biŋege fisime qiriŋ fuakac, mâreŋte guriŋ bapa juku hâmo‐fârembiŋ jaŋe hâcne qiriŋ qaŋgopieŋ, erâ wâc ŋic gurune gurune jaŋere ŋicwofuŋfâc jumbiŋ, jaŋe eri ŋeŋe‐jeŋickonec fahare‐fârezo eŋgopieŋ.
10Eme jaŋe micne mic sâc fuŋkerâ ʒiŋuc gazaniŋmu: ‘Nâŋe betaŋkembeŋ iŋuc jaha betaŋkemeŋ! Go nâŋere sâc jaha emeŋ i!’
11Sahac fefege i hârâcko tuŋkekicne, â kulelegere fânâŋ i iŋuc jaha; wiac âsu gârecnezi fofoge eha umbeŋzi bilaŋke egarekac.
12“Ojai, bâpiŋ sâko tatamacnehec furic qânikiŋte oŋararac biaŋ go weniŋuc ehuc sambâŋkonec tararâ mâreŋko wahameŋ! Ŋic gurune gurune qâhuc‐jopameŋzi weniŋuc erâ qanʒaŋgupie mâreŋko fokomec.
13Go maŋgao dâŋ ʒiŋuc manasu biric emeŋ: ‘No sambâŋko fepemu, ehuc Anuture bâpiŋ faicnao eri ŋeŋe‐nane bâfeŋnerâ hepe ŋeocmu; nemu jaŋere tutumaŋ tiki faic mâreŋ qaŋeŋnao ŋekac ira hâcne waha ŋepemu.
14No karorac jâuru‐fârerâ fezepac, ehuc Femicne sâko ere sâc bâfuazepac.’
15Ʒi ine hâmoc haeo tuŋgukicne, nombâŋ fâhâŋnao hâcne.
16Eme mârâc honecgumbiŋzi hone dendeŋguhuc ʒiŋuc manasuhuc muniŋmu: ‘Mume mâreŋ qiriŋ qawec erâ ŋicwofuŋ â gurufâc‐jeŋic jaŋe ɋarac ɋarac qambiŋ ŋic keci hâcne me?
17Eki hâcne mâreŋ sâko mâreŋ ima bawec â hae sâko ŋerawec i heroc qâropiewec, â kâpâcwâru ŋicfâc‐ticne hae mâreŋ‐jeŋicko risieniŋte moc mi mana‐jarewec.’
18Ŋic gurune gurune ŋicwofuŋfâc‐jeŋic sasawa jaŋe ʒâŋe biŋe‐jeŋic mi omaeha ʒâŋeruŋ‐jeŋic sâc foraŋgopieŋ.
19Go ine ʒâŋeruŋgao mâcne, jâcgitecne batara behec ekicne irec sâc jaha taicko behecgukicne; ehame qâhâmoc‐jopakicne â sâqezi âkec‐jopakicne jaŋe qofacguŋgopieŋ, wiac âsu gârecne âte gâreckekicne qânâ nombâŋko behepie huekac irec sâc.
20Go hae mâreŋge sipirickemeŋte â gurufâcge qâhâmoc‐jopameŋte ŋicwofuŋ âgofâcge jaŋehec ʒâŋeruŋko mâmâc fofo i mi ecmu. “Sâqocne bapa ɋâricfâc‐jeŋic jaŋere ʒâŋe mocwâc mi mujâmbâŋkezo.
21Mamac‐jeŋic ere hehesicte erâ ŋokâfâcne qâhâmoc‐jopazore wiac emoc bâmoc eniŋ, jaŋe mocwâc faharerâ mâreŋ rauckenʒipiŋte â fic hae epie mâreŋ sâko mâreŋ sâcke‐fârezacte.”
22“No faharerâ râsi ejarezepac,” Anutu Tâpiri Ɋuŋɋasaŋ Wofuŋ ere dâŋ iŋuc. “No Babe haere ʒâŋe â ŋic ʒanʒaŋne mecne erâ naru motec apa ŋosa mecne jaŋe bâsirowec‐jopazepac,” Wofuŋte dâŋ iŋuc.
23“Noni hae i hetikiepe homa jaŋere fic hae ezejec, ehame sohoŋ fuarâ fozejec, erâ no sisipiricte oofaŋzi ofaŋne behec ecnepe omaezejec,” Anutu Tâpiri Ɋuŋɋasaŋ Wofuŋ ere dâŋ iŋuc.
24Anutu Tâpiri Ɋuŋɋasaŋ Wofuŋ e ʒiŋuc mujomirehuc mupaŋkewec: “Jâmbomac, no dâŋ mana biric epo i deŋkezejec, erâ mupaŋkepo sâc i fârine fua‐fârezejec!
25No Asiria ŋic mâreŋ‐naneo jukac e henʒaŋnezepac â tiki‐naneo âtenʒaŋnezepac; eme ŋic qâhuc‐jopahuc tagi fai‐jeŋicko râewec i bârâriezo â ɋawe‐jeŋicko reŋ râewec i wâc qatarazo.”
26Mâreŋ sâko mâreŋ irec mumupaŋ mukicne ine hâcne â Wofuŋzi ŋic gurune gurune jaŋerao tâpiri‐ticne bataniŋkeekac ine hâcne.
27Oc, Anutu Tâpiri Ɋuŋɋasaŋ Wofuŋ e dâŋ iŋuc mupaŋkewecte mozi moc qame wahaocmu? Erâ meticne bâfeŋnekicne i mozi mume wahaocmu?
28Ŋicwofuŋ Ahaʒi hâmowec jara dameŋ ira bararuŋ dâŋ kecʒiŋuc fuawec:
29“Filisa mâreŋ sâko, go ɋaruczi qa bâʒâic egarewec ɋaruc i herickewecte ʒeri mi ezemec, ʒiŋucte: Homare bumaŋkonec qotâ moc fuaocmu â ere ɋâriczi sopâc homa sopinehec fuaocmu.
30Dameŋ ira qarâ suriŋne jaŋe tiki‐naneo nânâ nâhuc juniŋmu, â hapetac jaŋe wama faio juhâmoniŋmu; ɋâricfâcge jaŋe ine mupe nânâre hâmo sipiric eniŋmu â ʒanʒaŋnefâcge jaŋe qâhâmoc‐jopapemu.
31Motâc sâko, go kio wâuŋa ec; hae sâko go owa ruruckec, Filisa mâreŋ sâko, go ɋarac ɋarac qac! Faic mâreŋkonec hosâc ware fisikac hâcne, â momori jaŋeraonec moczi betaŋkerâ gurufâc‐ticne moc mi behec‐jopaocmu.”
32Qâpuc jaŋeraonec kiŋaŋ ware fisimbiŋ jaŋe dâŋ weniŋuc bâtikie‐jarezo? “Wofuŋ e Zioŋ haere wâtuŋ râeme huwec, eme maŋnao gurufâc‐ticne tac qararacne jaŋe soŋkerâ juniŋmu.”
