1Ešebno (peršo) džives andro trito čhon paloda, sar o Izraeliti odgele andral o Egipt, doavle pre pušťa Sinaj.
2Odgele andral o Refidim, avle pre pušťa Sinaj a kerde peske anglo verchos taboris.
3O Mojžiš geľa upre pro verchos ko Del. Akor o RAJ zvičinďa pre leste pal o verchos: “Kada phen le Jakoboskera fajtake, le Izraelitengere manušenge:
4‘Korkore dikhľan, so kerďom le Egipťanenge a sar tumen hordinavas pro orloskere kridli a anďom tumen ke mande.
5Te man šunena a doľikerena miri zmluva, avena maškar savore narodi mire manuša ča prekal ma. Caľi phuv hiňi miri, ale tumen avena miro avrikidlo narodos,
6o kraľišagos le rašajengero a o sentno narodos.’ Kada pheneha le Izraelitenge.”
7Paľis o Mojžiš geľa, vičinďa ke peste le manušengere vodcen a phenďa lenge savoro, so leske prikazinďa o RAJ.
8Avke savore manuša jekhetane odphende: “Doľikeraha savoro, so phenďa o RAJ,” a o Mojžiš oda geľa te phenel le RAJESKE.
9O RAJ phenďa le Mojžišoske: “Me avava ke tu andre kaľi chmara, hoj o manuša te šunen, sar tuha vakerava, hoj te pačan tuke furt.” Sar o Mojžiš phenďa le RAJESKE le manušengere lava,
10o RAJ leske odphenďa: “Dža ko manuša, sentňar len adadžives the tajsa a mi rajbinen peske o gada.
11Mi en pririchtimen pro trito džives, bo oda džives Me angle lengere jakha avava tele pro verchos Sinaj.
12Ker pašal o verchos e hraňica, dži kaj šaj aven o manuša, a phen lenge: ‘Merkinen pre oda, hoj te na džan pro verchos a aňi pes te na chuden leskera hraňicatar. Bo dojekh, ko pes chudela le verchostar, čačes merela.
13Mušinela te el murdardo le barenca abo ľivimen le šipoha a ňisavo vast pes lestar našťi chudela. Či oda ela manuš vaj džvirina, mušinela te merel! Ale sar šunďola but o hangos la trubakero, šaj džan pro verchos.’ ”
14Paľis o Mojžiš avľa tele pal o verchos ko manuša, sentňarďa len a on rajbinenas peske o gada.
15A mek lenge phenďa: “Pro trito džives aven pririchtimen! Ma pašľuven tumare romňijenca.”
16Pro trito džives sig tosara pro verchos chudľa te herminel a te marel o bleski. E kaľi chmara les zaučharďa andre a šunďolas odarik igen zoralo hangos la trubakero a savore manuša andro taboris izdranas daratar.
17O Mojžiš ľidžalas le manušen andral o taboris, hoj pes te zdžan le Devleha, a on ačhile tele anglo verchos.
18Calo verchos Sinaj sas andro thuv, bo o RAJ avľa pre leste tele andre jag. O thuv andral leste džalas sar te andral o bov, a calo verchos igen izdralas.
19O hangos la trubakero sas zoraleder a zoraleder. Akor o Mojžiš vakerelas le Devleha a ov leske odphenelas le zorale hangoha, so šunďolas sar hermišagos.
20O RAJ avľa tele pro agor le verchoske Sinaj, paľis vičinďa ke peste le Mojžiš a o Mojžiš geľa upre.
21O RAJ leske phenďa: “Dža tele a phen le manušenge, hoj ňiko te na predžal e hraňica, hoj ke ma te avel a te dikhen man, bo akor but lendar merena.
22The o rašaja, save avena ke Ma, mušinen pes ešeb te sentňarel, hoj len te na marav.”
23O Mojžiš odphenďa le RAJESKE: “O manuša našťi aven upre pro verchos Sinaj, bo tu korkoro prikazinďal, hoj te kerav hraňica pašal leste, dži kaj šaj aven o manuša, bo mušinel te el sentno!”
24O RAJ leske odphenďa: “Akana dža tele a an peha pale le Aron. Ale o rašaja the o manuša te na predžan e hraňica, hoj pes te dochuden upre, bo len marava.”
25Avke o Mojžiš geľa tele a phenďa oda le manušenge.
