Text copied!
CopyCompare
Le Devleskero Lav Andre Romaňi Čhib 2019 - 2. Mojžišoskero

2. Mojžišoskero 39

Help us?
Click on verse(s) to share them!
1Le Aronoske kerde sentne ruchi la fijalova, ľoľa the purpurova vlnatar. Avke kerde the sentne ruchi pre rašaskeri služba andro Sentno Stanos, avke sar o RAJ prikazinďa le Mojžišoske.
2O efodos kerde le somnakastar, la fijalova, ľoľa the purpurova vlnatar the le sane pochtanestar.
3Le somnakastar kerde sane bľachi a strihinde len pro thava, hoj lenca te prephanden o fijalova, lole the purpurova vlni the o sano pochtan.
4Kerde upre duj kotora, so pes zachudenas pro vali a spojinenas pes le efodoskere uprune kotorenca.
5O sido sirimos le efodoskero, sas tiš kerdo le somnakastar, la fijalova, ľoľa the purpurova vlnatar the sane pochtanestar, avke sar o RAJ prikazinďa le Mojžišoske.
6Paľis oprikerde o bara le onixostar, thode andro somnakune obrubi a randle avri pro bara o nava le Jakoboskere čhavengere, avke sar pes kerel o pečaťidlos.
7Paľis len prichudenas pro efodos sar o bara, so leperena le Izraeloskere čhaven, avke sar o RAJ prikazinďa le Mojžišoske.
8Avke sar o efodos, kerde the e žeba pre brekh – phandľi le nekbaredere rašajenge pašal o jilo – la fijalova, ľoľa the purpurova vlnatar the le sane pochtanestar.
9Sas kocka a sas prethodo pro duvar, bišuduj (22) centimetri džinďardo the buchlo.
10Sas andre štar šori dragane bara: andro ešebno (peršo) šoros sas o rubinos, topasis, the smaragdos;
11andro dujto sas malachitos, zafiris, the diamantos;
12andro trito opalos, achatos, the ametistos;
13a andro štarto sas chrizolitos, onixos, the jaspisos. O bara sas thode andro somnakune ramici.
14Pre ola dešuduj (12) dragane bara sas o nava le Jakoboskere dešuduje čhavengere. Pre dojekh bar sas avrirandlo jekh kmeňoskero nav avke, sar pes kerel o pečaťidlos.
15Pre žeba sas kerde lancici le žuže somnakastar prephandle sar špargi.
16On kerde the duj somnakune kocki a duj somnakune kariki. Soduj kariki priside pro uprune rohi la žebake.
17O somnakune špargi prichudenas ke ola kariki pro agor la žebake
18a pro vali prichudenas o špargi pro somnakune ramici a avke len prichudenas anglunestar pro efodos.

19Kerde duj somnakune kariki a priside len andral ko soduj telune rohi le efodoske.
20Mek kerde the duj somnakune kariki a prichudle len telunestar pro anglune agora le efodoske, kaj hino zasido upral o sirimos.
21O kariki pre žeba prichudle ko efodoskere kariki la belava špargaha avke, hoj te el upreder le sirimostar a te na chučkerel upre tele. Kerde sa avke, sar o RAJ prikazinďa le Mojžišoske.
22O plašťos, so pes urelas tel o efodos, kerde calo la fijalova vlnatar.
23Pro plašťos sas maškaral avrimuklo than pro šero. Oda than sas sido zorale thaveha, hoj pes te na rozparinel.
24Pro teluno agor le plašťoske side granatoskere phaba la fijalova, ľoľa the purpurova vlnatar the le sane pochtanestar.
25Le žuže somnakastar kerde cikne zvončeki a prichudle len maškar o phaba pašal calo teluno agor le plašťoskero.
26Avke pes čerinenas o phaba le zvončekenca pašal o teluno agor le plašťoske, andre savo pes kerelas e služba, avke sar o RAJ prikazinďa le Mojžišoske.
27Prekal o Aron the prekal leskere čhave side o telune ruchi le loke pochtanestar,
28o turbanos, o čapki the o telune gada le ľanostar.
29Sar o RAJ prikazinďa le Mojžišoske, kerde the o šukar farebno sirimos le sane pochtanestar, la fijalova, ľoľa the purpurova vlnatar.
30Le žuže somnakastar kerde somnakuňi čelenka a randle andre o lava, avke sar pes kerel o pečaťidlos: “Sentno le RAJESKE”.
31Pre late prichudle e belavo šparga, hoj pes te del te priphandel pro turbanos, avke sar o RAJ prikazinďa le Mojžišoske.
32Avke sas dokerďi savori buči pro Sentno Stanos. O Izraeliti kerde sa avke, sar o RAJ prikazinďa le Mojžišoske.
33Le Mojžišoske ande o Sentno Stanos a savoro, so paš oda kampelas: o čati, o rami, o hačiki, o maškarune dručki, o slupi the o podstavci,
34e lepeda kerďi le lole sfarbimen baranoskere cipendar, e lepeda le tuleňiskere cipendar the e andruňi lepeda,
35e Zmluvakeri Archa the lakero kritos the o dručki,
36o skamind leskere sersamoha the o sentne mare,

37o momeľaris le žuže somnakastar leskere lampenca the sersamoha, the o olejos,
38o somnakuno oltaris, olejos pro pomakhľipen, o voňavo kaďidlos, e lepeda prekal o Stanoskero vudar,
39o brondzuno oltaris pro labarde obeti leskera brondzuňa roštaha, dručkenca the sersamoha, e brondzuňi nadoba le podstavcoha,
40o lepedi prekal e dvora, o slupi lengere podstavcenca, o lepedi prekal e dvorakeri brana, o cilore the šele prekal e dvora the Stanos a savore sersami prekal e služba andro Sentno Stanos,
41loke side ruchi prekal e služba andro Sentno Than, the o sentne ruchi prekal o rašaj Aron the leskere čhave andre rašajiko služba.
42O Izraeliti dokerde savori buči ča avke, sar o RAJ prikazinďa le Mojžišoske.
43O Mojžiš predikhelas e buči a dikhľa, hoj kerde sa avke, sar o RAJ prikazinďa. Paľis len požehňinďa.