1Zedekia e ŋicwofuŋ juhame jara 9 irec mosa 10 â ʒoaŋ gie bapa 10 jaha ewec dameŋ ira Babe ŋicwofuŋ Nebukanezazi momorifâcne rocjopa‐fâreme Jerusalem hae râsi fisicnembiŋ. Fisirâ hae somâckehuc rârec rârec ʒae bambiŋ.
2Iŋuc erâ somâ bahuc juwefukuhapie Zedekia ŋicwofuŋ juju dameŋ‐ticnere jara 11 maickewec.
3Eme mosa jahec â jahec irec ʒoaŋ gie bapa 9 ira haeo roroc sâkozi ɋârâŋkeme hae mâreŋ irec ŋic jaŋe nânâ basambiŋ.
4Ehame râsi jaŋe haeo feniŋte tuŋzi sac âeckeku âkeʒupie hata fuawec. Eme ŋicwofuŋ e iŋuc epie honec‐joparâ momorifâc‐ticne jaŋehec ŋafeo sac jajahec ŋondeŋ‐jekicko ŋicwofuŋte ʒariŋ gieo motâc moc domawec i fotâcnerâ wisembiŋ. Kaldea ŋic jaŋe hae sâko orâŋkehuc juhapie jaŋe mâreŋ burocnaopec rambiŋ.
5Eme Kaldea momori jaŋe ŋicwofuŋ jâperâ raku Jeriko wâneŋko bâfuambiŋ. Ehame momorifâcne jaŋe beherâ siŋsaŋ qambiŋ.
6Siŋsaŋ qapie râsi jaŋe ŋicwofuŋ rorâ Ribela haeo Babe ŋicwofuŋtao barapie eki dâŋticne mutarawec.
7Ehame ʒâŋe fai‐ticnao ŋokâfâcne qâhâmoc‐jopambiŋ. Erâ Zedekia e jahacne ine ʒâŋe‐ticne riporâ kâpâcwâruzi niŋgiŋkerâ Babe mâreŋko barambiŋ.
8Nebukaneza e Babe ŋicwofuŋ juhame jara 18 irec faicnao mosa memoc â irec ʒoaŋ gie bapa 7 ewec dameŋ ira Nebuʒaradaŋ e Babe ŋicwofuŋ momori fuŋfuŋfâc‐ticne jaŋere micne juhuc ŋicwofuŋte kiŋaŋ qahuc juweczi Jerusalem haeo ware fisiwec.
9Fisirâ Wofuŋte ufuŋ â ŋicwofuŋte erific erâ Jerusalem haere fic kâcɋene i ʒeŋgoma ʒoczi turuŋkeme ʒafârewec.
10Â Jerusalem hae râreckehuc qânâsac fowec i Kaldea momori, ŋicwofuŋ momori fuŋfuŋfâcne jaŋere micne ehec jumbiŋ jaŋe heroc qâropiembiŋ.
11Eme Babe ŋicwofuŋte momori fuŋfuŋfâc jaŋere micne Nebuʒaradaŋzi ŋic ŋokac ʒanʒaŋne gâcne haeo behec‐jopapie jumbiŋ i jaŋe mecne â wiserâ Babe ŋicwofuŋtao ʒuhuckembiŋ jaŋe, erâ ŋic ŋokac guru sâko gâcne jaŋe mâmâc bacjopa rawec.
12Ehuc ŋicwofuŋte momori fuŋfuŋfâc jaŋere micne e mâreŋ irec ŋic wahakicne jaŋeraonec gâcne jaŋe waiŋ gie bahuc he sarac eniŋte behec‐jopame ŋembiŋ.
13Â Wofuŋte ufuŋko aeŋ bâbâroŋzi wâtuŋ bakicne domawec erâ râqâc irec ŋeŋe wiac â opâ râqâc sâko aeŋ bâbâroŋzia bakicne i Kaldea ŋic jaŋe henʒaŋ qanʒaŋnerâ aeŋ bâbâroŋ i furu jaha Babe haeo barambiŋ.
14Erâ kuʒi â sapac â sâqe â hosâc âsu ririkere râqâc, erâ aeŋ bâbâroŋzi râqâc bakicne taha ufuŋko gie bahuc bajumbiŋ i mâmâc sasawa bara‐fârembiŋ.
15Erâ ʒoc uucnere râqâc â oto piic i wâc mâmâc barambiŋ. Ine hâcne, wiac sasawa gol â siliwazi bakicne i ŋicwofuŋte momori fuŋfuŋfâc jaŋere micnezi bara‐fârewec.
16Wâtuŋ jajahec â opâ râqâc sâko â Wofuŋ ufuŋ‐ticnere râqâc irec ŋeŋe wiac Salomozi mume bambiŋ, wiac i sasawa irec aeŋ bâbâroŋ i sigelio rârâere sâc mi ewec.
