Awulɑɑ II 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

¹Ḿpʋ́ɣʋ́ kʋtɔŋ sɔsɔɔʋ nɑkʋlɩ kʋ kpɑ Ɩsekiyɑsɩ kɛ wɑɑtʋ nɔɣɔlʋ. Ɩlɛnɑ Ɩsɔ kʋyɔɣɔtʋtʋ tɛlǝsʋlʋ Ɩsɑyii polo ɩ wiiluɣu nɑ ɩ́ heeli-ɩ sɩ: Tɑcɑɑ yɔɣɔtɑɑ sɩ, n kɑɑ kʋlɩ. Ɩlɛ tɑɣɑnɩ nyɑ́ tɩ.

²Ntɛnɑ Ɩsekiyɑsɩ kɛɛsɩ ɩsɛ nɑ koloŋɑ tɔɔ nɑ ɩ́ sǝlǝmɩ Ɩsɔ sɩ:

³Hɑɩ, Tɑcɑɑ, tɔɔsɩ sɩ mɑ tɔmɑ nyɑ́ ɩsɛntɑɑ kɛ́ nɑ lotu kʋlʋmtʋ. Nɑ mɑ́ lɑkɩ tɑm kɛ́ mpi pǝ wɛ-ŋ teu tɔ. Ɩlɛnɑ Ɩsekiyɑsɩ tʋlɩ nɔɣɔ nɑ ɩ́ wii tǝkpoo.

⁴Ɩsɑyii kʋlɑ wulɑʋ kiŋ ɩsɩɩ ɩ kɑ́ lɩɩ tɑɣɑ tɔɔ, ɩlɛnɑ Tɑcɑɑ tɔmɩ-ɩ sɩ:

⁵Mǝlɩ mɑ yǝlɑɑ wulɑʋ Ɩsekiyɑsɩ kiŋ nɑ ń heeli-ɩ sɩ: Nyɑ́ cɔsɔ Tɑfiiti Ɩsɔ Tɑcɑɑ mɑ́ mɑ nɩɩwɑ nyɑ́ kʋsǝlǝmʋtʋ, nɑ mɑ́ nɑ́ nyɑ́ ɩsǝlʋm. Pǝ tɔɔ tɔ, celeŋkufe mɑɑ wɑɑ-ŋ, nɑ hɑlɩ ń tɑsɑ Ɩsɔ tǝsɛɛlɛ tɑɑ kɛ́ pote.

⁶Mɑɑ sɔɔsɩ-ŋ pɩɩsɩ nɑɑnʋwɑ nɑ kɑkpɑsɩ, nɑ mɑ́ fiti nyɑ́ nɑ Yosɑlɛm nyǝ́mɑ kɛ Asilii nyǝ́mɑ niŋ tɑɑ. Nɑ mɑ́ kenti ɩcɑtɛ tǝnɛɣɛ mɑ tǝmlɛ tʋ Tɑfiiti tɔɔ, nɑ pǝ́ kʋsɩ mɑ nyʋɣʋ.

⁷Ḿpʋ́ɣʋ́ Ɩsɑyii nɑŋɑ fiki pee, nɑ ɩ́ tɑɑ wulɑʋ timpi wɩɩkɩ-ɩ tɔ nɑ pǝ́ wɑɑ-ɩ.

⁸Ntɛnɑ wulɑʋ pɔɔsɩ Ɩsɔ kʋyɔɣɔtʋtʋ tɛlǝsʋlʋ sɩ: Pepeɣe Tɑcɑɑ kɑ́ hʋlɩ-m, nɑ mɑ́ nyǝnɑ sɩ celeŋkufe pɩɩ wɑɑ-m, nɑ mɑ́ polo Ɩsɔ tǝsɛɛlɛ tɑɑ?

⁹Ɩsɑyii sɩ: Tɑcɑɑ kɑ́ lɑ pʋlʋ, nɑ ɩ́ hʋlǝnɑ-ŋ sɩ, ɩ kɑ́ lɑ nti ɩ sɩɩwɑ tɔ. Ɩlɛ n cɑɑ sɩ ɩsotom wɑɑci ɩ́ polo tǝkpɑlɛ ɩsɛntɑɑ, yɑɑ pǝ́ mǝlɩ wɑɑlɩ?

¹⁰Ḿpʋ́ɣʋ́ Ɩsekiyɑsɩ sɩ: Ɩsotom pote kɛ ɩsɛntɑɑ fɛɩ kɑtɛ. Mɑ cɑɑ kɛ́ sɩ pǝ́ mǝlɩ wɑɑlɩ.

¹¹Ntɛnɑ Ɩsɑyii sǝlǝmɩ Tɑcɑɑ nɑ ɩ́ mǝlǝnɑ ɩsotom nɑ wɑɑlɩ wɑɑlɩ kɛ tǝkpɑlɛ kumlee nɑɑnʋwɑ.

