Text copied!
CopyCompare
PIIPILI ƖSƆ TƆM TAKƎLAƔA - Awulɑɑ II

Awulɑɑ II 8

Help us?
Click on verse(s) to share them!
1Ḿpʋ́ɣʋ́ kʋyɑkʋ nɑkʋlɩ, Ilisee tɔmɑ Sunem ɑlʋ wei ɩ pǝyɑɣɑ ɩ kɑ feesɑɑ tɔ sɩ: Nyɑnɑ nyɑ́ tǝyɑɣɑ nyǝ́mɑ, ɩ́ lɩɩ cǝnɛ. Ɩ́ polo timpi ɩ́ cɑɑkɩ tɔ nɑ ɩ́ cɑɣɑ. Mpi tɔ, Tɑcɑɑ cɑɑ ɩ kɔnɑ nyɔɣɔsɩ kɛ Ɩsɛɣɛlɩ tɛtʋ tɑɑ kɛ́ pɩɩsɩ nɑɑtosompɔɣɔlɑɣɑ.
2Ɩlɛnɑ ɑlʋ ɩnɩ nɑ ɩ nyǝ́mɑ pɑ́ polo pɑ́ cɑɣɑ Filiisi nyǝ́mɑ tɛtʋ tɑɑ. Pɩɩsɩ nɑɑtosompɔɣɔlɑɣɑ kɛ pɑ cɑɣɑɑ ɩsɩɩ Ɩsɔ kʋyɔɣɔtʋtʋ tɛlǝsʋlʋ kɑ heeluɣu-ɩ tɔ.
3Pɩɩsɩ nsɩ sɩ sikɑɑ, ɩlɛnɑ pɑ́ mǝlɩ pɑ tɛtʋ tɑɑ. Ɩlɛnɑ pɑ́ pɔɔsɩ wulɑʋ kɛ pɑ tǝyɑɣɑ nɑ pɑ tɑwɑ tɔm.
4Wɑɑtʋ ɩnɩ ɩ tɑɑ kɛ́ wulɑʋ yɔɣɔtɑɣɑnɑ Ilisee tǝmlɛ tʋ Kehɑsi. Nɑ ɩ́ pɔɔsɩ-ɩ sɩ: Kɛɛsɩ piti tǝmɑ nnɑ Ilisee kɑ lɑpɑ tɔ.
5Ɩlɛnɑ ɩ́ kɛɛsǝɣɩ-ɩ pǝyɑɣɑ ŋkɑ Ilisee kɑ feesɑɑ tɔ kɑ tɔm. Ɩlɛ ɑlʋ nɑ ɩ pǝyɑɣɑ ŋkɛ pɑ tɑlɑ wulɑʋ tɛɣɛlɛ, nɑ pɑ́ pɔɔsǝɣɩ-ɩ pɑ tǝyɑɣɑ nɑ pɑ tɑwɑ tɔm. Ntɛnɑ Kehɑsi sɩ: Aŋhɑɑ, tɑ cɑɑ, ɑlʋ ɩnɛ ɩ pǝyɑɣɑ kɑnɛɣɛ Ilisee kɑ feesɑɑ.
6Ḿpʋ́ɣʋ́ wulɑʋ pɔɔsɑ ɑlʋ nɑ ɑlʋ kɛɛsɩ-ɩ pǝ tǝnɑ. Ɩlɛnɑ ɩ́ heeli ɩ yǝlɑɑ tɑɑ wei ɩ wɛnɑ nɑɑni kɛ teu tɔ sɩ: Pɑɑsǝnɑ ɑlʋ ɩnɩ ɩ tɔm ntɩ. Pɑ́ mǝŋnɑ-ɩ ɩ nyǝm tǝnɑ. Pɑ́ cɛlɛ-ɩ ɩ tɑwɑ kʋlʋlʋm kɑsǝyɑɣɑ kɛ pǝ kpɑɣɑʋ too ɩ fɛɩ tɔ.
7Ḿpʋ́ɣʋ́ wɑɑtʋ nɔɣɔlʋ, Ilisee polɑ Tɑmɑsɩ. Ɩlɛnɑ pǝ́ pɑnɑ pǝ́ wɩɩkɑɣɑ Silii wulɑʋ Pɛnɩ-Hɑtɑtɩ. Ɩlɛnɑ ɩ́ nɩɩ sɩ Ɩsɔ kʋyɔɣɔtʋtʋ tɛlǝsʋlʋ kɔmɑ ɩcɑtɛ tɑɑ.
8Ɩlɛnɑ ɩ́ kʋsɩ ɩ wɑɑlɩ tʋ Hɑsɑyɛlɩ sɩ: Ponɑ Ilisee kɛ kʋcɔɔʋ. Pɔɔsǝnɑ-ɩ sɩ: Mɑɑ sɩ yɑɑ mɑɑ kʋlɩ?