17Eme wâtuŋ moc ʒoricne‐ticnere sâc i 18 kubi. Eme wâtuŋ irec fainao utune moc aeŋ bâbâroŋzi barâ hepie ŋewec. Wâtuŋ utunezi 3 kubi irec sâc ferâ domawec. Ehame utune rârec rârec ine eri qâreŋ mimize hawari iŋucne bapie fowec, â wiac moc jâchândâŋ tinac birickepie doma rawec; wiac i aeŋ bâbâroŋzi bafârekicne hâcne. Eme wâtuŋ moc sâc ijaha bakicne.
18Ŋicwofuŋte momori fuŋfuŋfâc jaŋere micne e taha bapa sâko Seraja â babafic‐ticne Zefania erâ motâc soŋaŋ jahec â moc jaŋe rocjopawec.
19Erâ Jerusalem haeonec micne sâko moc momori jaŋere soŋaŋ juwec e â juwicnao ŋicwofuŋhec jumbiŋ ŋic i jaŋeraonec 5 jaŋe haeoa juhapie mâmâc rocjopawec. Erâ ʒuhuckerâ momori micne ere qâreŋŋic, mâreŋ irec ŋic jaŋe ʒika gie baniŋte qâreŋ‐jopa jujec, e erâ ŋic 60 haeoa juhapie bâfuac‐jopambiŋ jaŋe iŋuc jaha rocjopawec.
20Momori fuŋfuŋfâcne jaŋere micne Nebuʒaradaŋ e ŋic i jaŋe hâcne rocjoparâ Ribela haeo Babe ŋicwofuŋ erao bacjopa rawec.
21Eme Babe ŋicwofuŋzi mume Hamati mâreŋko Ribela hae ŋewec ira hâcne qâhâmoc‐jopambiŋ. Ehuc Juda kikefuŋ gâcne jaŋe mâreŋ‐jeŋickonec kâpâcwâruo bacjopa rambiŋ.
22Babe ŋicwofuŋ Nebukanezazi ŋic ŋokac Juda mâreŋkoa juniŋte behec‐jopawec i jaŋe hone maiŋ ejareocte Ahikamte ŋokâ Gedalia, Safaŋte ŋosa hâcne, e mâreŋ soŋaŋ âkendâŋnewec.
23Eme momori micne jaŋe ŋicfâc‐jeŋic jaŋehec hae mâreŋ ira siŋsaŋ qarâ juhuc Babe ŋicwofuŋzi Gedalia mâreŋ soŋaŋ âkendâŋnewec irec biŋe manarâ ŋicfâc‐jeŋic jaŋehec Mizipa haeo Gedaliarao ra fisimbiŋ. Ŋic ʒiŋuczi fisimbiŋ: Netaniare ŋokâ Isimae â Kareare ŋokâ Johanaŋ, erâ Netofati ŋic moc ʒâŋene Tanahumeti ere ŋokâ Seraja e â Makati ŋic moc ere ŋokâ Jaʒania.
24Eme Gedaliazi jaŋe jaŋacne â ŋicfâc‐jeŋic mupaŋke‐jarehuc ʒiŋuc jazawec: “Ŋoŋe Kaldea ŋic micne jaŋere mi hâwic‐ŋopaoc. Ŋoŋe mâreŋ ʒira juhuc Babe ŋicwofuŋ kiŋaŋ qacnehuc sâcne juhâmoniŋmu.”
25Ehame mosa 7 ira Netaniare ŋokâ Isimae, Elisama ŋosa‐ticne hâcne, e ŋicwofuŋ garikiŋfâc‐ticne jaŋeraoneczi ŋic 10 jaŋehec râsi fisirâ Gedalia qahuc Judaŋic â Kaldea ŋic Mizipa haeo ehec jumbiŋ jaŋe wâc mâmâc jopambiŋ.
26Iŋuc epie ŋic ŋokac kâcɋene â piticne, erâ momori jaŋere micnefâc jaŋe faharerâ Aigita mâreŋko rambiŋ, jaŋe Kaldea ŋic jaŋere hâwic‐jopame iŋuc hâcne embiŋ.
27Eme Juda ŋicwofuŋ Jojakiŋ e kâpâcwâruo jukuhame jara 37 â mosa 12 â ʒoaŋ gie bapa 27 tarame ine Babe ŋicwofuŋ Ewi‐Merodaczi akickehuc mume kâpâcwâruonec wahawec. Ine ŋicwofuŋ gie‐ticne fuŋkewec jara ira iŋuc ewec.
28Erâ âgo ecnehuc ŋeŋe‐ticne bafeme ŋicwofuŋ gâcne ehec Babe haeo jumbiŋ jaŋere ŋeŋe biri irec micnao ŋewec.
29Eme Jojakiŋ e kâpâcwâru ŋaqi‐ticne hetararâ ŋicwofuŋhec nânâ nâhuc jukuhame hâmoc dameŋ‐ticne maickewec.
30Sahacte dope wiac irec ʒiŋuc ekicne: Babe ŋicwofuŋ e ʒoaŋ sâc dope wiac‐ticne râcnehuc juhame hâmoc dameŋ‐ticnao tarawec.