¹²Ḿpʋ́ɣʋ́ Pɑpiloni wulɑʋ Melotɑkɩ-Pɑlɑtɑŋ nɩɩwɑ Ɩsekiyɑsɩ wʋsɑsɩ. Ɩlɛnɑ ɩ́ tilinɑ ɩ wɑɑlɩ nyǝ́mɑ kɛ kʋcɔɔʋ nɑ lɛɛtǝlɩ sɩ pɑ́ ponɑ-ɩ.

¹³Nɑ Ɩsekiyɑsɩ mʋ-wɛ nɑ ɩ́ cɔɔnɑ-wɛɣɛ kutuluŋ wei ɩ tɑɑ pɑ sɩɩkɩ wontunɑɑ kʋpɑntʋ tɔ. Ɩsɩɩ liɣitee nyǝɣǝtʋ, nɑ wʋlɑ, nɑ tulɑɑlʋnɑɑ, nɑ sɔɔsʋŋ nimnɑɑ tɔ. Nɑ ɩ́ hʋ́lɩ́-wɛɣɛ ɩ yoou wontu tǝsɩɩlɛ, nɑ pǝ tǝnɑ mpi pǝ wɛ tǝnɑ tɔ. Ɩ tɑ ŋmɛsɩ-wɛɣɛ pʋlʋ. Pɑɑ ɩ kɑwulɑɣɑ tǝnɑ, yɑɑ ɩ tǝyɑɣɑ tɑɑ.

¹⁴Pǝ wɑɑlɩ kɛ́ Ɩsɔ kʋyɔɣɔtʋtʋ tɛlǝsʋlʋ Ɩsɑyii polɑɑ nɑ ɩ́ pɔɔsɩ Ɩsekiyɑsɩ sɩ: Leɣe yǝlɑɑ mpɛ pɑ lɩɩnɑɑ? Nɑ weɣe pɑ cɑɑkɩ? Ɩsekiyɑsɩ sɩ: Pɑ lɩɩnɑ hɑtoo Pɑpiloni kɛ́.

¹⁵Ɩsɑyii sɩ: Pepeɣe pɑ nɑwɑ nyɑ́ kɑwulɑɣɑ tǝyɑɣɑ tɑɑ? Ɩsekiyɑsɩ sɩ: Mɑ hʋlɑ-wɛɣɛ pǝ tǝnɑɣɑ. Mɑ tɑ ŋmɛsɩ-wɛɣɛ mɑ kpɑncoou.

¹⁶Ntɛnɑ Ɩsɑyii sɩ: Tɑcɑɑ yɔɣɔtɑɑ sɩ:

¹⁷Pǝ tǝnɑ mpi ɑwulɑɑ mpɑ pɑ lɑɑlɑ-ŋ tɔ, pɑ kɑɑsɑɑ nɑ ń mɑɣɑnɑ tɔ, kʋyɑkʋ nɑkʋlɩ Pɑpiloni nyǝ́mɑ kɑ́ kɔɔ nɑ pɑ́ kuu-wɩ. Pǝ kɑɑ kɑɑsɩ-ŋ pʋlʋ.

¹⁸Hɑlɩ pɑɑ kpɑ nyɑ́ lʋlʋɣʋ nyǝ́mɑ nɑpǝlɩ, nɑ pɑ́ lɑ-wɛɣɛ yǝlɑɑ kɑtɑɑsɩ, nɑ pɑ́ tʋ-wɛɣɛ Pɑpiloni wulɑʋ kɑwulɑɣɑ tǝyɑɣɑ tǝmlɛ tɑɑ.

¹⁹Ḿpʋ́ɣʋ́ Ɩsekiyɑsɩ cɔwɑ sɩ: Mɑ sɑmɑ. Ɩlɛnɑ Ɩsekiyɑsɩ tɑsɑ sɩ: Ɩsɔ ɩ́ tɩɩ nyǝntɩ nɑ ɩ́ kenti tɑ́ tɔɔ, nɑ tǝ́ cɑɣɑnɑ hɛɛsʋɣʋ, hɑlǝnɑ mɑ sǝm te.

²⁰Pɑ kɛɛsɑ Ɩsekiyɑsɩ tɔm lɛntɩ kɛ Yutɑ ɑwulɑɑ tɑkǝlɑɣɑ tɑɑ. Pɑɑ ɩ ɑpɑlʋtʋ tɔm, nɑ ɩsǝnɑ ɩ lɑpɑ lɩɩlɛ, nɑ ɩ́ huli lɔɔʋ nɑ ɩ́ kɔnɑ Yosɑlɛm ɩcɑtɛ tɑɑ kɛ́ lʋm tɔ.

²¹Wɑɑtʋ wei ɩ sǝpɑ, ɩlɛnɑ ɩ pǝyɑlʋ Mɑnɑsee lɛɛtɩ ɩ lonte tɑɑ.