1सिदकीयाहम सासन पशो ९ बर्स १० महिना ङा १० नाक्त बेबीलोन ङा पिप नेबुकदनेसर आ लडाइ पाइब नेल्ल चाक्शा यरूसलेम नु लडाइ पथ जाक्माक्त। मिनु यरूसलेम कली पुम्शा एर ओंथ गारो ङोइक्तीक सेल्मे बाक्त। येरमीया ३४:१
2पिप सिदकीयाहमी सासन पशो ११ बर्स दुम्मेनु, सहर पुम्दमे बाक्त।
3मिनु मेको ४ महिना ङा ९ नाक्त सहरम थम ठेयब अन्काल दुम्माक्त। मिनु मेको रागीम मुर आन कली जचा थोव़क मारेइ मबाक्माक्त।
4मेना पिप नु लडाइ पाइब नेल्ल गारो होइश्शा, नाक्दो प्रोक्मा बाक्त। मेको पिप आ रू रे गारो निक्शी आस दाते ङा लाप्चो रे कल्दीपुकी सहर आ एर ओंथ बाक्तेक्म हना यो, प्रोक्मा बाक्त। मोपा मेकोपुकी अराबाह गे प्रोक्मा बाक्त।
5तन्न कल्दी ङा लडाइ पाइबपुकीम पिप कली खेदा पामे बाक्त। मिनु मेको कली यरीको ङा दिंममी थित्मे बाक्त। आ लडाइ पाइब नेल्ल मेको कली प्रोंइशा एर ओंथ ब्रमा बाक्त।
6मिनु मेको कली ग्याइश्शा बेबीलोन ङा पिप आ ङोंइती रिब्ला सहरम चाक्गमे बाक्त। मिनु मेकोमी मेको आन कली निसाफ पवा बाक्त।
7मेकोपुकीम सिदकीयाह आ तौ आन कली मेको आ ङोंइतीन सदमे बाक्त। मिनु नोले सिदकीयाह आ मिक्च पुक्तमे बाक्त। मिनु मेको कली कांसा के साङलोम पाइश्शा बेबीलोन लदमे बाक्त। २सामुएल १२:१०
8बेबीलोन ङा पिप नेबुकदनेसरमी सासन पशो १९ बर्स ५ महिना ङा ७ नाक्त, नेबुकदनेसर कली खाल पाइब आन ठेयब मुर नेबुजरादान यरूसलेम जाक्माक्त।
9मिनु मेकोमी परमप्रभु यावे आ खिं, पिप आ दरवार, यरूसलेम सहर ङा खिं नेल्ल नु ठेयब खिं नेल्ल मी सुइक्ता बाक्त।
10मेको पिप कली खाल पाइब आन ठेयब मुर आ हुकुमम बाक्शो कल्दी लडाइ पाइबपुकीम यरूसलेम आ एर ओंथ ङा गारो नेल्ल प्रेत्मे बाक्त।
11मेको पिप कली खाल पाइब आन ठेयब मुर नेबुजरादानमी सहरम प्रोंइचा पुंइसीशो मुर नु अरु बेबीलोन ङा पिप कली जिम्मा गेंसीशो मुर आन कली ग्याइश्शा बेबीलोन लाइक्मी बाक्त।
12तन्न मेको पिप कली खाल पाइब आन ठेयब मुरुम अङगुर रू रोक्चा नु रू दोचा कली थम प्रुङग आन कली चहिं प्रोंइशा वोइक्मी बाक्त।
13मिनु कल्दीपुकीमी परमप्रभु यावे आ खिंम बाक्शो कांसा के थामपुकी, निप्पाइक्तीकपुकी नु कांसा के ठेयब बोस प्रोल्शा आइक्च सेल्शा बेबीलोन लदमे बाक्त। येरमीया २७:१९-२२
14मेकोपुकीम ग्योंबपुकी, बेल्चापुकी, सल्दो थेप्तीके थनारोपुकी, कचौरापुकी, थनौरोपुकी नु चढ़ेतीकेम चलेतीक कांसा के मारेइ मारेइ ग्योंब नेल्ल लदमे बाक्त।
15मेकोपुकीमी मी कुरतीके नु बोस नेल्ले लदमे बाक्त। मिनु पिप कली खाल पाइब आन ठेयब मुरुमी सुन नु चांदीम सेल्शो मारेइ मारेइ लदा बाक्त।
16सोलोमनमी परमप्रभु यावे आ खिं कली सेल्शो थाम निक्शी, ठेयब बोस नु निप्पाइक्तीक सेल्शो कांसा नाक्ने मचाप्चा ङा बाक्मा बाक्त। १राजा ७:१५; १राजा ७:२३; १राजा ७:२७
