Exodus 19

1

2

3

11

12

13

14

15

16

17

18

19

20

21

22

23

24

25

28

31

32

34

40

²Mai Israel Rephidim i netawanei da i nae au mutulua wavana Sinai. Ma kampa ola au karena i rauḡaravu.

³Ma Moses i ḡae au ola da God ita nebelei. Ma Bada ola au tepana ma Moses i ḡorei i pa, “Wei mai Israel Jacob noinoina ma riwei.

⁴—Taumi matamiei o inanai aiwai mai Egypt awarii a kauei ma me manubada natunatuna au papena e avavarai nanare a avaraimi ma a neiana-melemi awariu.

⁵Mepa da ona voteleteleu ma au parivainuaḡana bagibagina ona vojijina-kauei, lamna dam anatapui au dobu awariei taumi ana vinemi nuanuau pouna. Avena da dobu anatapuna Tau ḡariuei.

⁶Wate taumi aubaiu ona vipirisi, ma ami dam ona vovivirei tau ainelau aubaiu, wei babani mai Israel ma riwei.”

⁷Ma Moses i ḡaira me ma dogadogara i kwatuei ma aiwai anatapuna Bada i ririwei i pariverei.

⁸Ma rava anatapui i paribelana gogona i pa, “Tauai aiwai anatapuna Bada i ririwei ana kauei.” Ma Moses ai paribelana i ḡaiana-melei Bada awarina.

⁹Bada, Moses i riwei, “Tau apau potopotona au orana ana nei, da rava ina nonoriu Awarim ana bababani da ina vitumaḡana-nonoem.” Anina ma aiwai rava i ririwei Moses Bada i riwei.

¹⁰Ma Bada Moses i riwei, “Ma ḡaira ma rava ma voagui amadodo ma au maratom da orai ina oḡai da tau ina viborumeu. Ma ai gara ina oḡai.

¹¹Ma ina vokaukaua au pom vitonuina aubaina. Nai maranaina Tau ana ḡairai au Ola Sinai, rava anatapui au matai.

¹²Parata ma tere-kwaviviroi au ola. Ma riwa bagibaginei ma riwei ma pa, ‘Ona inana-kaua da eḡa au ola ona ḡae bo ola ona tapedadani. Aiai da ola i tapedadani ina iraḡe.’

¹³Mepa da rava bo ḡamoḡamo wei paratana i voraḡoni, taumi eḡa nai ravana bo ḡamoḡamona ona vodadani wate ḡaimei bo aierei ona viraḡeni. Wate maranai taure ponana i rarata lamna rava ina ḡae au ola.”

¹⁴Ma Moses olei i ḡaira memei ma ana rava i riwei da orai i vokaukauei da God ina viborumei ma ai gara i oḡai.

¹⁵Ma i riwei, “Ona vokaukaua mara vitonuina aubaina, marina da nai marana eḡa ona viawawana.”

¹⁶Ubaubanai au pom vitonuina, waiparara, namanamara ma apau potopotona ola i purui, ma taure i tou. Maratagogi rava anatapui kampa i mamae i rovo kaukaua ma i sisi.

¹⁷Ma Moses rava i ravena-opunei da God ita nebelei. Taui ola au karena i mairi.

¹⁸Bada ai araratanei i ḡairai ola Sinai au tepana. Ma bau potopotona olana i puru-pai. Bau kampa i ḡeḡae me modu potopotona e ararai nanare, ma olana anatapuna i vigugui.

¹⁹Ma taure ponana i rarata. Ma Moses i babani ma God i paribelei ponana nonorana me waiparara.

²⁰Bada i ḡairai ola Sinai au tepana ma Moses i kwatuei da ita ḡei ola au tepana. Ma Moses i ḡae.