Awulɑɑ II 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

¹Ɩlɛnɑ Pɑpiloni wulɑʋ Nepukɑnɛsɑɑ nɑ ɩ yoolɑɑ, pɑ́ polo Yosɑlɛm nɑ pɑ́ tɑ-tɛɣɛ kotɑɣɑ. Pɑ lomɑ hɑpǝlɛ tɑkɑ kɛ́ nɑ pɑ́ cɔɔ-tɛɣɛ Setesiyɑsɩ kɑwulɑɣɑ pǝnɑɣɑ pɔɣɔlɑɣɑfɛɩ nɑɑnʋwɑ nyǝŋkɑ, ɩsɔtʋ nɑɑnʋwɑ nyǝŋ kʋyɑkʋ nɑɑnʋwɑ nyǝŋkʋ wule.

²Nɑ pǝ́ polo ɩ kɑwulɑɣɑ pɩɩsɩ nɑɑnʋwɑ nɑ kʋlʋm nyǝŋkɑ.

³Ḿpʋ́ɣʋ́ nyɔɣɔsɩ ɑnɑɑm lɩɩwɑ Yosɑlɛm ɩcɑtɛ tɑɑ. Yǝlɑɑ ɩɩ nɑɑkɩ tɔɣɔnɑɣɑ. Ɩlɛnɑ Pɑpiloni nyǝ́mɑ tʋlɩ ɩcɑtɛ koluŋɑ kɛ pʋ́ʋ́ɣʋ́, kɛ ɩsɔtʋ liɣiti nyǝŋ kʋyɑkʋ pɔɣɔlɑɣɑfɛɩ nɑɑnʋwɑ nyǝŋkʋ wule. Pɑɑ nɑ Pɑpiloni nyǝ́mɑ kɑ tɑmɑ Yosɑlɛm tɔ, Setesiyɑsɩ nɑ ɩ yoolɑɑ pɑ pǝsɑɑ nɑ pɑ́ tǝŋnɑ wulɑʋ hɑlǝm nɔnɔɣɔ kɛ koloosi nɑɑlɛ hɛkʋ. Nɑ pɑ́ kpɑɣɑ Yɑɑtɑnɩ tɛtɛkǝlɛ mpɑɑʋ, nɑ pɑ́ se ɑhoo.

⁵Amɑ Pɑpiloni nyǝ́mɑ tʋ Setesiyɑsɩ wɑɑlɩ nɑ pɑ́ kpɑ-ɩ Yeliko tɛtɛkǝlɛ tɑɑ. Ɩlɛnɑ ɩ yoolɑɑ yele-ɩ ɩ tike.

⁶Ḿpʋ́ɣʋ́ pɑ kpɑ-ɩ yomle nɑ pɑ́ ponɑ-ɩ Pɑpiloni wulɑʋ kiŋ kɛ Lipǝlɑ. Tǝnɑɣɑ pɑ hʋʋnɑ-ɩ tɔm.

⁷Nɑ pɑ́ kʋ́ ɩ piyɑ kɛ ɩ ɩsɛntɑɑ. Pǝlɛ pǝ wɑɑlɩ, ɩlɛnɑ pɑ́ wɔɣɔsɩ ɩ ɩsɛ, nɑ pɑ́ hɔkɔ-ɩ nɑ pɑ́ ponɑ-ɩ Pɑpiloni.

⁸Ḿpʋ́ɣʋ́ Pɑpiloni wulɑʋ tɑŋlɑɑ nyʋɣʋ tʋ, wei ɩ kɛ́ wulɑʋ wɑɑlɩ nyǝŋ nɑ pɑ́ yɑɑkɩ-ɩ sɩ Nepusɑlɑtɑŋ tɔ, ɩ sʋʋ Yosɑlɛm tɑɑ kɛ́ Nepukɑnɛsɑɑ kɑwulɑɣɑ pǝnɑɣɑ pɔɣɔlɑɣɑfɛɩ nɑɑnʋwɑ nyǝŋkɑ, ɩsɔtʋ kɑkpɑsɩ nyǝŋ, kʋyɑkʋ nɑɑtosompɔɣɔlɑɣɑ nyǝŋkʋ wule.

⁹Ɩlɛnɑ ɩ́ nyɑɣɑsɩ Ɩsɔ tǝsɛɛlɛ nɑ kɑwulɑɣɑ tǝyɑɣɑ. Nɑ pǝ́ tɩɩ kǝlǝnɑ nyʋɣʋ nyǝ́mɑ nyǝŋsɩ.

¹⁰Nɑ ɩ yoolɑɑ yɔkɩ Yosɑlɛm ɩcɑtɛ.

¹¹Pǝ wɑɑlɩ kɛ́ Nepukɑnɛsɑɑ tɛɛsɑ kuuu kɛ ɩcɑtɛ tɑɑ yǝlɑɑ, mpɑ pɑɑ hɑwɑ Pɑpiloni nyǝ́mɑ kɛ pɑ tɩ tɔ, nɑ cɑŋǝm tǝmɑ lɑtɑɑ mpɑ pɩɩ kɑɑsɑɑ tɔ.