17मेको थाम का १८ कुबीत लाइश्शो बाक्माक्त। मिनु मेको थाम का आ पिया कुबीत सां लाइश्शो बाक्माक्त। मिनु मेको कांसा के जालीम आ एर ओंथ क्युक्शा हिरशो दारीम बाक्माक्त। अर्को थाम यो जालीम हिरशा मेको खोदेंशो पा सेल्शो बाक्माक्त। कुबीत का आधा मिटर खोदेंशो बाक्ब।
18मिनु पिप कली खाल पाइब आन ठेयब मुरुम ठेयब चढ़ेब सेरायाह नु मेको आ दी ङा सेफन्याह नु लाप्चो कोव़ब सां आन कली यो ग्याइश्शा लाइक्मी बाक्त।
19मेकोमी सहरम मुल यो लीशो आन दाते ङा लडाइ पाइब आन ठेयब मुर नु ५ जना पिप कली सल्ला गेब आन कली यो लाइक्मी बाक्त। मेकोम रागी ङा मुर आन कली लडाइ पाइब मुर सेल्चा कली योव़ब ब्रेक्ब ठेयब मुर नु सहरम थिश्शो ६० जना मुर आन कली यो लाइक्मी बाक्त।
20मेको पिप कली खाल पाइब आन ठेयब मुर नेबुजरादानमी मेको आन कली बेबीलोन ङा पिप आ बाक्तीक रिब्ला सहरम चाक्मी बाक्त।
21मिनु बेबीलोन ङा पिपम मेको आन कली हमाथ आ रागीम रिब्लाम साइक्पाइक्मी बाक्त। मोपा यहूदा ङा मुर आन रागी रे ग्याइश्शा लाइक्चा पुंइसमा बाक्त। २राजा २३:३३
22बेबीलोन ङा पिप नेबुकदनेसरमी शाफान आ चच अहीकाम आ तौ गेदाल्याह कली यहूदाम प्रोंइशा वोइश्शो इच्का खोइ मुर आन कली सासन पाइब सेल्शा वोदा बाक्त।
23मिनु लडाइ पाइब आन ठेयब मुर नेल्ल नु मेको आन मुरपुकीम बेबीलोन ङा पिपम गेदाल्याह कली सासन पाइब सेल्शो लोव़ नेन्मे बाक्त। मिनु मेको नेल्ल गेदाल्याह आ बाक्तीके मिस्पा सहरम जाक्मा बाक्त। मेको नेथन्याह आ तौ इश्माएल, कारेआह आ तौ योहानान, नेतोफाह सहर ङा तन्हुमेथ आ तौ सेरायाह, माकाथी आ तौ याजन्याह नु मेको आन मुरपुकी जाक्मा बाक्त।
24मिनु गेदाल्याहमी मेकोपुकी नु आन मुर आन कली कसम जशा रिम्शो लोव़ पाइक्मी बाक्त। मिनु मेकोम “कल्दी ङा ठेयब मुर आन कली तशा महिनीन। रागीम बाक्कीन। मिनु बेबीलोन ङा पिप आ गेय पने। मिनु इन कली रिम्शो दुम्ब” दे माइक्मी बाक्त।
25तन्न ७ महिनाम पिप आ खिं ङा मुर एली-शामा आ चच, नेथन्याह आ तौ इश्माएलम १० जना मुर आन कली चाक्शा जाक्माक्त। मिनु मेकोमी गेदाल्याह नु मेको नु मिस्पा सहरम बाक्ब यहूदा नु कल्दी ङा मुर आन कली तुप्शा साइक्मी बाक्त।
26मोपतीके कल्दी आन क्येङा हिंशा आइक्च रे ठेयब मुर नु लडाइ पाइब आन ठेयब मुर नेल्ल प्रोक्शा इजीप्त रागी जाक्दीम्मा बाक्त। ब्यवस्था २८:६८
27यहूदा ङा पिप येहो-याकीन ग्याइश्शा लाइश्शो ३७ बर्स, १२ महिना ङा २७ नाक्त दुम्मेनु, प्रोंइचा पुंइसे बाक्त। मिनु एवील-मेरोदक बेबीलोन ङा पिप दुम्शा सासन पशो आ ङोंइती ङा बर्सम मेको कली प्रोना बाक्त। २राजा २४:१५
28मेकोमी येहो-याकीन कली रिम्शो लोव़ पवा बाक्त। मिनु मेको कली बेबीलोनम बाक्शो पिप आन दातेमी नेल्ल क्येङा ठेयब सेला बाक्त।
29मोपा येहो-याकीनमी आ चोक्सीशो वा प्रुदा बाक्त। मिनु आ लीशो नाक्त नेल्ल पिप नु बाक्शा जवा बाक्त।
30बेबीलोन ङा पिपमी मेको कली ब्रोंइम सम्म नाक्त किंत किंत आ माल्शो मारेइ मारेइ गेवा बाक्त।