9Ḿpʋ́ɣʋ́ Hɑsɑyɛlɩ sǝɣǝlɑ Tɑmɑsɩ tɑɑ kʋpɑmpɑm kɛ́ yooyoonɑɑ nɩɩlɛ sɩ ɩ hɑɑkɩ Ilisee. Ɩ tɑlɑ Ɩsɔ kʋyɔɣɔtʋtʋ tɛlǝsʋlʋ kiŋ, ɩlɛnɑ ɩ́ tɔ sɩ: Nyɑ́ pǝyɑlʋ Silii wulɑʋ Pɛnɩ-Hɑtɑtɩ kʋsǝnɑ-m sɩ, mɑ́ kɔɔ mɑ́ pɔɔsɩ-ŋ sɩ ɩ kɑ́ sɩ yɑɑ ɩ kɑ́ kʋlɩ?
10Ntɛnɑ Ilisee sɩ: Polo nɑ ń heeli-ɩ sɩ, ɩ kɑ́ kʋlɩ. Amɑ Tɑcɑɑ hʋlɑ-m sɩ, pɑɑ pɩɩ lɑ ɩsǝnɑ ɩ kɑ́ sɩ.
11Ḿpʋ́ɣʋ́ Ilisee ɩsɛntɑɑ lɑɣɑsɑ kpɑkpɑɑ, nɑ ɩ́ nyǝnɩ Hɑsɑyɛlɩ tǝpiŋŋ nɑ ɩ́ nɑɑlɩ wulɑ.
12Ntɛnɑ Hɑsɑyɛlɩ sɩ: Pepe lɑpɑ tɑ cɑɑ? Mpʋɣʋlɛ Ilisee sɩ: Mɑ tɛmɑ nɑʋ kɛ ɩsǝnɑ ń kɑ́ sɔ kɔkɔ kɛ Ɩsɛɣɛlɩ nyǝ́mɑ koloosi ɑcɑlɛɛ tɔ. N kɑ́ lɛntɩ pɑ ɩfepiyɑ, nɑ ń fɛlɩ pɑ piyɑ kɛ nɔɔhɛɛ, nɑ ń yɔkɩ ɑhusitonɑɑ lotu.
13Kɛlɛnɑ Hɑsɑyɛlɩ sɩ: Hɑɣɑ kʋhʋlʋmɑɣɑ mɑ́, leɣe mɑ nɑwɑ pǝ toŋ? Ilisee sɩ: Tɑcɑɑ heelɑ-m sɩ n kɑ́ pǝsɩ Silii nyǝ́mɑ wulɑʋ.
14Ḿpʋ́ɣʋ́ Hɑsɑyɛlɩ kpemɑ, ɩlɛnɑ wulɑʋ pɔɔsɩ-ɩ sɩ: Ɩsɔ kʋyɔɣɔtʋtʋ tɛlǝsʋlʋ heelɑ-ŋ suwe? Mpʋɣʋlɛ sɩ: Ɩ heelɑ-m kɛ́ sɩ n kɑ́ kʋlɩ.
15Amɑ tɛʋ femɑ, ɩlɛnɑ Hɑsɑyɛlɩ lii kunti kɛ lʋm nɑ ɩ́ tɑkɩ wulɑʋ ɩsɛntɔɔ nɑ ɩ́ sɩ́. Ɩlɛnɑ ɩnɩ ɩ tɔɣɔ kɑwulɑɣɑ kɛ ɩ lonte.
16Ɩsɛɣɛlɩ wulɑʋ Akɑpɩ pǝyɑlʋ Solɑm kɑwulɑɣɑ pǝnɑɣɑ kɑkpɑsɩ nyǝŋkɑ tɑɑ kɛ́ Yutɑ wulɑʋ Sosɑfɑtɩ pǝyɑlʋ Solɑm, nɑ́ tɔɣɔ Yutɑ kɑwulɑɣɑ kɛ Yosɑlɛm tɑɑ kɛ́ pɩɩsɩ pǝlefɛɩ nɑɑnʋwɑ. Ɩ lʋlʋɣʋ pɩɩsɩ wɛ hiu nɑ nɑɑnʋwɑ nɑ nɑɑlɛ kɛ wɑɑtʋ ɩnɩ.
18Ḿpʋ́ɣʋ́ ɩ tɔmɑ teitei ɩsɩɩ Ɩsɛɣɛlɩ ɑwulɑɑ Akɑpɩ wɛ. Hɑlɩ ɩnɩ ɩ tɩɩ kpɑɣɑnɑ ɩ́lɛ́ ɩ pɛɛlɔ, nɑ ɩ́ lɑ mpi pǝ tɑ mɑɣɑ Tɑcɑɑ tɔ.