¹²Ɩlɛnɑ Nepukɑnɛsɑɑ yele kʋnyɔntʋnɑɑ sɩ pɛlɛ pɑ́ hɑlǝɣɩ tɔɣɔnɑɣɑ nɑ lɛsɛŋnɑɑ.

¹³Ḿpʋ́ɣʋ́ Pɑpiloni nyǝ́mɑ yɔkɑ ɑkelenɑɑ mpɑ pɑɑ wɛ Ɩsɔ tǝsɛɛlɛ nɔnɔɣɔ tɔ, nɑ pɑ́ kɔɔlɩ nyǝɣǝlʋɣʋ kʋsɛɛmʋɣʋ. Nɑ pɑ́ kpɑɣɑ pǝ lʋm kɛɛkɛnɑɑ, nɑ pǝ nyɑmpɑɑni ɑnɑɑm wei pɑ sɩɩ Ɩsɔ tǝsɛɛlɛ tɑɣɑ tɔɔ tɔ, nɑ pɑ́ tɛɛnɑ Pɑpiloni.

¹⁴Nɑ pɑ́ kpɛŋnɑ tɔtɔɣɔ nyǝɣǝlʋɣʋ kʋsɛɛmʋɣʋ wontu nti pɑ lɑkǝnɑ Ɩsɔ tǝsɛɛlɛ tɑɑ tɔ. Ɩsɩɩ nti pɑ kuukinɑ tɔlʋmɑ tɔ, nɑ pǝ lɔɣɔlɑsɩ nɑ kpǝtǝlǝŋ nɑ kɔpʋnɑɑ.

¹⁵Ḿpʋ́ɣʋ́ wulɑʋ tɑŋlɑɑ nyʋɣʋ tʋ kpɑɣɑ wʋlɑ nɑ liɣitee nyǝɣǝlʋɣʋ wontu. Nɑ cofolonɑɑ nɑ cɛmsɛnɑɑ mpɑ pɑ ŋmɩɩsǝɣǝnɑ cɑlǝm tɔ.

¹⁶Nyǝɣǝlʋɣʋ kʋsɛɛmʋɣʋ ŋku Sɑlʋmɔŋ kɑ lɑpǝnɑ Ɩsɔ tǝsɛɛlɛ wontu, nɑ tǝ mɑɣɑmɑɣɑ tǝ nyǝntʋ tɔ. Ɩsɩɩ lʋm nyɑmpɑɑni ɑnɑɑm, nɑ lʋm kɛɛkɛnɑɑ tɔ, kʋ tɔɔwɑ sɔsɔm kɛ́.

¹⁷Akelenɑɑ mpɛ pɑ kʋŋkʋlʋmǝŋ kɑ wɛ mɛɛtǝlǝnɑɑ pɔɣɔlɑɣɑfɛɩ nɑɑnʋwɑ nɑɑnʋwɑ kɛ́. Pɑɑ wei ɩ nyʋɣʋ tɑɑ kɛ́ nyǝɣǝlʋɣʋ kʋsɛɛmʋɣʋ cɑŋǝm kɑhukɑ kɛ mɛɛtǝlɩ kʋlʋm nɑ titite. Nɑ pǝ puluɣu nɑ kʋ tɔɔ kɛ́ tʋɣʋ nɑkʋlɩ kʋ pee tɑkɑ.

¹⁸Ḿpʋ́ɣʋ́ Pɑpiloni tɑŋlɑɑ nyʋɣʋ tʋ kpɑ kɔtʋlʋ Selɑyɑ, nɑ ɩ wɑɑlɩ tʋ Sefɑniyɑ, nɑ kɔtǝlɑɑ mpɑ pɑ tɑŋǝɣɩ Ɩsɔ tǝsɛɛlɛ nɔnɔɣɔ tɔ.

¹⁹Nɑ ɩ́ kpɑ tɔtɔɣɔ yoolɑɑ nyʋɣʋ tʋ, nɑ wulɑʋ tǝyɑɣɑ nyǝ́mɑ nɑpǝlǝɣɩ kɑkpɑsɩ. Nɑ tɑkǝlɑsɩ ŋmɑɑlʋ wei ɩ kpɑkǝɣɩ yoolɑɑ kʋfɑmɑ tɔ, nɑ Yutɑ ɩcɑtɛ nyǝ́mɑ kɛ nɩɩtoso. Pɑ tǝnɑɣɑ mpʋ Yosɑlɛm tɑɑ kɛ́ pɑɑ wɛɛ.

²⁰Ɩlɛnɑ Nɑpusɑlɑtɑŋ ponɑ-wɛɣɛ Pɑpiloni wulɑʋ kiŋ kɛ Lipǝlɑ.