19Pɑɑ nɑ mpʋ Tɑcɑɑ tɑ tisi nɑ ɩ́ wɑkǝlɩ Yutɑ kɑwulɑɣɑ. Mpi tɔ, ɩ kɑ tɛmɑ ɩ tǝmlɛ tʋ Tɑfiiti kɛ heeluɣu kɛ́ sɩ, nyɑ́ lʋlʋɣʋ nyǝ́mɑ kɑ́ tɔkɩ kɑwulɑɣɑ kɛ Yosɑlɛm kɛ tɑm nɑ pɑ́ kɑɑsǝɣɩ tǝmɑ.

20Yutɑ wulɑʋ Solɑm ɩnɩ ɩ wɑɑtʋ tɑɑ kɛ́ Ɩtɔm nyǝ́mɑ kʋlɑ ɩ tɔɔ, nɑ pɑ́ kpɑ pɑ tǝɣɩ pɑ wulɑʋ.
21Ḿpʋ́ɣʋ́ Solɑm nɑ ɩ yoolɑɑ nɑ pɑ yoou kɛɛkɛnɑɑ, pɑ polɑ-wɛɣɛ yoonɑʋ kɛ Sɑyii tɛtʋ tɑɑ. Ɩlɛnɑ pɛlɛ pɑ́ tɑ-wɛɣɛ kotɑɣɑ. Amɑ ɑhoo nɑɑlɩ mpɛ pɑ tii Ɩtɔm nyǝ́mɑ mpɑ pɑɑ tɑmɑ-wɛɣɛ kotɑɣɑ tɔ pɑ tɔɔ nɑ pɑ́ yoonɑ-wɛ́. Ɩlɛnɑ Yutɑ yoolɑɑ se nɑ pɑ́ kpé.
22Pǝ kpɑɣɑʋ wɑɑtʋ ɩnɩ tɔɣɔ Ɩtɔm nyǝ́mɑ lɩɩ Yutɑ nyǝ́mɑ niŋ tɑɑ, nɑ pɑ́ wɛɛ pɑ tɩ tɔɔ. Ḿpʋ́ɣʋ́ Lipinɑ ɩcɑtɛ nyǝ́mɑ nɑ́ lɑpɑ mpʋ tɔtɔɣɔ wɑɑtʋ ɩnɩ ɩ tɑɑ.
23Pɑ kɛɛsɑ Solɑm tɔmnɑɑ lɛntǝnɑɑ kɛ Yutɑ ɑwulɑɑ tɑkǝlɑɣɑ tɑɑ.
24Wɑɑtʋ wei ɩ sǝpɑ, ɩlɛnɑ pɑ́ pimi-ɩ pɑ tǝyɑɣɑ pǝlɑɑʋ tɑɑ kɛ́ Tɑfiiti tɛ.
25Ɩsɛɣɛlɩ wulɑʋ Akɑpɩ pǝyɑlʋ Solɑm kɑwulɑɣɑ pǝnɑɣɑ nɑɑnʋwɑ nɑ nɑɑlɛ nyǝŋkɑ tɑɑ kɛ́ Yutɑ wulɑʋ Solɑm pǝyɑlʋ Ahɑsiyɑ nɑ́ pǝsɑ wulɑʋ kɛ Yosɑlɛm kɛ pǝnɑɣɑ kʋlʋmɑɣɑ tike. Ɩ lʋlʋɣʋ pɩɩsɩ kɑ wɛ hiu nɑ nɑɑlɛ kɛ wɑɑtʋ ɩnɩ ɩ tɑɑ. Ɩ too kɑ kɛ́ Ɩsɛɣɛlɩ wulɑʋ Omili lʋlʋɣʋ tɑɑ tʋ, pɑ yɑɑkɩ-ɩ sɩ Atɑlii.
27Ɩlɛnɑ ɩ́ tɔ́ ɩsɑɣɑtʋ tɑɑ kɛ́ teitei ɩsɩɩ ɩ ɑlʋ lʋlʋɣʋ nyǝ́mɑ Akɑpɩ wɛ. Nɑ ɩ́ lɑ́ mpi pǝ tɑ mɑɣɑ Tɑcɑɑ tɔ.
28Ḿpʋ́ɣʋ́ Solɑm nɑ Ahɑsiyɑ pɑ lɑpɑ nɔɣɔ kʋlʋmɑɣɑ, nɑ pɑ́ polo Silii wulɑʋ Hɑsɑyɛlɩ kɛ yoonɑʋ kɛ Lɑmɔtɩ ɩcɑtɛ kɛ Kɑlɑɑtɩ tɛtʋ tɑɑ, nɑ pǝ́ kʋ́ Solɑm.
29Ɩlɛnɑ ɩ́ mǝlɩ Sisilee sɩ pɑ́ lɑpɩ-ɩ kɔɔlɛ. Ḿpʋ́ɣʋ́ Yutɑ wulɑʋ Ahɑsiyɑ polɑ-ɩ sɛɛʋ.