²¹Nɑ Pɑpiloni wulɑʋ kʋ-wɛɣɛ kpɑkpɑɑ kɛ Hɑmɑtɩ tɛtʋ tɑɑ tǝnɑ. Ɩsǝnɑ pɑ ponɑ Yutɑ nyǝ́mɑ kɛ hɑtoo Pɑpiloni tɔɣɔlɛ.

²²Ḿpʋ́ɣʋ́ Pɑpiloni wulɑʋ Nepukɑnɛsɑɑ kɑɑsɑ Yutɑ yǝlɑɑ kɛ pǝcɔɣɔ tɛtʋ tɑɑ. Ɩlɛnɑ ɩ́ kpɑ Ahikɑm pǝyɑlʋ Ketɑliyɑ, Sɑfɑŋ sɑɑlɩ kɛ pɑ nyʋɣʋ tʋ.

²³Yutɑ yoolɑɑ nyʋɣʋ nyǝ́mɑ, nɑ pɑ yǝlɑɑ mpɑ pɑ tɑ hɑ pɑ tǝɣɩ Pɑpiloni nyǝ́mɑ tɔ, pɑ nɩɩ nti Nepukɑnɛsɑɑ tʋ ɩ tɑɑ kɛ mpʋ tɔ. Ɩlɛnɑ pɑ́ polo Ketɑliyɑ kiŋ kɛ Misipɑ. Nyʋɣʋ nyǝ́mɑ mpɛɣɛlɛ Netɑniyɑ pǝyɑlʋ Ɩsǝmɑyɛlɩ, nɑ Kɑleyɑ pǝyɑlʋ Yohɑnɑŋ nɑ Netofɑ tʋ Tɑnehumɛtɩ pǝyɑlʋ Selɑyɑ nɑ Mɑɑkɑ tʋ Yɑsɑniyɑ.

²⁴Ḿpʋ́ɣʋ́ Ketɑliyɑ tɔmɑ pɑ tǝnɑ nɑ tuunɑʋ sɩ: Ɩ́ tɑɑ nyɑnɑ Pɑpiloni nyǝ́mɑ. Ɩ́ cɑɣɑ tɛtʋ tɑɑ nɑ ɩ́ nɩɩkǝnɑ-wɛ te, ɩ́ kɑ́ wɑɑ.

²⁵Ɩsɔtʋnɑɑ nɑɑtosompɔɣɔlɑɣɑ sikɑɑ, ɩlɛnɑ ɑwulumpu Nɑtɑniyɑ pǝyɑlʋ Ɩsǝmɑyɛlɩ, Ilisɑmɑ sɑɑlɩ kɛlɛ. Ḿpʋ́ɣʋ́ Ɩsǝmɑyɛlɩ kpɑɣɑ yǝlɑɑ nɑɑnʋwɑ nɑ ɩ́ polo Misipɑ nɑ ɩ́ kʋ́ Ketɑliyɑ nɑ Yutɑ nyǝ́mɑ nɑ Pɑpiloni nyǝ́mɑ mpɑ pɑɑ wɛ ɩ kiŋ tɔ.

²⁶Mpʋɣʋlɛ sɔɣɔntʋ kpɑ ɩcɑtɛ nyǝ́mɑ nɑ Pɑpiloni tɔm, nɑ nyʋɣʋ nyǝ́mɑ tɔ́ sɩ pǝ́ tɑɑ kɔɔ nɑ pɑ́ lɛɛtɩ-wɛ. Ɩlɛnɑ pɑ́ se nɑ pɑ́ polo Icipiti.

²⁷Yutɑ wulɑʋ Sowɑkɛŋ sɑlǝkɑ pǝnɑɣɑ hiu nɑ nɑɑnʋwɑ nɑ nɑɑtosompɔɣɔlɑɣɑ nyǝŋkɑ sikɑɑ, ɩlɛnɑ Ɩfilɩ-Melotɑ pǝsɩ Pɑpiloni wulɑʋ. Ḿpʋ́ɣʋ́ ɩ tʋlɑ Sowɑkɛŋ kɛ pǝ ɩsɔtʋ nɑɑnʋwɑ nɑ nɑɑlɛ nyǝŋ kʋyɑkʋ hiu nɑ nɑɑtosompɔɣɔlɑɣɑ nyǝŋkʋ.

²⁸Ɩlɛnɑ ɩ́ lɑpɩ-ɩ kʋpɑntʋ. Ɩ́ kpɑ-ɩ ɑwulɑɑ lɛmpɑ mpɑ pɑ wɛ Pɑpiloni tɔ pɑ nyʋɣʋ tʋ.

²⁹Nɑ pɑ́ wɔɣɔsɩ ɩ sɑlǝkɑ wontu, nɑ ɩ nɑ Pɑpiloni wulɑʋ pɑ́ tɔkɩ tǝntǝmlɛ.

³⁰Nɑ Pɑpiloni wulɑʋ pɑɑsǝɣǝnɑ-ɩ pɑɑ kʋyɑkʋ ŋku, hɑlǝnɑ ɩ sǝm.